ಬ್ರಿಟನ್ ಸರ್ಕಾರ 1945ರಲ್ಲಿ ಪೊಲೀಸ್ ಅಧೀಕ್ಷಕ ಟಿ.ಎಸ್.ಫಿನ್ನೆ ನೇತೃತ್ವದಲ್ಲಿ ತನಿಖೆ ನಡೆಸಿತ್ತು. ಅವರ ತಂಡ ಬ್ಯಾಂಕಾಕ್ ಮತ್ತು ತೈಪೆಗೆ ಭೇಟಿ ನೀಡಿ ಅಕ್ಟೋಬರ್ 5,7,10 ಮತ್ತು 12ರಂದು ನಾಲ್ಕು ವರದಿಗಳನ್ನು ಸಲ್ಲಿಸಿ, ವಿಮಾನ ದುರಂತದಲ್ಲಿ ಬೋಸ್ ಮೃತಪಟ್ಟಿರುವುದು ಖಚಿತ ಎಂದು ಸ್ಪಷ್ಟಪಡಿಸಿತ್ತು. 1945ರ ಡಿಸೆಂಬರ್ 31ರಂದು ಕರ್ನಲ್ ಹಬೀಬುರ್ರಹ್ಮಾನ್ ಅವರನ್ನು ಸಂದರ್ಶಿಸಿ ತನಿಖಾ ವರದಿ ಸಲ್ಲಿಸಲಾಗಿತ್ತು. ರೆಹಮಾನ್ ಅವರು ವಿಮಾನ ದುರಂತದಲ್ಲಿ ಬದುಕಿ ಉಳಿದಿದ್ದು, ಟೋಕಿಯೊ ಕಾಲಮಾನದ ಪ್ರಕಾರ ರಾತ್ರಿ 9 ಗಂಟೆಗೆ ಬೋಸ್ ಮಡಿಯುವವರೆಗೂ ರೆಹಮಾನ್ ಅವರ ಜತೆಗಿದ್ದರು ಎಂದು ಪುಸ್ತಕದಲ್ಲಿ ಉಲ್ಲೇಖಿಸಲಾಗಿದೆ.