ಅಗರ್ತಲಾ: ಗಡಿ ರಕ್ಷಣಾ ಪಡೆ (ಬಿ ಎಸ್ ಎಫ್), ಸ್ವಾತಂತ್ರ್ಯ ದಿನಾಚರಣೆಯ ಅಂಗವಾಗಿ ಬುಧವಾರ ಗಡಿಯಲ್ಲಿ ಸುಮಾರು ೪ ಲಕ್ಷ ಗಿಡಗಳನ್ನು ನೆಟ್ಟಿದೆ.
"ಭಾರತದ ಪೂರ್ವವ ಬಾಂಗ್ಲಾದೇಶ ಮತ್ತು ಉತ್ತರದ ಪಾಕಿಸ್ತಾನ ಗಡಿಯಲ್ಲಿ, ಬುಧವಾರ ತನ್ನ ಮುಖ್ಯ ಕಚೇರಿಗಳ ಆಸುಪಾಸಿನಲ್ಲಿ ಸುಮಾರು ೪೦೦೦೦೦ ಸಸಿಗಳನ್ನು ಬೆಳಗ್ಗೆ ೧೦ ಘಂಟೆಗೆ ಸುಮಾರು ೩೦ ನಿಮಿಷಗಳ ಸಮಯದಲ್ಲಿ ನೆಡಲಾಗಿದೆ" ಎಂದು ಬಿ ಎಸ್ ಎಫ್ ವಕ್ತಾರ ಡಿ ಎಸ್ ಭಾಟಿ ತಿಳಿಸಿದ್ದಾರೆ.
"ಈ ಸಸಿ ನೆಡುವ ಕಾರ್ಯಕ್ರಮ ಸ್ವಾತಂತ್ರ್ಯ ದಿನಾಚರಣೆ ಅಂಗವಾಗಿ ನಡೆಸಲಾಗಿದೆ" ಎಂದು ಕೂಡ ಅವರು ತಿಳಿಸಿದ್ದಾರೆ.
ಬಿ ಎಸ್ ಎಫ್ ಕಳೆದ ವರ್ಷ ೩೦ ನಿಮಿಷಗಳಲ್ಲಿ ೩೦೯೦೦೦ ಸಸಿಗಳನ್ನು ನೆಟ್ಟು ಲಿಮ್ಕಾ ಬುಕ್ ಆಫ್ ರೆಕಾರ್ಡ್ಸ್ ಸೇರಿಕೊಂಡಿತ್ತು, ಈಗ ತನ್ನದೇ ದಾಖಲೆಯನ್ನು ಮುರಿದಿದೆ.
ಜಾಗತಿಕ ತಾಪಮಾನ ಏರಿಕೆಯನ್ನು ತಡೆಯಲು ತನ್ನದೇ ವಿಭಿನ್ನ ರೀತಿಯಲ್ಲಿ ಕೊಡುಗೆ ನೀಡುವ ಸಲುವಾಗಿ ಬಿ ಎಸ್ ಎಫ್ ಆಗಸ್ಟ್ ೧೫ ೨೦೧೩ ರಲ್ಲಿ 'ನನ್ನ ಭೂಮಿ, ನನ್ನ ಕರ್ತವ್ಯ' ಎಂಬ ಹೆಸರಿನ ಕಾರ್ಯಕ್ರಮದಡಿ ಸಸಿ ನೆಡುವ ಅಭಿಯಾನಕ್ಕೆ ಚಾಲನೆ ನೀಡಿತ್ತು. ೨೦೧೩ರಿಂದ ಒಂದೂವರೆ ಕೋಟಿಗೂ ಹೆಚ್ಚು ಸಸಿಗಳನ್ನು ನೆಡಲಾಗಿದೆ.
Advertisement