ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮತ್ತೊಮ್ಮೆ ತಮ್ಮ ಸಾಮಾಜಿಕ ಜಾಲತಾಣದ ಪೋಸ್ಟ್ಗಳ ಮೂಲಕ ಹೊಸ ವಿವಾದವನ್ನು ಹುಟ್ಟುಹಾಕಿದ್ದಾರೆ.
ಮಾಜಿ ಅಧ್ಯಕ್ಷ ಬರಾಕ್ ಒಬಾಮಾ ಮತ್ತು ಅವರ ಪತ್ನಿ ಮಿಶೆಲ್ ಒಬಾಮಾ ಅವರನ್ನು ಗುರಿಯಾಗಿಸಿ ಮಾರ್ಪಡಿಸಿದ (ಡಾಕ್ಟರ್ಡ್) ಚಿತ್ರವೊಂದನ್ನು ಹಂಚಿಕೊಂಡಿರುವ ಟ್ರಂಪ್, ಅದೇ ವೇಳೆ ಇಟಲಿ ಪ್ರಧಾನಿ ಜಾರ್ಜಿಯಾ ಮೆಲೋನಿ ಅವರನ್ನು ಉಲ್ಲೇಖಿಸಿದ ಮತ್ತೊಂದು ಪೋಸ್ಟ್ನಿಂದಲೂ ಟೀಕೆಗೆ ಗುರಿಯಾಗಿದ್ದಾರೆ. ಈ ಎರಡೂ ಪೋಸ್ಟ್ಗಳು ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕ ಆಕ್ರೋಶಕ್ಕೆ ಕಾರಣವಾಗಿವೆ.
ಟ್ರಂಪ್ ಹಂಚಿಕೊಂಡಿರುವ ಚಿತ್ರದಲ್ಲಿ ಬರಾಕ್ ಮತ್ತು ಮಿಶೆಲ್ ಒಬಾಮಾ ನಗುತ್ತಾ ಕೈ ಬೀಸುತ್ತಾ ಏರ್ ಫೋರ್ಸ್ ಒನ್ ವಿಮಾನವನ್ನು ಏರುತ್ತಿರುವಂತೆ ಕಾಣಿಸುತ್ತದೆ. ಆದರೆ ವಿಮಾನದ ಮೇಲೆ "Yes We Can", "Obama" ಮತ್ತು BLM (Black Lives Matter) ಎಂಬ ಬರಹಗಳ ಜೊತೆಗೆ ಅರೇಬಿಕ್ ಭಾಷೆಯಲ್ಲಿ "ಅಲ್ಹಮ್ದುಲಿಲ್ಲಾಹ್" ಎಂಬ ಪದವನ್ನೂ ಸೇರಿಸಲಾಗಿದೆ. "ಅಲ್ಹಮ್ದುಲಿಲ್ಲಾಹ್" ಎಂದರೆ "ದೇವರಿಗೆ ಸ್ತೋತ್ರ" ಅಥವಾ "ದೇವರಿಗೆ ಧನ್ಯವಾದಗಳು" ಎಂಬ ಅರ್ಥ ಬರುತ್ತದೆ.
ಈ ಪೋಸ್ಟ್ಗೆ ಅಮೆರಿಕದಲ್ಲಿ ವ್ಯಾಪಕ ಟೀಕೆ ವ್ಯಕ್ತವಾಗಿದ್ದು, ಹಲವು ರಾಜಕೀಯ ವಿಶ್ಲೇಷಕರು ಮತ್ತು ಸಾಮಾಜಿಕ ಕಾರ್ಯಕರ್ತರು ಇದನ್ನು ಜನಾಂಗೀಯ ಸಂದೇಶಗಳನ್ನು ಹರಡುವ ಪ್ರಯತ್ನ ಎಂದು ಆರೋಪಿಸಿದ್ದಾರೆ.
ಈ ಬರಹವನ್ನು ಅಪರಾಧ, ನಗರಗಳ ಅವನತಿ ಮತ್ತು ಅರಾಜಕತೆಯ ಸಂಕೇತವಾಗಿ ಬಳಸುವುದು ಹಿಂದೆ ಕಪ್ಪು ವರ್ಣದ ಜನರನ್ನು ಗುರಿಯಾಗಿಸಿ ನಡೆಸುತ್ತಿದ್ದ ಜನಾಂಗೀಯ ಪ್ರಚಾರಗಳಲ್ಲಿ ಕಂಡುಬಂದಿತ್ತು, ಈ ಕಾರಣದಿಂದ ಟ್ರಂಪ್ ಹಂಚಿಕೊಂಡಿರುವ ಚಿತ್ರವನ್ನು ಹಲವರು ಜನಾಂಗೀಯ ಭಾವನೆಗಳನ್ನು ಕೆರಳಿಸುವ ಪ್ರಯತ್ನ ಎಂದು ಟೀಕಿಸಿದ್ದಾರೆ.
ಬರಾಕ್ ಒಬಾಮಾ ವಿರುದ್ಧ ಟ್ರಂಪ್ ಹಲವು ವರ್ಷಗಳಿಂದ ವೈಯಕ್ತಿಕ ಟೀಕೆಗಳನ್ನು ಮಾಡುತ್ತಲೇ ಬಂದಿದ್ದಾರೆ. ಒಬಾಮಾ ಅಮೆರಿಕದಲ್ಲಿ ಜನಿಸಿಲ್ಲ ಎಂಬ ಆಧಾರರಹಿತ ಆರೋಪದಿಂದ ಹಿಡಿದು, ಬಹುಸಂಖ್ಯಾತ ಕಪ್ಪು ವರ್ಣದ ಜನರಿರುವ ದೇಶಗಳ ಕುರಿತು ವಿವಾದಾತ್ಮಕ ಹೇಳಿಕೆಗಳನ್ನು ನೀಡುವವರೆಗೆ ಹಲವು ಬಾರಿ ಅವರು ಟೀಕೆಗೆ ಗುರಿಯಾಗಿದ್ದರು.
ಇದೇ ವರ್ಷ ಫೆಬ್ರವರಿಯಲ್ಲಿ, Black History Month ಆರಂಭವಾದ ಮೊದಲ ವಾರದಲ್ಲೇ ಟ್ರಂಪ್, ಒಬಾಮಾ ದಂಪತಿಯನ್ನು ಮಂಗಗಳಂತೆ ಚಿತ್ರಿಸಿರುವ ಮತ್ತೊಂದು ಪೋಸ್ಟ್ ಹಂಚಿಕೊಂಡಿದ್ದರು.
ಆ ಪೋಸ್ಟ್ಗೆ ನಾಗರಿಕ ಹಕ್ಕುಗಳ ಹೋರಾಟಗಾರರು, ಡೆಮಾಕ್ರಾಟ್ ನಾಯಕರು ಮಾತ್ರವಲ್ಲದೆ ಕೆಲ ರಿಪಬ್ಲಿಕನ್ ಸಂಸದರೂ ತೀವ್ರ ವಿರೋಧ ವ್ಯಕ್ತಪಡಿಸಿದ್ದರು. ಬಳಿಕ ಆ ಪೋಸ್ಟ್ ಅನ್ನು ಅಳಿಸಲಾಗಿತ್ತು. ಆದರೆ, ಟ್ರಂಪ್ ಕ್ಷಮೆಯಾಚಿಸಲು ನಿರಾಕರಿಸಿದ್ದು, ಆ ಪೋಸ್ಟ್ ಸಿಬ್ಬಂದಿಯೊಬ್ಬರಿಂದ ಪ್ರಕಟವಾಗಿದೆ ಎಂದು ಶ್ವೇತಭವನ ಸ್ಪಷ್ಟನೆ ನೀಡಿತ್ತು.
ಈ ಬಾರಿ ಏರ್ ಫೋರ್ಸ್ ಒನ್ನ್ನು ಒಳಗೊಂಡ ಚಿತ್ರವನ್ನು ಟ್ರಂಪ್ ಹಂಚಿಕೊಂಡಿರುವುದು ಮತ್ತೊಂದು ಕಾರಣಕ್ಕೂ ಚರ್ಚೆಗೆ ಗ್ರಾಸವಾಗಿದೆ.
ಇತ್ತೀಚೆಗಷ್ಟೇ ಕತಾರ್ ಉಡುಗೊರೆಯಾಗಿ ನೀಡಿರುವ ಸುಮಾರು 400 ಮಿಲಿಯನ್ ಡಾಲರ್ ಮೌಲ್ಯದ ಪರಿಷ್ಕೃತ ಬೋಯಿಂಗ್ 747-800 ವಿಮಾನದಲ್ಲಿ ಟ್ರಂಪ್ ಮೊದಲ ಬಾರಿಗೆ ಪ್ರಯಾಣಿಸಿದ್ದರು. ಈ ಹೊಸ ಏರ್ ಫೋರ್ಸ್ ಒನ್ಗೆ ಹಿಂದಿನ ತಿಳಿ ನೀಲಿ ಬಣ್ಣದ ಬದಲಿಗೆ ಟ್ರಂಪ್ ಅವರ ಇಷ್ಟದಂತೆ ಗಾಢ ನೀಲಿ, ಕೆಂಪು ಹಾಗೂ ಚಿನ್ನದ ಬಣ್ಣದ ವಿನ್ಯಾಸ ನೀಡಲಾಗಿದೆ.
ಈ ವಿವಾದಾತ್ಮಕ ಪೋಸ್ಟ್ಗೆ ಸಂಬಂಧಿಸಿದಂತೆ ಶ್ವೇತಭವನ ತಕ್ಷಣ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ. ಬರಾಕ್ ಹಾಗೂ ಮಿಶೆಲ್ ಒಬಾಮಾ ಅವರ ಕಚೇರಿಯೂ ಈ ಕುರಿತು ಅಧಿಕೃತ ಹೇಳಿಕೆ ಬಿಡುಗಡೆ ಮಾಡಿಲ್ಲ.
ಇದಕ್ಕೂ ಮುನ್ನ ಕಳೆದ ತಿಂಗಳು ಟ್ರಂಪ್, ಚಿಕಾಗೋದಲ್ಲಿ ನಿರ್ಮಾಣವಾಗುತ್ತಿರುವ ಒಬಾಮಾ ಅಧ್ಯಕ್ಷೀಯ ಗ್ರಂಥಾಲಯದ ಮಾರ್ಪಡಿಸಿದ ಚಿತ್ರವೊಂದನ್ನು ಹಂಚಿಕೊಂಡಿದ್ದರು. ಆ ಚಿತ್ರದಲ್ಲಿ ಗ್ರಂಥಾಲಯದ ಮೇಲ್ಭಾಗದಲ್ಲಿ ದೊಡ್ಡ ಕಸದ ರಾಶಿಯಿರುವಂತೆ ಹಾಗೂ ಸುತ್ತಮುತ್ತ ನಿರ್ಜನ ಪ್ರದೇಶವಿರುವಂತೆ ತೋರಿಸಲಾಗಿತ್ತು. "ಇನ್ನೂ ಹತ್ತು ವರ್ಷಗಳಲ್ಲಿ ಒಬಾಮಾ ಗ್ರಂಥಾಲಯ ಅಮೆರಿಕವನ್ನು ದ್ವೇಷಿಸುವವರ ಮೆಕ್ಕಾ ಆಗಲಿದೆ" ಎಂದು ಟ್ರಂಪ್ ಆಗ ಬರೆದುಕೊಂಡಿದ್ದರು.
ಭಾನುವಾರ ಟ್ರಂಪ್ ಹಂಚಿಕೊಂಡ ಇನ್ನೊಂದು ಪೋಸ್ಟ್ ಕೂಡ ಗಮನ ಸೆಳೆದಿದೆ. ಅದರಲ್ಲಿ ಇಟಲಿಯ ಪ್ರಧಾನಿ ಜಾರ್ಜಿಯಾ ಮೆಲೋನಿ ಟ್ರಂಪ್ ಅವರತ್ತ ನಗುತ್ತಾ ನೋಡುತ್ತಿರುವ ಹಳೆಯ ಚಿತ್ರವನ್ನು ಹಂಚಿಕೊಂಡು, ಅದರ ಮೇಲೆ "RESTRAINING ORDER NEEDED" ಎಂಬ ಬರಹವನ್ನು ಸೇರಿಸಿದ್ದಾರೆ. ಈ ಪೋಸ್ಟ್ ಕೂಡ ಹೊಸ ರಾಜತಾಂತ್ರಿಕ ವಿವಾದಕ್ಕೆ ಕಾರಣವಾಗುವ ಸಾಧ್ಯತೆ ಇದೆ.
ಈ ಹಿಂದೆ ಜಿ-7 ಶೃಂಗಸಭೆಯಲ್ಲಿ ಮೆಲೋನಿ ತಮ್ಮೊಂದಿಗೆ ಮತ್ತೆ ಮತ್ತೆ ಫೋಟೋ ತೆಗೆಸಿಕೊಳ್ಳಲು ಮನವಿ ಮಾಡಿದ್ದರು ಎಂದು ಟ್ರಂಪ್ ಹೇಳಿಕೆ ನೀಡಿದ್ದರು. ಆದರೆ, ಆ ಆರೋಪವನ್ನು ಮೆಲೋನಿ ಸಂಪೂರ್ಣವಾಗಿ ತಳ್ಳಿಹಾಕಿ, "ಅದು ಸಂಪೂರ್ಣ ಸುಳ್ಳು. ನಾನು ಅಥವಾ ಇಟಲಿ ಯಾರ ಮುಂದೆಯೂ ಬೇಡಿಕೊಳ್ಳುವುದಿಲ್ಲ" ಎಂದು ಪ್ರತಿಕ್ರಿಯಿಸಿದ್ದರು. ಟ್ರಂಪ್ ಅವರ ಹೇಳಿಕೆಯ ನಂತರ ಇಟಲಿಯ ವಿದೇಶಾಂಗ ಸಚಿವ ಆಂಟೋನಿಯೊ ತಜಾನಿ ತಮ್ಮ ಅಮೆರಿಕ ಪ್ರವಾಸವನ್ನೂ ರದ್ದುಗೊಳಿಸಿದ್ದರು.
ಒಬಾಮಾ ದಂಪತಿಯನ್ನು ಗುರಿಯಾಗಿಸಿಕೊಂಡಿರುವ ಟ್ರಂಪ್ ಅವರ ಇತ್ತೀಚಿನ ಪೋಸ್ಟ್ ಮತ್ತೆ ಸಾಮಾಜಿಕ ಜಾಲತಾಣಗಳಲ್ಲಿ ತೀವ್ರ ಚರ್ಚೆಗೆ ಕಾರಣವಾಗಿದ್ದು, ಜನಾಂಗೀಯತೆ, ರಾಜಕೀಯ ದ್ವೇಷ ಮತ್ತು ಸಾರ್ವಜನಿಕ ಸಂವಾದದ ಮಟ್ಟದ ಕುರಿತು ಹೊಸ ವಿವಾದಕ್ಕೆ ನಾಂದಿ ಹಾಡಿದೆ.
