ನವದೆಹಲಿ: 'ಯೇ ಮಾಯಾ ಚೇಸಾವೆ' ಚಿತ್ರದ ಮೂಲಕ ತೆಲುಗು ಚಿತ್ರರಂಗಕ್ಕೆ ಎಂಟ್ರಿ ಕೊಟ್ಟ ಸಮಂತಾ ತಮ್ಮ ಸಹನಟ ನಾಗ ಚೈತನ್ಯ ಅವರನ್ನು ಪ್ರೀತಿಸಿ ಮದುವೆಯಾಗಿದ್ದರು. ಆದರೆ, ಇಬ್ಬರ ನಡುವೆ ಏನೋ ಸರಿಹೋಗದ ಕಾರಣ ವಿಚ್ಛೇದನ ಪಡೆದಿದ್ದರು. ನಾಗ ಚೈತನ್ಯ ಇದೀಗ ನಟಿ ಶೋಭಿತಾ ಧೂಳಿಪಾಲ ಅವರನ್ನು ವಿವಾಹವಾಗಿದ್ದು, ಸಮಂತಾ ಟ್ಯಾಟೂ ವಿಚಾರಕ್ಕೆ ಸುದ್ದಿಯಾಗಿದ್ದಾರೆ.
ಸಮಂತಾ ಇತ್ತೀಚೆಗೆ ತಮ್ಮ ಇನ್‌ಸ್ಟಾಗ್ರಾಂ ಖಾತೆಯಲ್ಲಿ ಹಲವಾರು ಫೋಟೊಗಳನ್ನು ಹಂಚಿಕೊಂಡಿದ್ದು, ಕೈಯಲ್ಲಿನ ಹಚ್ಚೆ ಮಾಯವಾಗಿರುವುದನ್ನು ನೆಟ್ಟಿಗರು ಗಮನಿಸಿದ್ದಾರೆ. ಸಮಂತಾ ಅವರು ಈ ಹಿಂದೆ ತಮ್ಮ ಬಲಗೈನಲ್ಲಿ ಹಾಕಿಸಿದ್ದ ಟ್ಯಾಟೂವನ್ನು ತೆಗೆದುಹಾಕಿದ್ದಾರೆ. ಸಮಂತಾ ಮತ್ತು ನಾಗ ಚೈತನ್ಯ ಅವರು ಒಂದೇ ರೀತಿಯಲ್ಲಿ ಕಾಣುವ ಟ್ಯಾಟೂ ಹಾಕಿಸಿಕೊಂಡಿದ್ದರು.
ಈ ಚಿತ್ರಗಳನ್ನು ಹಂಚಿಕೊಂಡ ರೆಡ್ಡಿಟ್ ಪೋಸ್ಟ್, 'ಸಮಂತಾ ಕೊನೆಗೂ ತಮ್ಮ ಟ್ಯಾಟೂವನ್ನು ತೆಗೆದಿರುವಂತೆ ಕಾಣುತ್ತಿದೆ. ಇದು ನಾಗ ಚೈತನ್ಯ ಅವರ ಜೊತೆ ಹೊಂದಾಣಿಕೆಯಾಗುವ ಟ್ಯಾಟೂ ಆಗಿತ್ತು.. ಇದರ ಅರ್ಥ 'ನಿಮ್ಮ ಸ್ವಂತ ವಾಸ್ತವವನ್ನು ರಚಿಸಿ' ಎಂದಾಗಿತ್ತು ಎಂದು ಬರೆದಿದೆ.
ಈ ಪೋಸ್ಟ್ ಇಂಟರ್ನೆಟ್‌ನಲ್ಲಿ ವೈವಿಧ್ಯಮಯ ಪ್ರತಿಕ್ರಿಯೆಗಳನ್ನು ಪಡೆದಿದೆ. 'ಒಳ್ಳೆಯದು. ಸಂಗಾತಿಯ ಹೆಸರನ್ನು ಎಂದಿಗೂ ಹಚ್ಚೆ ಹಾಕಿಸಿಕೊಳ್ಳಬೇಡಿ ಹುಡುಗರೇ.... ಸಂಬಂಧ ಯಾವಾಗ ಕೊನೆಗೊಳ್ಳುತ್ತದೆ ಎಂದು ನಿಮಗೆ ತಿಳಿದಿರುವುದಿಲ್ಲ ಮತ್ತು ಹಚ್ಚೆ ತೆಗೆಯುವುದು ನೋವಿನ ವಿಷಯ...' ಎಂದು ಬಳಕೆದಾರರೊಬ್ಬರು ಬರೆದಿದ್ದಾರೆ.
ಸಮಂತಾ ಈ ಹಿಂದೆ ನಾಗ ಚೈತನ್ಯ ಅವರೊಂದಿಗೆ ತಮ್ಮ ಮ್ಯಾಚಿಂಗ್ ಟ್ಯಾಟೂದ ಅರ್ಥವನ್ನು ಹಂಚಿಕೊಂಡಿದ್ದರು. 'ನನ್ನ ಟ್ಯಾಟೂ ಅರ್ಥವೆಂದರೆ 'ನಿಮ್ಮ ಸ್ವಂತ ವಾಸ್ತವವನ್ನು ಸೃಷ್ಟಿಸಿ'. ನಾಗ ಚೈತನ್ಯ ಮತ್ತು ನಾನು ಒಟ್ಟಿಗೆ ಹಾಕಿಸಿಕೊಂಡಿದ್ದೇವೆ. ಇದು ನಮಗೆ ನಿಜವಾಗಿಯೂ ವಿಶೇಷವಾಗಿದೆ' ಎಂದಿದ್ದರು.
ಇದಲ್ಲದೆ, ನಟಿ ಪಕ್ಕೆಲುಬಿನ ಬಲಭಾಗದಲ್ಲಿ 'Chay' ಎಂದು ಕೂಡ ಟ್ಯಾಟೂ ಹಾಕಿಸಿಕೊಂಡಿದ್ದರು.
ದೀರ್ಘ ಕಾಲದ ಡೇಟಿಂಗ್ ನಂತರ ಸಮಂತಾ ಮತ್ತು ನಾಗ ಚೈತನ್ಯ 2017 ರಲ್ಲಿ ವಿವಾಹವಾದರು. ಅವರು 2021 ರಲ್ಲಿ ವಿಚ್ಛೇದನ ಪಡೆದರು. ಕಳೆದ ವರ್ಷ ಡಿಸೆಂಬರ್‌ನಲ್ಲಿ, ನಾಗ ಚೈತನ್ಯ ಅವರು ನಟಿ ಶೋಭಿತಾ ಧೂಳಿಪಾಲ ಅವರನ್ನು ವಿವಾಹವಾದರು.