ಕೈಗೆಟುಕುವ ಬೆಲೆಯ ಮೊಬೈಲ್‌ಗಳ ಕಾಲ ಮುಗಿದುಹೋಯಿತಾ? ಯಾಕಂದ್ರೆ, ಇತ್ತೀಚಿನ ದಿನಗಳಲ್ಲಿ ಸ್ಮಾರ್ಟ್‌ಫೋನ್ ಖರೀದಿಸುವವರ ಒಟ್ಟು ಸಂಖ್ಯೆಯಲ್ಲಿ ಗಣನೀಯ ಕುಸಿತ ಕಂಡುಬಂದಿದ್ದರೂ, ಜಾಗತಿಕ ಮೊಬೈಲ್ ತಯಾರಿಕಾ ಕಂಪನಿಗಳ ಒಟ್ಟು ಆದಾಯ ಮಾತ್ರ ಹೊಸ ದಾಖಲೆ ಬರೆಯುತ್ತಿದೆ! ಹೌದು, ಕಡಿಮೆ ಫೋನ್‌ಗಳು ಮಾರಾಟವಾಗುತ್ತಿದ್ದರೂ ಬ್ರ್ಯಾಂಡ್‌ಗಳು ಇಷ್ಟೊಂದು ಭಾರಿ ಗಳಿಕೆ ಮಾಡುತ್ತಿರುವುದು ಹೇಗೆ ಎಂಬ ಆಶ್ಚರ್ಯ ಎಲ್ಲರಲ್ಲೂ ಮೂಡಿದೆ. ಹಾಗಾದ್ರೆ, ಇದರ ಹಿಂದೆ ಮೊಬೈಲ್ ಕಂಪನಿಗಳ ಪ್ರೀಮಿಯಂ ತಂತ್ರಗಾರಿಕೆ ಅಡಗಿದೆಯಾ ಅಥವಾ ಹೆಚ್ಚುತ್ತಿರುವ ಬಿಡಿಭಾಗಗಳ ಬೆಲೆ ಕಾರಣವಾ? ಮೊಬೈಲ್ ಜಗತ್ತಿನಲ್ಲಿ ಸದ್ದಿಲ್ಲದೆ ನಡೆಯುತ್ತಿರುವ ಈ ಅಚ್ಚರಿಯ ಬದಲಾವಣೆ ಮತ್ತು ಮಾರುಕಟ್ಟೆಯ ಇತ್ತೀಚಿನ ವರದಿಯ ಅಸಲಿ ಸತ್ಯ ಇಲ್ಲಿದೆ:
ಕೌಂಟರ್‌ಪಾಯಿಂಟ್ ರಿಸರ್ಚ್ ಸಂಸ್ಥೆಯ ಇತ್ತೀಚಿನ ವರದಿಗಳ ಪ್ರಕಾರ, ಇತ್ತೀಚಿನ ತ್ರೈಮಾಸಿಕದಲ್ಲಿ ಜಾಗತಿಕ ಸ್ಮಾರ್ಟ್‌ಫೋನ್ ಮಾರಾಟ ಪ್ರಮಾಣವು ಶೇಕಡಾ 19 ರಷ್ಟು ಕುಸಿದಿದ್ದರೆ, ಭಾರತದಲ್ಲಿ ಇದು ಶೇಕಡಾ 20 ಕ್ಕಿಂತಲೂ ಹೆಚ್ಚು ಕುಸಿದು ದಶಕದ ಕನಿಷ್ಠ ಮಟ್ಟಕ್ಕೆ ತಲುಪಿದೆ. ಆದರೆ, ಇದೇ ಅವಧಿಯಲ್ಲಿ ಜಾಗತಿಕ ಸ್ಮಾರ್ಟ್‌ಫೋನ್ ಮಾರುಕಟ್ಟೆಯ ಒಟ್ಟು ಆದಾಯವು ಶೇ. 3 ರಷ್ಟು ಹೆಚ್ಚಿ 114 ಬಿಲಿಯನ್ ಡಾಲರ್‌ಗೆ ತಲುಪಿದೆ.
ಸ್ಮಾರ್ಟ್‌ಫೋನ್ ಸಾಗಣೆ ಕಡಿಮೆಯಾಗುತ್ತಿದ್ದರೂ ಆದಾಯ ಹೇಗೆ ಹೆಚ್ಚುತ್ತಿದೆ?
ಗ್ರಾಹಕರು ಈಗ ಅಗ್ಗದ ಬಜೆಟ್ ಫೋನ್‌ಗಳನ್ನು ಖರೀದಿಸುವ ಬದಲಾಗಿ ದುಬಾರಿ ಬೆಲೆಯ ಪ್ರೀಮಿಯಂ ಮತ್ತು ಫ್ಲ್ಯಾಗ್‌ಶಿಪ್ ಸ್ಮಾರ್ಟ್‌ಫೋನ್‌ಗಳನ್ನು ಖರೀದಿಸಲು ಹೆಚ್ಚು ಆಸಕ್ತಿ ತೋರಿಸುತ್ತಿದ್ದಾರೆ. ಜೊತೆಗೆ, ಜನರು ಒಂದೇ ಫೋನ್ ಅನ್ನು 3 ರಿಂದ 4 ವರ್ಷಗಳವರೆಗೆ ದೀರ್ಘಕಾಲ ಬಳಸಲು ಬಯಸುತ್ತಿರುವುದರಿಂದ, ಹೆಚ್ಚು ಹಣ ನೀಡಿಯಾದರೂ ಉತ್ತಮ ಗುಣಮಟ್ಟದ ಫೋನ್ ಕೊಳ್ಳುತ್ತಿದ್ದಾರೆ. ಇದರ ನೇರ ಲಾಭವನ್ನು ಆಪಲ್ ಮತ್ತು ಸ್ಯಾಮ್‌ಸಂಗ್ ನಂತಹ ಕಂಪನಿಗಳು ಪಡೆಯುತ್ತಿವೆ. ಅದರಲ್ಲೂ, ಆಪಲ್ ಸಂಸ್ಥೆಯು ಜಾಗತಿಕ ಮೊಬೈಲ್ ಮಾರುಕಟ್ಟೆಯ ಒಟ್ಟು ಆದಾಯದಲ್ಲಿ ಬರೋಬ್ಬರಿ ಶೇ. 50 ರಷ್ಟು ಪಾಲನ್ನು ಹೊಂದಿದ್ದು, ತನ್ನ ಇತಿಹಾಸದಲ್ಲೇ ಗರಿಷ್ಠ ಆದಾಯ ದಾಖಲಿಸಿದೆ.
ಹಾಗಾದ್ರೆ, ಪ್ರಮುಖ ಸ್ಮಾರ್ಟ್‌ಫೋನ್ ಬ್ರ್ಯಾಂಡ್‌ಗಳ ಕಾರ್ಯಕ್ಷಮತೆ ಹೇಗಿತ್ತು?
ಆಪಲ್: ಸೆಪ್ಟೆಂಬರ್ ತ್ರೈಮಾಸಿಕದಲ್ಲಿ ಸಾರ್ವಕಾಲಿಕ ದಾಖಲೆಯ ಆದಾಯ ಗಳಿಸಿದೆ. ವಾರ್ಷಿಕವಾಗಿ ಶೇಕಡಾ 17 ರಷ್ಟು ಬೆಳವಣಿಗೆಯೊಂದಿಗೆ ಜಾಗತಿಕ ಸ್ಮಾರ್ಟ್‌ಫೋನ್ ಆದಾಯದಲ್ಲಿ ಶೇಕಡಾ 50 ರಷ್ಟು ಪಾಲನ್ನು ಹೊಂದಿದೆ. ಐಫೋನ್ 17 ಮತ್ತು ಐಫೋನ್ 18 ಪ್ರೊ ಸರಣಿಯ ಬೇಡಿಕೆಯಿಂದಾಗಿ ಆಪಲ್ ಬ್ರ್ಯಾಂಡ್‌ಗಳ ಮಾರಾಟವು ಸ್ಥಿರವಾಗಿ ಮುಂದುವರಿದಿದೆ.
ಸ್ಯಾಮ್‌ಸಂಗ್: ಜಾಗತಿಕ ಆದಾಯದಲ್ಲಿ ಶೇಕಡಾ 19 ರಷ್ಟು ಪಾಲನ್ನು ಹೊಂದುವ ಮೂಲಕ ಎರಡನೇ ಸ್ಥಾನದಲ್ಲಿದೆ. ಆದಾಯವು ಶೇಕಡಾ 14 ರಷ್ಟು ಹೆಚ್ಚಾಗಿದೆ ಮತ್ತು ಸರಾಸರಿ ಮಾರಾಟ ಬೆಲೆ ಶೇಕಡಾ 21 ರಷ್ಟು ಏರಿಕೆಯಾಗಿ 367 ಡಾಲರ್‌ಗೆ ತಲುಪಿದೆ. ಗ್ಯಾಲಕ್ಸಿ ಎಸ್26 ಅಲ್ಟ್ರಾ ಮತ್ತು ಜೆಡ್ ಫೋಲ್ಡ್8 ನಂತಹ ಪ್ರೀಮಿಯಂ ಸಾಧನಗಳ ಕೊಡುಗೆಯಿಂದ ಇದು ಸಾಧ್ಯವಾಗಿದೆ.
ಶಿಯೋಮಿ: ಸರಾಸರಿ ಬೆಲೆಗಳು ಹೆಚ್ಚಿದ್ದರಿಂದ ಮಾರಾಟದ ಇಳಿಕೆಯನ್ನು ಸರಿಹೂಟು ಮಾಡಿಕೊಂಡಿದ್ದು, ಕಂಪನಿಯ ಆದಾಯವು ಸ್ಥಿರವಾಗಿ ಮುಂದುವರಿದಿದೆ.
ಒಪ್ಪೊ ಮತ್ತು ವಿವೋ: ಮಾರಾಟದಲ್ಲಿ ತೀವ್ರ ಕುಸಿತ ಕಂಡುಬಂದಿದ್ದರಿಂದ ಕ್ರಮವಾಗಿ ಶೇಕಡಾ 26 ಮತ್ತು ಶೇಕಡಾ 22 ರಷ್ಟು ಆದಾಯದ ಕುಸಿತವನ್ನು ಅನುಭವಿಸಿವೆ.
ಮುಂದುವರೆದು, ಕೌಂಟರ್‌ಪಾಯಿಂಟ್ ರಿಸರ್ಚ್ ವರದಿಯ ಪ್ರಕಾರ ಸ್ಮಾರ್ಟ್‌ಫೋನ್ ಮಾರುಕಟ್ಟೆಯ 2026 ರ ಡಿಸೆಂಬರ್ ತ್ರೈಮಾಸಿಕದಲ್ಲಿ ಜಾಗತಿಕ ಆದಾಯವು ಸ್ವಲ್ಪ ಕಡಿಮೆಯಾಗುವ ನಿರೀಕ್ಷೆಯಿದೆ. ಯಾಕೆಂದರೆ ಸಾಗಣೆಯ ಪ್ರಮಾಣದಲ್ಲಿನ ಇಳಿಕೆಯು ಸರಾಸರಿ ಮಾರಾಟದ ಬೆಲೆಗಳ ಬೆಳವಣಿಗೆಯನ್ನು ಮೀರಿಸಲಿದೆ. ಇದರೊಂದಿಗೆ, 2027 ರಲ್ಲೂ ಸಹ ಹೆಚ್ಚಿನ ಮೆಮೊರಿ ವೆಚ್ಚಗಳು ಮತ್ತು ಬಿಡಿಭಾಗಗಳ ಹೊರೆಯು ಸ್ಮಾರ್ಟ್‌ಫೋನ್ ತಯಾರಕರ ಮೇಲೆ ನಿರಂತರವಾಗಿ ಒತ್ತಡವನ್ನು ಬೀರುವ ಸಾಧ್ಯತೆಯಿದೆ. ಹಾಗಾಗಿ, ಈ ಸವಾಲುಗಳನ್ನು ಎದುರಿಸಲು ಕಂಪನಿಗಳು ತಮ್ಮ ಫೋನ್ ಮಾದರಿಗಳ ಸಂಖ್ಯೆಯನ್ನು ಕಡಿಮೆ ಮಾಡುವ, ಬೆಲೆಗಳನ್ನು ಮತ್ತಷ್ಟು ಹೆಚ್ಚಿಸುವ ಮತ್ತು ಪ್ರೀಮಿಯಂ ಸಾಧನಗಳ ಉತ್ಪಾದನೆ ಹಾಗೂ ಮಾರಾಟದ ಮೇಲೆ ಹೆಚ್ಚು ಗಮನ ಹರಿಸುವ ಸಾಧ್ಯತೆ ಇದೆ.
ಒಟ್ಟಾರೆಯಾಗಿ, ಸ್ಮಾರ್ಟ್‌ಫೋನ್ ಸಾಗಣೆಗಳಲ್ಲಿನ ಕುಸಿತವು 2026 ಕ್ಕಿಂತ ಸ್ವಲ್ಪ ನಿಧಾನಗತಿಯಲ್ಲಿ ಇರಲಿದೆ ಎಂದು ಅಂದಾಜಿಸಲಾಗಿದ್ದು, ಆದರೂ ಹೆಚ್ಚಿನ ಸರಾಸರಿ ಮಾರಾಟ ಬೆಲೆಗಳು ಆದಾಯದ ಬೆಳವಣಿಗೆಗೆ ಬೆಂಬಲವಾಗಿರಲಿವೆ. ಹಾಗಾಗಿ, ಸ್ಮಾರ್ಟ್‌ಫೋನ್ ತಯಾರಕರು ಕೇವಲ ಬೆಲೆಗಳನ್ನು ಹೆಚ್ಚಿಸುವ ಬದಲು, ತಂತ್ರಜ್ಞಾನ ಮತ್ತು ಸಾಧನಗಳನ್ನು ಸುಧಾರಿಸಲು ಈ ಉಳಿತಾಯವನ್ನು ಬಳಸಬಹುದಾದ ಕಾಲಾವಕಾಶವು 2028 ರಲ್ಲಿ ಮಾತ್ರ ಬರಬಹುದು ಎಂದು ವರದಿಯು ನಿರೀಕ್ಷಿಸಿದೆ.