ಮುಂಬೈ: ನನ್ನ ಅಂಡಾಣುವನ್ನು ನಾನು ಸಂರಕ್ಷಿಸಿಟ್ಟಿದ್ದು, ನನಗೆ ಯಾವಾಗ ಮಗು ಬೇಕು ಎನಿಸುತ್ತದೆಯೋ ಆಗ ಮಗು ಮಾಡ್ಕೋತಿನಿ ಎಂದು ಬಾಲಿವುಡ್ ನಟಿ ಮೋನಾ ಸಿಂಗ್ ಹೇಳಿದ್ದಾರೆ.
ನಟಿ ಮೋನಾ ಸಿಂಗ್ ಕಳೆದ ವರ್ಷ ಫಿಲ್ಮ್‌ಮೇಕರ್ ಶ್ಯಾಮ್ ರಾಜಗೋಪಾಲನ್ ಜೊತೆಗೆ ವೈವಾಹಿಕ ಜೀವನಕ್ಕೆ ಕಾಲಿಟ್ಟಿದ್ದರು. ಇದೀಗ ತಮ್ಮ ಮಗುವಿನ ವಿಚಾರದ ಹೇಳಿಕೆ ನೀಡಿ ಸುದ್ದಿಯಾಗಿದ್ದಾರೆ. ಖಾಸಗಿ ಮಾಧ್ಯಮದೊಂದಿಗೆ ಸಂದರ್ಶನವೊಂದರಲ್ಲಿ ಮಾತನಾಡಿರುವ ನಟಿ ಮೋನಾ ಸಿಂಗ್, 'ಮಗು ಮಾಡಿಕೊಳ್ಳಲು ಕಾತುರ, ಗಡಿಬಿಡಿ ಇಲ್ಲ. ಈಗಾಗಲೇ ನನ್ನ ಅಂಡಾಣುವಿನ ಸಂರಕ್ಷಣೆ ಮಾಡಿಟ್ಟುಕೊಂಡಿದ್ದೇನೆ. '34 ವರ್ಷವಿದ್ದಾಗಲೇ ನಾನು ಅಂಡಾಣು ಸಂಗ್ರಹಣೆ ಮಾಡಿಕೊಂಡಿದ್ದೇನೆ. ನಾನೀಗ ಫ್ರೀ. ನನಗೆ ಈಗ ಮದುವೆಯಾಗಿದೆ. ನನ್ನ ಸಂಗಾತಿ ಜೊತೆಗೆ ಲೋಕ ಸುತ್ತುವುದು, ಎಂಜಾಯ್ ಮಾಡೋದು ನನ್ನ ಗುರಿ. ಅದಿನ್ನೂ ಪೂರ್ತಿ ಆಗಿಲ್ಲ. ನನ್ನ ಸ್ನೇಹಿತರು, ಕುಟುಂಬದವರ ಜೊತೆ ಸಾಕಷ್ಟು ಬಾರಿ ತಿರುಗಾಡಿದ್ದೇನೆ. ಈಗ ನನ್ನ ಗಂಡನ ಜೊತೆ ತಿರುಗಾಡಬೇಕಿದೆ. ನನಗೆ ಮಕ್ಕಳು ಅಂದರೆ ತುಂಬ ಇಷ್ಟ. ಆದರೆ ಈಗ ನನ್ನನ್ನು ಕೇಳಿದರೆ ಮಗು ಮಾಡಿಕೊಳ್ಳಲು ನಾನು ಮಾನಸಿಕವಾಗಿ ಸಿದ್ಧಳಾಗಿಲ್ಲ. ಮುಂದಿನ ದಿನಗಳಲ್ಲಿ ನಾನು ಇದರ ಬಗ್ಗೆ ಯೋಚನೆ ಮಾಡುತ್ತೇನೆ' ಎಂದು ಹೇಳಿದ್ದಾರೆ.
ಇನ್ನು ಅಂಡಾಣು ಸಂರಕ್ಷಣೆ ಕುರಿತು ಕೇಳಿದ ಪ್ರಶ್ನೆಗೆ ಉತ್ತರಿಸಿರುವ ಅವರು, 'ಅಂಡಾಣು ಸಂರಕ್ಷಣೆ ಮಾಡಿಕೊಳ್ಳುತ್ತೇನೆ ಎಂದಾಗ ನನ್ನ ತಾಯಿ ತುಂಬ ಖುಷಿಪಟ್ಟರು. ಪುಣೆಯಲ್ಲಿನ ವೈದ್ಯರ ಬಳಿ ನಾನು ಹಾಗೂ ಅಮ್ಮ ಇಬ್ಬರೂ ಹೋದೆವು. ಇದನ್ನು ಮಾಡಲು ನಾನು ಕೆಲ ತಿಂಗಳುಗಳ ಕಾಲ ಕೆಲಸದಿಂದ ದೂರವಿರಬೇಕಿತ್ತು. ಅಂಡಾಣು ಸಂರಕ್ಷಣೆ ಮಾಡಲು 5 ತಿಂಗಳು ಹಿಡಿಯಿತು ಎಂದು ಹೇಳಿದ್ದಾರೆ.