ಇಸ್ರೇಲ್-ಹಮಾಸ್ ಯುದ್ಧ: ಗಾಜಾದಲ್ಲಿನ ಮನೆ ತೊರೆದ 1 ಮಿಲಿಯನ್ ಪ್ಯಾಲೆಸ್ಟೀನಿಯರು; 12,500 ಮಂದಿ ಗಾಯ

ಗಾಜಾ: ಸ್ಥಳಾಂತರಗೊಳ್ಳುವಂತೆ ಇಸ್ರೇಲ್ ಸೂಚನೆ ನೀಡಿದ ನಂತರ ಗಾಜಾದ ಜನಸಂಖ್ಯೆಯ ಸರಿಸುಮಾರು ಅರ್ಧದಷ್ಟಿರುವ 1 ಮಿಲಿಯನ್ ಗಿಂತಲೂ ಹೆಚ್ಚುಪ್ಯಾಲೆಸ್ಟೀನಿಯರು ಉತ್ತರ ಮತ್ತು ಗಾಜಾ ನಗರದಲ್ಲಿನ ಮನೆಗಳನ್ನು ತೊರೆದಿದ್ದಾರೆ. 

ದಕ್ಷಿಣ ಗಾಜಾದಲ್ಲಿ ಗುರುವಾರ ರಾತ್ರಿಯಿಡೀ ವೈಮಾನಿಕ ದಾಳಿ ಮುಂದುವರೆಯಿತು, ಆಂಬ್ಯುಲೆನ್ಸ್‌ಗಳು ಗಾಯಾಳುಗಳನ್ನು ಗಾಜಾದ ಎರಡನೇ ಅತಿದೊಡ್ಡ ಆಸ್ಪತ್ರೆಯಾದ ಖಾನ್ ಯೂನಿಸ್ ದಲ್ಲಿನ ನಾಸರ್‌ ಗೆ ಸಾಗಿಸಿದವು.

ಇದನ್ನೂ ಓದಿ:ಮೃತದೇಹಗಳೆಲ್ಲಿ? ಗಾಜಾ ಆಸ್ಪತ್ರೆ ಸ್ಫೋಟದ ಕುರಿತು ಇಸ್ರೇಲ್ ಪ್ರಶ್ನೆ

ಅಮೆರಿಕ ಅಧ್ಯಕ್ಷ ಜೋ-ಬೈಡನ್ ಅವರ ಮನವಿ ಮೇರೆಗೆ  ಈಜಿಪ್ಟ್‌ನಿಂದ ಗಾಜಾಕ್ಕೆ ಸೀಮಿತ ಮಾನವೀಯ ಸಹಾಯವನ್ನು ಅನುಮತಿಸಲಾಗುವುದು ಎಂದು ಇಸ್ರೇಲಿ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಅವರ ಕಚೇರಿ ಬುಧವಾರ ಹೇಳಿತ್ತು.

ಹಮಾಸ್ ಉಗ್ರಗಾಮಿಗಳು ಇಸ್ರೇಲ್‌ಗೆ ನುಗ್ಗಿದ ನಂತರ ಅಕ್ಟೋಬರ್ 7 ರಂದು ಪ್ರಾರಂಭವಾದ ಯುದ್ಧವು ಎರಡೂ ಕಡೆಯ ಐದು ಗಾಜಾ ಯುದ್ಧಗಳಲ್ಲಿ ಅತ್ಯಂತ ಮಾರಕವಾಗಿದೆ. ಇಲ್ಲಿಯವರೆಗೂ 3,785 ಪ್ಯಾಲೆಸ್ಟೀನಿಯ ಸಾವನ್ನಪ್ಪಿದ್ದಾರೆ ಮತ್ತು ಸುಮಾರು 12,500 ಜನರು ಗಾಯಗೊಂಡಿದ್ದಾರೆ ಎಂದು ಹಮಾಸ್ ನಡೆಸುತ್ತಿರುವ ಗಾಜಾ ಆರೋಗ್ಯ ಸಚಿವಾಲಯ ಗುರುವಾರ ತಿಳಿಸಿದೆ.