ನವದೆಹಲಿ: 5 ಸಾವಿರ ಕಿ.ಮೀ ವ್ಯಾಪ್ತಿಯ ಅಗ್ನಿ-5 ಕ್ಷಿಪಣಿ ಯಶಸ್ಸಿನ ಬೆನ್ನಲ್ಲೇ ಭಾರತದ ಹೆಮ್ಮೆಯ ರಕ್ಷಣಾ ಅಭಿವೃದ್ಧಿ ಮತ್ತು ಸಂಶೋಧನಾ ಕೇಂದ್ರ (ಡಿಆರ್ ಡಿಒ) ಮತ್ತೊಂದು ಮಹತ್ವದ ಮೈಲುಗಲ್ಲು ಸ್ಥಾಪಿಸಲು ಹೊರಟಿದ್ದು, ಅಗ್ನಿ 5 ಕ್ಷಿಪಣಿಗಿಂತಲೂ ಪ್ರಬಲ ಮತ್ತು ಭಾರಿ ವಿಧ್ವಂಸಕ ಕ್ಷಿಪಣಿಯೊಂದರ ಸಂಶೋಧನೆಯನ್ನು ಕೈಗೆತ್ತಿಕೊಂಡಿದೆ ಎಂದು ಹೇಳಲಾಗುತ್ತಿದೆ.
ಪ್ರಸ್ತುತ ಭಾರತದಲ್ಲಿರುವ ಕ್ಷಿಪಣಿಗಳಲ್ಲೇ ಅಗ್ನಿ-5 ಕ್ಷಿಪಣಿ ಅತ್ಯಂತ ಪ್ರಬಲ ಕ್ಷಿಪಣಿಯಾಗಿದ್ದು, ಇದನ್ನೂ ಮೀರಿಸಬಲ್ಲ ಪ್ರಬಲ ಮತ್ತು ವಿಧ್ವಂಸಕ ಕ್ಷಿಪಣಿಯನ್ನು ತಯಾರಿಸುವ ಯೋಜನೆಗೆ ಡಿರ್ ಡಿಒ ಕೈಹಾಕಿದೆ. 5 ಸಾವಿರ ಕಿ.ಮೀ ವ್ಯಾಪ್ತಿಯ ಸಾಮರ್ಥ್ಯ ಹೊಂದಿರುವ ಅಗ್ನಿ-5 ಕ್ಷಿಪಣಿ ಸಂಪೂರ್ಣ ಪಾಕಿಸ್ತಾನ ಅಥವಾ ಚೀನಾದ ಅರ್ಧ ಭಾಗದಷ್ಟು ಭೂಪ್ರದೇಶದ ಯಾವುದೇ ಭಾಗದಲ್ಲಿನ ಗುರಿಯನ್ನು ನಿರಾಯಾಸವಾಗಿ ತಲುಪಬಲ್ಲ ಸಾಮರ್ಥ್ಯವನ್ನು ಹೊಂದಿದೆ. ಆದರೆ ಪ್ರಸ್ತುತ ಡಿಆರ್ ಡಿಒ ವಿಜ್ಞಾನಿಗಳು ಕೈಗೆತ್ತಿಕೊಂಡಿರುವ ಅಗ್ನಿ-6 ಕ್ಷಿಪಣಿ ಇದಕ್ಕಿಂತಲೂ ದುಪ್ಪಟ್ಟು ಅಂದರೆ ಸುಮಾರು 12 ಸಾವಿರ ಕಿ.ಮೀ ವ್ಯಾಪ್ತಿಯಲ್ಲಿನ ಯಾವುದೇ ಗುರಿಯನ್ನು ತಲುಪಬಲ್ಲ ಸಾಮರ್ಥ್ಯವನ್ನು ಹೊಂದಿರಲಿದೆ ಎಂದು ಹೇಳಲಾಗುತ್ತಿದೆ.
ಪ್ರಸ್ತುತ ಅಗ್ನಿ-6 ಕ್ಷಿಪಣಿ ಯೋಜನೆನ್ನು ಕೈಗೆತ್ತಿಕೊಂಡ ಸಂದರ್ಭದಲ್ಲಿ ಇದರ ಸಾಮರ್ಥ್ಯವನ್ನು 8 ಸಾವಿರ ಕಿ.ಮೀಗೆ ನಿಗದಿ ಪಡಿಸಲಾಗಿತ್ತಾದರೂ, ಬಳಿಕ ವಿಜ್ಞಾನಿಗಳು ಇದರ ಸಾಮರ್ಥ್ಯವನ್ನು ಹೆಚ್ಚಿಸುವ ನಿರ್ಧಾರ ಕೈಗೊಂಡಿದ್ದರು ಎಂದು ಹೇಳಲಾಗುತ್ತಿದೆ. ಇತ್ತೀಚೆಗಷ್ಟೇ ಭಾರತ ಕ್ಷಿಪಣಿ ತಂತ್ರಜ್ಞಾನ ನಿಯಂತ್ರಣ ಒಕ್ಕೂಟಕ್ಕೆ ಸೇರ್ಪಡೆಯಾಗಿತ್ತು. ಆ ಮೂಲಕ ಇತರೆ ದೇಶಗಳಿಂದ ಅತ್ಯಾಧುನಿಕ ಕ್ಷಿಪಣಿ ತಂತ್ರಜ್ಞಾನ ಸ್ವೀಕರಿಸುವ ಹಾಗೂ ನೀಡುವ ಅವಕಾಶವನ್ನು ಭಾರತ ಪಡೆದಿದೆ.
ಮೂಲಗಳ ಪ್ರಕಾರ ಅಗ್ನಿ- 5 ಕ್ಷಿಪಣಿಗಿಂತಲೂ ಅಗ್ನಿ -6 ಹೆಚ್ಚು ಉದ್ದವಿರಲಿದ್ದು, ಹೆಚ್ಚಿನ ಸ್ಪೋಟಕ ಹೊತ್ತೊಯ್ಯುವ ಸಾಮರ್ಥ್ಯ ಹೊಂದಿರಲಿದೆ. ಅಂತೆಯೇ ಈ ಮಹತ್ವದ ಕ್ಷಿಪಣಿ ಅತ್ಯುನ್ನತ ಎಂಐಆರ್ ವಿ (manoeuvring warheads or intelligent re-entry vehicles) ತಂತ್ರಜ್ಞಾನ ಹೊಂದಿರಲಿದ್ದು, ಅಗ್ನಿ-6 ಕ್ಷಿಪಣಿ ಏಕಕಾಲಕ್ಕೆ 10 ಸಿಡಿತಲೆಗಳನ್ನು ಹೊತ್ತೊಯ್ಯುವ ಮತ್ತು ವಿವಿಧ ಸ್ಥಳಗಳ ಮೇಲೆ ನಿಖರವಾಗಿ ದಾಳಿ ನಡೆಸು ಸಾಮರ್ಥ್ಯ ಹೊಂದಿರಲಿದೆ ಎಂದು ಹೇಳಲಾಗುತ್ತಿದೆ. 8 ಸಾವಿರ ಕಿ.ಮೀನಿಂದ 12 ಸಾವಿರ ಕಿ.ಮೀ. ದೂರದ ಯಾವುದೇ ಪ್ರದೇಶಗಳ ಮೇಲೆ ದಾಳಿ ನಡೆಸುವ ಸಾಮರ್ಥ್ಯ ಅಗ್ನಿ-6 ಕ್ಷಿಪಣಿಗಿರಲಿದೆ ಎಂದು ಹೇಳಲಾಗುತ್ತಿದೆ. ಪ್ರಮುಖವಾಗಿ ಚೀನಾ ಹಾಗೂ ಪಾಕಿಸ್ತಾನವನ್ನು ಗಮನದಲ್ಲಿಟ್ಟುಕೊಂಡು ಡಿಆರ್ ಜಿಒ ಈ ವಿಧ್ವಂಸಕ ಕ್ಷಿಪಣಿ ಯೋಜನೆಯನ್ನು ಕೈಗೆತ್ತಿಕೊಂಡಿದ್ದು, ಶತ್ರುರಾಷ್ಟ್ರಗಳ ಭದ್ರತಾ ವ್ಯವಸ್ಥೆಯನ್ನು ಭೇದಿಸಿ, ರಡಾರ್ಗಳ ಕಣ್ತಪ್ಪಿಸಿ ಹಲವು ಪ್ರದೇಶಗಳ ಮೇಲೆ ಏಕಕಾಲದಲ್ಲಿ ದಾಳಿ ನಡೆಸುವ ರೀತಿಯಲ್ಲಿ ಅಗ್ನಿ- 6 ಕ್ಷಿಪಣಿಯನ್ನು ವಿನ್ಯಾಸಗೊಳಿಸಲಾಗುತ್ತಿದೆ ಎಂದು ತಿಳಿದುಬಂದಿದೆ. ಅಂತೆಯೇ ಈ ಕ್ಷಿಪಣಿ ಅಣ್ವಸ್ತ್ರ ದಾಳಿ ನಡೆಸುವ ಸಾಮರ್ಥ್ಯವನ್ನೂ ಹೊಂದಿರಲಿದೆ ಎಂದು ಹೇಳಲಾಗುತ್ತಿದೆ.
ಕೇಂದ್ರ ಸರ್ಕಾರ ಈ ಕ್ಷಿಪಣಿ ಅಭಿವೃದ್ಧಿಗೆ ಈಗಾಗಲೇ ಹಸಿರು ನಿಶಾನೆ ತೋರಿಸಿದೆ. ತಂತ್ರಾಂಶ ಮತ್ತಿತರ ಅಂಶಗಳ ಕುರಿತು ವಿಜ್ಞಾನಿಗಳು ಪರಾಮರ್ಶೆ ನಡೆಸುತ್ತಿದ್ದಾರೆ. 2012ರಲ್ಲಿ ಅಗ್ನಿ -5 ಕ್ಷಿಪಣಿಯ ಪ್ರಾಯೋಗಿಕ ಪರೀಕ್ಷೆ ನಡೆಸಿದ್ದ ಡಿಆರ್ಡಿಒ, ಸೋಮವಾರ ಅಂತಿಮ ಪ್ರಾಯೋಗಿಕ ಪರೀಕ್ಷೆಯನ್ನು ಯಶಸ್ವಿಯಾಗಿ ನಡೆಸಿತ್ತು. ಅಗ್ನಿ -6 ಕ್ಷಿಪಣಿಯ ಪ್ರಾಯೋಗಿಕ ಪರೀಕ್ಷೆ ಮುಂದಿನ ವರ್ಷ ಆರಂಭವಾಗುವ ನಿರೀಕ್ಷೆಯಿದ್ದು, ಮುಂದಿನ 2-3 ವರ್ಷಗಳಲ್ಲಿ ಈ ಕ್ಷಿಪಣಿ ಸೇನೆಯ ಬಳಕೆಗೆ ಲಭ್ಯವಾಗುವ ಸಾಧ್ಯತೆ ಇದೆ. ಆದರೆ ಅಗ್ನಿ-6 ಕ್ಷಿಪಣಿ ಯೋಜನೆಯನ್ನು ರಹಸ್ಯವಾಗಿಡಲು ಡಿಆರ್ ಡಿಒ ನಿರ್ಧರಿಸಿದಂತಿದ್ದು, ಕ್ಷಿಪಣಿ ಯೋಜನೆಯ ಯಾವುದೇ ವಿಚಾರಗಳ ಬಗ್ಗೆ ಡಿಆರ್ಡಿಒ ಮಾಹಿತಿ ನೀಡಿಲ್ಲ.
ಒಟ್ಟಾರೆ ಅಮೆರಿಕ ಮತ್ತು ರಷ್ಯಾ ದೇಶಗಳಂತೆ ಭಾರತ ಕೂಡ ವಿಶ್ವದ ಬಲಿಷ್ಟ ರಕ್ಷಣಾ ಸಾಮರ್ಥ್ಯ ಹೊಂದಿರುವ ರಾಷ್ಟ್ರವಾಗುವತ್ತ ಮಹತ್ವದ ಹೆಜ್ಜೆಯನ್ನಿಡುತ್ತಿದ್ದು, ಅಗ್ನಿ-6 ಯಶಸ್ವಿಯಾದರೆ ಭಾರತ ರಕ್ಷಣಾ ಬಲ ಮತ್ತಷ್ಟು ಹೆಚ್ಚಾಗಲಿದೆ.