ವಾಷಿಂಗ್ಟನ್: ಜೆಫ್ರಿ ಎಪ್ಸ್ಟೀನ್ ಪ್ರಕರಣದ ದಾಖಲೆಗಳನ್ನು ಸಾರ್ವಜನಿಕವಾಗಿ ಬಿಡುಗಡೆ ಮಾಡುವಲ್ಲಿ ಮತ್ತು ಅದರ ಸಂವಹನ ತಂತ್ರದಲ್ಲಿ ಟ್ರಂಪ್ ಆಡಳಿತವು "ಸಂಪೂರ್ಣವಾಗಿ ಎಡವಿದೆ" ಎಂದು ಅಮೆರಿಕದ ಉಪಾಧ್ಯಕ್ಷ ಜೆಡಿ ವ್ಯಾನ್ಸ್ ಬಹಿರಂಗವಾಗಿ ಒಪ್ಪಿಕೊಂಡಿದ್ದಾರೆ.
ಪ್ರಸಿದ್ಧ 'ದಿ ಜೋ ರೋಗನ್ ಎಕ್ಸ್ಪೀರಿಯನ್ಸ್' ಪಾಡ್ಕಾಸ್ಟ್ನಲ್ಲಿ ಮಾತನಾಡಿದ ಅವರು, ಈ ಬಹುನಿರೀಕ್ಷಿತ ದಾಖಲೆಗಳ ಬಿಡುಗಡೆಯು ಶ್ವೇತಭವನದ ಪಾಲಿಗೆ ಸಾರ್ವಜನಿಕ ಸಂಪರ್ಕದ (PR) ದೊಡ್ಡ ವಿಫಲತೆಯಾಗಿ ಮಾರ್ಪಟ್ಟಿದೆ ಎಂದು ಒಪ್ಪಿಕೊಂಡರು.
"ಎಪ್ಸ್ಟೀನ್ ಫೈಲ್ಸ್ ಬಿಡುಗಡೆಯನ್ನು ನಾವು ಸರಿಯಾಗಿ ನಿಭಾಯಿಸಿಲ್ಲ ಎಂದು ಜನರು ಹೇಳುವುದಾದರೆ, ಅದನ್ನು ನಾನು ಒಪ್ಪಿಕೊಳ್ಳುತ್ತೇನೆ. ನಾವು ಖಂಡಿತವಾಗಿಯೂ ಇದರಲ್ಲಿ ತಪ್ಪು ಮಾಡಿದ್ದೇವೆ, ವಿಶೇಷವಾಗಿ ಇದರ ಸಂವಹನ ಮತ್ತು ಪ್ರಚಾರದ ವಿಷಯದಲ್ಲಿ ದೊಡ್ಡ ಎಡವಟ್ಟಾಗಿದೆ" ಎಂದು ನೇರವಾಗಿ ಹೇಳಿದರು.
ಈ ಗೊಂದಲಕ್ಕೆ ಮಾಜಿ ಅಟಾರ್ನಿ ಜನರಲ್ ಪಾಮ್ ಬೊಂಡಿ ಅವರ ಅತಿಯಾದ ಪ್ರಚಾರವೇ ಕಾರಣ. ಬೊಂಡಿ ಅವರು "ಎಪ್ಸ್ಟೀನ್ ಫೈಲ್ಸ್: ಹಂತ 1" ಎಂಬ ಬೈಂಡರ್ಗಳನ್ನು ತೋರಿಸುತ್ತಾ, ತಮ್ಮ ಮೇಜಿನ ಮೇಲೆ 'ಕ್ಲೈಂಟ್ ಲಿಸ್ಟ್' ಇದೆ ಎಂದು ಸಾರಿದ್ದರು. ಆದರೆ, ಬಿಡುಗಡೆಯಾದ ಫೈಲ್ಗಳಲ್ಲಿ ಹೆಚ್ಚಿನ ಭಾಗವನ್ನು ಕಪ್ಪು ಮಸಿಯಿಂದ (redacted) ಮುಚ್ಚಲಾಗಿದ್ದು, ಸಾರ್ವಜನಿಕರಲ್ಲಿ ತೀವ್ರ ಅಸಮಾಧಾನ ಮೂಡಿಸಿತ್ತು.
ನಮ್ಮ ಸರ್ಕಾರ ಯಾರನ್ನೂ ರಕ್ಷಿಸಲು ಅಥವಾ ಯಾವುದೇ ಸತ್ಯವನ್ನು ಮುಚ್ಚಿಡಲು ಪ್ರಯತ್ನಿಸುತ್ತಿಲ್ಲ. ದಾಖಲೆಗಳನ್ನು ಹಂತ ಹಂತವಾಗಿ ಬಿಡುಗಡೆ ಮಾಡುವ ಬದಲು ಆರಂಭದಲ್ಲೇ ಸಂಪೂರ್ಣವಾಗಿ ಸಾರ್ವಜನಿಕರ ಮುಂದೆ ಇಡಬೇಕಿತ್ತು. ಅದನ್ನು ಮಾಡದ ಕಾರಣ ಅನಗತ್ಯ ಅನುಮಾನಗಳು, ಊಹಾಪೋಹಗಳು ಮತ್ತು ಸರ್ಕಾರದ ಮೇಲಿನ ಅವಿಶ್ವಾಸ ಹೆಚ್ಚಾಯಿತು ಎಂದು ಅಭಿಪ್ರಾಯಪಟ್ಟರು.
"ಎಪ್ಸ್ಟೀನ್ ದಾಖಲೆಗಳ ವಿಚಾರದಲ್ಲಿ ನಾವು ಸಂವಹನದ ದೃಷ್ಟಿಯಿಂದ ತಪ್ಪು ಮಾಡಿದ್ದೇವೆ. ಇದನ್ನು ನಾವು ಒಪ್ಪಿಕೊಳ್ಳಲೇಬೇಕು. ಆದರೆ, ನಾವು ಏನನ್ನಾದರೂ ಮುಚ್ಚಿಡಲು ಈ ರೀತಿ ಮಾಡಿದ್ದೇವೆ ಎಂಬುದು ಸತ್ಯವಲ್ಲ," ಎಂದು ತಿಳಿಸಿದರು.
ಎಪ್ಸ್ಟೀನ್ ಪ್ರಕರಣದ ತನಿಖೆ ಹಾಗೂ ದಾಖಲೆಗಳ ಬಿಡುಗಡೆ ಹಲವು ತಿಂಗಳುಗಳಿಂದ ಅಮೆರಿಕದಲ್ಲಿ ರಾಜಕೀಯ ಚರ್ಚೆಯ ಕೇಂದ್ರಬಿಂದುವಾಗಿತ್ತು.
ದಾಖಲೆಗಳಲ್ಲಿ ಪ್ರಮುಖ ರಾಜಕಾರಣಿಗಳು, ಉದ್ಯಮಿಗಳು ಮತ್ತು ಪ್ರಭಾವಿ ವ್ಯಕ್ತಿಗಳ ಹೆಸರುಗಳು ಇರಬಹುದೆಂಬ ಊಹಾಪೋಹಗಳು ಹರಿದಾಡಿದ್ದರಿಂದ ಸಾರ್ವಜನಿಕರಲ್ಲಿ ಅಪಾರ ಕುತೂಹಲ ಉಂಟಾಗಿತ್ತು.
ಈ ಹಿನ್ನೆಲೆಯಲ್ಲಿ ಮಾಜಿ ಅಟಾರ್ನಿ ಜನರಲ್ ಪ್ಯಾಮ್ ಬೊಂಡಿ ಅವರ ಮೇಲೂ ತೀವ್ರ ಟೀಕೆ ವ್ಯಕ್ತವಾಗಿತ್ತು. ತನಿಖೆಗೆ ಸಂಬಂಧಿಸಿದ ಎಪ್ಸ್ಟೀನ್ನ ಹೇಳಲಾದ "ಕ್ಲೈಂಟ್ ಪಟ್ಟಿ" ತಮ್ಮ ಮೇಜಿನ ಮೇಲೆಯೇ ಇದೆ ಎಂದು ಅವರು ಹಿಂದೆ ಹೇಳಿದ್ದರಿಂದ, ಶೀಘ್ರದಲ್ಲೇ ಮಹತ್ವದ ಬಹಿರಂಗವಾಗಲಿದೆ ಎಂಬ ನಿರೀಕ್ಷೆ ಹೆಚ್ಚಾಗಿತ್ತು.
ಆದರೆ, ನಂತರ ಬಿಡುಗಡೆಯಾದ ದಾಖಲೆಗಳಲ್ಲಿ ಹೊಸದಾಗಿ ಬಹಿರಂಗವಾಗುವಂತಹ ಮಹತ್ವದ ಮಾಹಿತಿಗಿಂತ, ಈಗಾಗಲೇ ಸಾರ್ವಜನಿಕ ವಲಯದಲ್ಲಿದ್ದ ಹಲವು ದಾಖಲೆಗಳೇ ಹೆಚ್ಚಾಗಿ ಇದ್ದವು. ಇದರಿಂದ ಬೊಂಡಿ ಅವರ ಹೇಳಿಕೆಗಳು ಹಾಗೂ ಸರ್ಕಾರದ ಕಾರ್ಯವೈಖರಿ ಪ್ರಶ್ನೆಗೆ ಗುರಿಯಾಯಿತು.
ಈ ಕುರಿತು ಪ್ರತಿಕ್ರಿಯಿಸಿದ ಜೆಡಿ ವ್ಯಾನ್ಸ್, ಪ್ಯಾಮ್ ಬೊಂಡಿ ವಿರುದ್ಧ ಯಾವುದೇ ದುರುದ್ದೇಶದ ಆರೋಪ ಮಾಡಬಾರದು. "ನನಗೆ ಪ್ಯಾಮ್ ಚೆನ್ನಾಗಿ ಪರಿಚಯ. ಅವರು ಕೆಟ್ಟ ಉದ್ದೇಶದಿಂದ ಏನೂ ಮಾಡಿಲ್ಲ. ಆ ಸಮಯದ ರಾಜಕೀಯ ಪರಿಸ್ಥಿತಿಗೆ ಪ್ರತಿಕ್ರಿಯಿಸುವ ಪ್ರಯತ್ನದಲ್ಲಿ, ನಮ್ಮ ಬಳಿ ಇದ್ದ ಮಾಹಿತಿಯ ಪ್ರಮಾಣವನ್ನು ಅವರು ಸ್ವಲ್ಪ ಹೆಚ್ಚಾಗಿ ಹೇಳಿಬಿಟ್ಟರು. ಅದರಿಂದ ನಿರೀಕ್ಷೆಗಳು ಹೆಚ್ಚಾದವು," ಎಂದು ತಿಳಿಸಿದರು.
ಇದೇ ವೇಳೆ, 'ದಿ ಎಪ್ಸ್ಟೀನ್ ಫೈಲ್ಸ್: ಫೇಸ್ 1' ಹಾಗೂ 'ಡೀಕ್ಲಾಸಿಫೈಡ್' ಎಂಬ ಹೆಸರಿನ ಕಡತಗಳನ್ನು ಕೆಲವು ಸಂಪ್ರದಾಯವಾದಿ ವಿಮರ್ಶಕರು ಮತ್ತು ಸಾಮಾಜಿಕ ಜಾಲತಾಣದ ಪ್ರಭಾವಿಗಳಿಗೆ ಹಂಚಿದ್ದರೂ, ಅದರಲ್ಲಿದ್ದ ಬಹುತೇಕ ದಾಖಲೆಗಳು ಈಗಾಗಲೇ ಸಾರ್ವಜನಿಕರಿಗೆ ಲಭ್ಯವಿದ್ದವು ಎಂಬುದು ನಂತರ ಬೆಳಕಿಗೆ ಬಂದಿತ್ತು. ಇದೂ ಆಡಳಿತದ ವಿಶ್ವಾಸಾರ್ಹತೆಗೆ ಧಕ್ಕೆಯಾಯಿತು.
ಜೆಫ್ರಿ ಎಪ್ಸ್ಟೀನ್ ಪ್ರಕರಣದ ದಾಖಲೆಗಳ ಸಂಪೂರ್ಣ ಬಹಿರಂಗಪಡಿಸುವಂತೆ ರಿಪಬ್ಲಿಕನ್ ಮತ್ತು ಡೆಮಾಕ್ರಾಟ್ ಪಕ್ಷಗಳ ಸದಸ್ಯರಿಂದಲೂ ನಿರಂತರ ಒತ್ತಡ ವ್ಯಕ್ತವಾಗಿತ್ತು. ಅಂತಿಮವಾಗಿ ಅಮೆರಿಕ ಕಾಂಗ್ರೆಸ್ ನ್ಯಾಯಾಂಗ ಇಲಾಖೆಗೆ ಹೆಚ್ಚಿನ ದಾಖಲೆಗಳನ್ನು ಬಿಡುಗಡೆ ಮಾಡುವಂತೆ ಕಾನೂನುಬದ್ಧವಾಗಿ ಸೂಚನೆ ನೀಡಿತು.
ಅದರಂತೆ ಕಳೆದ ಡಿಸೆಂಬರ್ನಲ್ಲಿ ಅಮೆರಿಕ ನ್ಯಾಯಾಂಗ ಇಲಾಖೆ ಹಲವು ದಾಖಲೆಗಳನ್ನು ಬಿಡುಗಡೆ ಮಾಡಿತು. ಅವುಗಳಲ್ಲಿ ಛಾಯಾಚಿತ್ರಗಳು, ಕರೆಗಳ ದಾಖಲೆಗಳು, ಗ್ರ್ಯಾಂಡ್ ಜ್ಯೂರಿ ಸಾಕ್ಷ್ಯಗಳು ಹಾಗೂ ವಿಚಾರಣೆಯ ಸಂದರ್ಶನಗಳ ಪ್ರತಿಗಳು ಸೇರಿದ್ದವು. ಆದರೆ,ಭದ್ರತಾ ಹಾಗೂ ಕಾನೂನು ಕಾರಣಗಳನ್ನು ಉಲ್ಲೇಖಿಸಿ ಹಲವು ಭಾಗಗಳನ್ನು ಕಪ್ಪು ಮಸಿಯಿಂದ ಮುಚ್ಚಲಾಗಿತ್ತು. ಜೊತೆಗೆ ಉಳಿದ ದಾಖಲೆಗಳ ಬಿಡುಗಡೆಗೂ ವಿಳಂಬವಾಗಿದ್ದರಿಂದ ಸರ್ಕಾರ ಸಂಪೂರ್ಣ ಪಾರದರ್ಶಕವಾಗಿ ನಡೆದುಕೊಳ್ಳುತ್ತಿಲ್ಲ ಎಂಬ ಆರೋಪಗಳು ಮತ್ತಷ್ಟು ಬಲಗೊಂಡವು.
ಈ ವಿವಾದದ ನಡುವೆ ಜೆಡಿ ವ್ಯಾನ್ಸ್ ನೀಡಿರುವ ಹೇಳಿಕೆ ಟ್ರಂಪ್ ಆಡಳಿತವು ಎಪ್ಸ್ಟೀನ್ ದಾಖಲೆಗಳ ನಿರ್ವಹಣೆಯಲ್ಲಿ ಸಂವಹನದ ವೈಫಲ್ಯ ಉಂಟಾಗಿರುವುದನ್ನು ಮೊದಲ ಬಾರಿಗೆ ಬಹಿರಂಗವಾಗಿ ಒಪ್ಪಿಕೊಂಡಿರುವ ಪ್ರಮುಖ ಬೆಳವಣಿಗೆಯಾಗಿ ಪರಿಗಣಿಸಲಾಗುತ್ತಿದೆ. ಆದರೆ, ಸಾಕ್ಷ್ಯಗಳನ್ನು ಉದ್ದೇಶಪೂರ್ವಕವಾಗಿ ಮುಚ್ಚಿಡಲಾಗಿದೆ ಎಂಬ ಆರೋಪವನ್ನು ಅವರು ಸ್ಪಷ್ಟವಾಗಿ ತಳ್ಳಿಹಾಕಿದ್ದಾರೆ.
ಡೊನಾಲ್ಡ್ ಟ್ರಂಪ್ ಅವರ ಎರಡನೇ ಅವಧಿಯ ಆಡಳಿತಕ್ಕೆ ಜೆಫ್ರಿ ಎಪ್ಸ್ಟೀನ್ ಪ್ರಕರಣದ ಫೈಲ್ಗಳು ದೊಡ್ಡ ರಾಜಕೀಯ ತಲೆನೋವಾಗಿ ಪರಿಣಮಿಸಿವೆ. ಸಂಪೂರ್ಣ ಪಾರದರ್ಶಕತೆಯನ್ನು ನಿರೀಕ್ಷಿಸಿದ್ದ ಡೆಮೋಕ್ರಾಟ್ಗಳು ಮತ್ತು ಟ್ರಂಪ್ ಅವರ ಸ್ವಂತ ಬೆಂಬಲಿಗರಿಂದಲೇ (MAGA base) ತೀವ್ರ ಆಕ್ರೋಶ ವ್ಯಕ್ತವಾಗಿತ್ತು.
ಡಿಸೆಂಬರ್ ಅಂತ್ಯದಲ್ಲಿ ನ್ಯಾಯಾಂಗ ಇಲಾಖೆಯು ಕಾಲ್ ಲಾಗ್ಗಳು, ಫೋಟೋಗಳು ಮತ್ತು ಗ್ರ್ಯಾಂಡ್ ಜ್ಯೂರಿ ಸಾಕ್ಷ್ಯಗಳನ್ನು ಬಿಡುಗಡೆ ಮಾಡಲು ಪ್ರಾರಂಭಿಸಿತಾದರೂ, ನಿಧಾನಗತಿಯ ಪ್ರಕ್ರಿಯೆ ಮತ್ತು ದಾಖಲೆಗಳ ಮೇಲಿನ ಸೆನ್ಸಾರ್ಶಿಪ್ ಸಾರ್ವಜನಿಕರಲ್ಲಿ ತೀವ್ರ ಅಪನಂಬಿಕೆಯನ್ನು ಹುಟ್ಟುಹಾಕಿತ್ತು.
