ಇಸ್ರೇಲ್ ನಲ್ಲಿರುವ ಭಾರತೀಯರಿಗೆ ಸಾಗರೋತ್ತರ ನಾಗರಿಕ ಕಾರ್ಡು: ಪ್ರಧಾನಿ ಮೋದಿ ಘೋಷಣೆ

ಟೆಲ್ ಅವಿವ್: ಭಾರತೀಯ ಮೂಲದ ಇಸ್ರೇಲ್ ನಲ್ಲಿ ವಾಸಿಸುತ್ತಿರುವ ನಾಗರಿಕರಿಗೆ ಸಾಗರೋತ್ತರ ನಾಗರಿಕರು ಕಾರ್ಡುಗಳು(ಒಸಿಐ ಕಾರ್ಡುಗಳು) ದೊರೆಯಲಿದೆ ಎಂದು ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಘೋಷಿಸಿದ್ದಾರೆ. 

ನಿನ್ನೆ ಮಧ್ಯರಾತ್ರಿ ಅವರು ಇಸ್ರೇಲ್ ನ ಜಿಲ್ಲೆ ಟೆಲ್ ಅವಿವ್ ನಲ್ಲಿ ಭಾರತೀಯ ಸಮುದಾಯವನ್ನುದ್ದೇಶಿಸಿ ಮಾತನಾಡಿ, ಇಸ್ರೇಲ್ ನಲ್ಲಿ ಕಡ್ಡಾಯ ಮಿಲಿಟರಿ ಸೇವೆ ಸಲ್ಲಿಸಿದವರಿಗೆ ಕೂಡ ಸಾಗರೋತ್ತರ ನಾಗರಿಕ ಕಾರ್ಡು ನೀಡಲಾಗುವುದು ಎಂದು ಹೇಳಿದರು. ಈ ಕಾರ್ಯಕ್ರಮದಲ್ಲಿ ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಕೂಡ ಭಾಗವಹಿಸಿದ್ದರು.

ದೆಹಲಿ, ಮುಂಬೈ ಮತ್ತು ಟಲ್ ಅವಿವ್ ನಡುವೆ ನೇರ ವಿಮಾನ ಸೇವೆಯನ್ನು

ಆರಂಭಿಸಲಾಗುವುದು. ಇದರಿಂದ ಭಾರತೀಯರು ಮತ್ತು ಇಸ್ರೇಲ್ ನಾಗರಿಕರ ಮಧ್ಯೆ ಸಂಪರ್ಕ ಹೆಚ್ಚಾಗಲಿದೆ. ಇಸ್ರೇಲ್ ನಲ್ಲಿ  ಭಾರತೀಯ ಸಾಂಸ್ಕೃತಿಕ ಕೇಂದ್ರವನ್ನು ತೆರೆಯಲಾಗುವುದು. ಈ ಮೂಲಕ ಇಲ್ಲಿನ ಭಾರತೀಯರ ದೀರ್ಘಕಾಲದ ಬೇಡಿಕೆಯನ್ನು ಈಡೇರಿಸಲಾಗುವುದು ಎಂದು ಪ್ರಧಾನಿ ತಿಳಿಸಿದರು.

ಒಸಿಐ ಕಾರ್ಡುಗಳು ಪಡೆಯಲು ಇಲ್ಲಿನ ಭಾರತೀಯರು ಎದುರಿಸುತ್ತಿರುವ ತೊಂದರೆಗಳು ತಮ್ಮ ಗಮನಕ್ಕೆ ಬಂದಿದೆ.  ಇದಕ್ಕಾಗಿ ಭಾರತ ಸರ್ಕಾರ ನಿಯಮಗಳನ್ನು ಸರಳಗೊಳಿಸಿದೆ. ಇಸ್ರೇಲ್ ನಲ್ಲಿ ಕಡ್ಡಾಯ ಮಿಲಿಟರಿ ಸೇವೆಗಳನ್ನು ಸಲ್ಲಿಸಿದವರು ಕೂಡ ಒಸಿಐ ಕಾರ್ಡುಗಳನ್ನು ಪಡೆಯಲಿದ್ದಾರೆ ಎಂದು ಮೋದಿಯವರು ಹೇಳಿದಾಗ ನೆರೆದಿದ್ದ ಭಾರತೀಯ ಸಮುದಾಯ ಕರತಾಡನದೊಂದಿಗೆ ಸ್ವಾಗತಿಸಿತು.

ಭಾರತ ಮತ್ತು ಯಹೂದಿ ರಾಷ್ಟ್ರ ಇಸ್ರೇಲ್ ನ ಸಂಬಂಧ ಶತಮಾನಗಳಷ್ಟು ಹಳೆಯದು. ಆದರೆ ವಾಸ್ತವದ ವಿಚಾರವೆಂದರೆ ಸ್ವಾತಂತ್ರ್ಯ ಸಿಕ್ಕಿ ಕಳೆದ 70 ವರ್ಷಗಳಲ್ಲಿ ಇಲ್ಲಿಗೆ ಭಾರತದ ಯಾವೊಬ್ಬ ಪ್ರಧಾನ ಮಂತ್ರಿ ಭೇಟಿ ನೀಡಿರಲಿಲ್ಲ. ಇದು ಹಿಂದಿನ ಸರ್ಕಾರಗಳ ಮನೋಧರ್ಮವನ್ನು ಸ್ಪಷ್ಟಪಡಿಸುತ್ತದೆ. ಕಳೆದ 70 ವರ್ಷಗಳಲ್ಲಿ ಇದೇ ಮೊದಲ ಬಾರಿಗೆ ಭಾರತದ ಪ್ರಧಾನಿಯೊಬ್ಬರು ಈ ನೆಲಕ್ಕೆ ನಿಮ್ಮ ಹಾರೈಕೆ ಕೋರಲು ಕಾಲಿಟ್ಟಿದ್ದಾರೆ ಎಂದು ಮೋದಿಯವರು ಹೇಳಿದಾಗ ನೆರೆದಿದ್ದ ಭಾರತೀಯ ಸಮೂಹ ಮೋದಿ, ಮೋದಿ ಎಂದು ಉದ್ಘಾರ ಹಾಕಿತು.