ಲೆಬನಾನ್ನ ಶಸ್ತ್ರಸಜ್ಜಿತ ಸಂಘಟನೆ ಹಿಜ್ಬುುಲ್ಲಾ ಅಮೆರಿಕಾದಲ್ಲಿ ನಡೆಯಲಿರುವ ಲೆಬನಾನ್–ಇಸ್ರೇಲ್ ನೇರ ಮಾತುಕತೆಗಳ ಬಗ್ಗೆ ತೀವ್ರ ವಿರೋಧ ವ್ಯಕ್ತಪಡಿಸಿದ್ದು, ಆ ಮಾತುಕತೆಗಳಿಂದ ಹೊರಬರುವ ಯಾವುದೇ ಒಪ್ಪಂದಕ್ಕೂ ತಾವು ಬದ್ಧರಾಗುವುದಿಲ್ಲ ಎಂದು ಸ್ಪಷ್ಟಪಡಿಸಿದೆ.
ಹಿಜ್ಬುುಲ್ಲಾ ಸಂಘಟನೆ ಹಿರಿಯ ನಾಯಕ ವಾಫಿಕ್ ಸಫಾ ಮಾತನಾಡಿದ್ದು, ಲೆಬನಾನ್ ಮತ್ತು ಇಸ್ರೇಲ್ ನಡುವೆ ನಡೆಯುವ ಈ ಮಾತುಕತೆಗಳ ಫಲಿತಾಂಶಗಳ ಬಗ್ಗೆ ನಮಗೆ ಯಾವುದೇ ಆಸಕ್ತಿ ಇಲ್ಲ. ಅವರು ಏನು ಒಪ್ಪಂದ ಮಾಡಿಕೊಂಡರೂ ಅದಕ್ಕೆ ನಾವು ಬದ್ಧರಾಗುವುದಿಲ್ಲ” ಎಂದು ಹೇಳಿದ್ದಾರೆ.
ಅಮೆರಿಕಾದಲ್ಲಿ ನಡೆಯಲಿರುವ ಈ ಮಾತುಕತೆಗಳಲ್ಲಿ ಲೆಬನಾನ್ ಮತ್ತು ಇಸ್ರೇಲ್ ರಾಯಭಾರಿಗಳು ಹಲವು ದಶಕಗಳ ಬಳಿಕ ಮುಖಾಮುಖಿಯಾಗಿ ಭೇಟಿಯಾಗಲಿದ್ದಾರೆ.
ಈ ಎರಡು ರಾಷ್ಟ್ರಗಳಿಗೆ ಅಧಿಕೃತ ರಾಜತಾಂತ್ರಿಕ ಸಂಬಂಧಗಳೇ ಇಲ್ಲದಿರುವುದರಿಂದ, ಈ ಸಭೆ ಐತಿಹಾಸಿಕವೆಂದು ಪರಿಗಣಿಸಲಾಗುತ್ತಿದೆ.
ಈ ನಡುವೆ ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಹಿಜ್ಬುಲ್ಲಾ ಶಸ್ತ್ರತ್ಯಾಗ ಮಾಡಬೇಕು ಎಂಬುದು ತಮ್ಮ ಪ್ರಮುಖ ಗುರಿಯಾಗಿದೆ ಎಂದು ಸ್ಪಷ್ಟಪಡಿಸಿದ್ದಾರೆ.
ಈ ಮೂಲಕ ಇಸ್ರೇಲ್ ಪರವಾಗಿ ಕದನ ವಿರಾಮದ ಬಗ್ಗೆ ಯಾವುದೇ ಸಡಿಲಿಕೆ ಇಲ್ಲ ಎಂಬ ಸಂದೇಶವನ್ನೂ ನೀಡಲಾಗಿದ್ದು, ಇದರಿಂದ ಮಾತುಕತೆಗಳು ಸುಲಭವಾಗುವುದಿಲ್ಲ ಎಂಬ ಸೂಚನೆ ಸಿಗುತ್ತಿದೆ.
ಇದಕ್ಕೂ ಮುನ್ನ ಪಾಕಿಸ್ತಾನದಲ್ಲಿ ನಡೆದ ಅಮೆರಿಕಾ–ಇರಾನ್ ಮಾತುಕತೆಗಳ ವೇಳೆ, ಇರಾನ್ ಲೆಬನಾನ್ ವಿಚಾರವನ್ನೂ ಸೇರಿಸಲು ಯತ್ನಿಸಿದ್ದರೆ, ಅಮೆರಿಕಾ ಮತ್ತು ಇಸ್ರೇಲ್ ಅದನ್ನು ತಿರಸ್ಕರಿಸಿದ್ದವು.
ಈ ನಡುವೆ, ಟೆಹ್ರಾನ್ ಮತ್ತು ವಾಷಿಂಗ್ಟನ್ ನಡುವೆ ತಾತ್ಕಾಲಿಕ ಕದನ ವಿರಾಮ ಘೋಷಣೆ ಆದ ಕೆಲವೇ ಗಂಟೆಗಳ ನಂತರ, ಇಸ್ರೇಲ್ ಲೆಬನಾನ್ನಲ್ಲಿ 100ಕ್ಕೂ ಹೆಚ್ಚು ದಾಳಿಗಳನ್ನು ನಡೆಸಿತ್ತು. ವಿಶೇಷವಾಗಿ ಬೈರೂತ್ ನಗರದ ನಾಗರೀಕ ಪ್ರದೇಶಗಳು ಹಾಗೂ ವಾಣಿಜ್ಯ ಕೇಂದ್ರಗಳ ಮೇಲೆ ದಾಳಿ ನಡೆದಿತ್ತು.
ಇತ್ತೀಚಿನ ಮಾತುಕತೆಗಳ ಪರಿಣಾಮವಾಗಿ ಬೈರೂತ್ ನಗರ ಮತ್ತು ಅದರ ದಕ್ಷಿಣ ಭಾಗ (ಡಾಹಿಯೆ ಪ್ರದೇಶ)ದಲ್ಲಿ ದಾಳಿಗಳು ತಾತ್ಕಾಲಿಕವಾಗಿ ನಿಂತಿವೆ. ಆದರೂ ದಕ್ಷಿಣ ಲೆಬನಾನ್ ಭಾಗದಲ್ಲಿ ಯುದ್ಧ ತೀವ್ರವಾಗಿಯೇ ಮುಂದುವರಿದಿದೆ.
ಒಟ್ಟಾರೆ, ಅಮೆರಿಕಾದಲ್ಲಿ ನಡೆಯಲಿರುವ ಲೆಬನಾನ್–ಇಸ್ರೇಲ್ ಮಾತುಕತೆಗಳು ಶಾಂತಿಯತ್ತ ಹೆಜ್ಜೆಯಾಗಬಹುದೆಂಬ ನಿರೀಕ್ಷೆ ಇದ್ದರೂ, ಹಿಜ್ಬುಲ್ಲಾ ನೀಡಿರುವ ಸ್ಪಷ್ಟ ವಿರೋಧದಿಂದ ಈ ಪ್ರಕ್ರಿಯೆ ಮತ್ತಷ್ಟು ಸಂಕೀರ್ಣವಾಗುವ ಸಾಧ್ಯತೆ ಇದೆ.
Advertisement
