ಬೆಂಗಳೂರು: ಬೆಂಗಳೂರಿನಲ್ಲಿ ಮೊದಲ ಬಾರಿಗೆ ಎಂಬಂತೆ ನಕಲಿ ಅಂತರಾಷ್ಟ್ರೀಯ ಕಾಲ್ ಸೆಂಟರ್ ವೊಂದು ಪತ್ತೆಯಾಗಿದ್ದು, 11 ಮಂದಿಯನ್ನು ಪೊಲೀಸರು ಬಂಧಿಸಿದ್ದಾರೆ.

ಹೌದು.. ಅಮೆರಿಕ ಪ್ರಜೆಗಳ ಬ್ಯಾಂಕ್‌ ವಿವರ ಪಡೆದು ವಂಚಿಸಿದ ಆರೋಪದ ಮೇಲೆ ವೈಟ್‌ಫೀಲ್ಡ್‌ ಮತ್ತು ಮಹದೇವಪುರ ಪ್ರದೇಶದಲ್ಲಿರುವ ಬೆಂಗಳೂರು ಮೂಲದ ನಕಲಿ ಅಂತಾರಾಷ್ಟ್ರೀಯ ಕಾಲ್‌ ಸೆಂಟರ್‌ನ ಎರಡು ಶಾಖೆಗಳ ಮೇಲೆ ವೈಟ್‌ಫೀಲ್ಡ್‌ ವಿಭಾಗದ ಪೊಲೀಸರು ಶುಕ್ರವಾರ ದಾಳಿ ನಡೆಸಿದ್ದಾರೆ. ಗುಜರಾತ್‌ನ ಅಹಮದಾಬಾದ್ ಮೂಲದ 11 ಜನರನ್ನು ಪೊಲೀಸರು ಬಂಧಿಸಿದ್ದು, ಸುಮಾರು 2 ಕೋಟಿ ಮೌಲ್ಯದ 238 ಡೆಸ್ಕ್‌ಟಾಪ್ ಕಂಪ್ಯೂಟರ್‌ಗಳನ್ನು ವಶಪಡಿಸಿಕೊಂಡಿದ್ದಾರೆ. 30 ಮಹಿಳಾ ಸಿಬ್ಬಂದಿ ಸೇರಿದಂತೆ ಸುಮಾರು 61 ಉದ್ಯೋಗಿಗಳನ್ನು ಬಂಧಿಸಲಾಗಿದೆ ಎಂದು ಪೊಲೀಸ್ ಮೂಲಗಳು ತಿಳಿಸಿವೆ.

11 ಮಂದಿ ಬಂಧಿತರನ್ನು ಪ್ರತೀಕ್, ರಿಷಿ ವ್ಯಾಸ್, ಸೈಯದ್, ಪಾರಿಖ್ ಬಿರೇನ್, ಕರಣ್, ಜಿತಿಯಾ ಕಿಶನ್, ಹೆಟ್ ಪಟೇಲ್, ಬಿಹಾಂಗ್, ರಾಜ್ ಇಲಿಹ್ ಸೋನಿ, ವಿಶಾಲ್ ಪರ್ಮಾರ್ ಮತ್ತು ಮಿತೇಶ್ ಗುಪ್ತಾ ಎಂದು ಗುರುತಿಸಲಾಗಿದೆ. ಗುಜರಾತ್, ಮಹಾರಾಷ್ಟ್ರ, ರಾಜಸ್ಥಾನ, ಹರಿಯಾಣ ಮತ್ತು ದೆಹಲಿ ಸೇರಿದಂತೆ ದೇಶದ ವಿವಿಧ ಭಾಗಗಳಿಂದ ಹೊಸ ಪದವೀಧರರನ್ನು ನೇಮಿಸಿಕೊಳ್ಳುತ್ತಿದ್ದರು. ಕರೆ ಮಾಡಿದವರು ಮುಖ್ಯವಾಗಿ ಅಮೆರಿಕ ಪ್ರಜೆಗಳನ್ನು ಗುರಿಯಾಗಿಸಿಕೊಂಡು ಕಾರ್ಯಾಚರಿಸುತ್ತಿದ್ದರು.

ಇದನ್ನೂ ಓದಿ: ಎಲೆಕ್ಟ್ರಾನಿಕ್ ಸಿಟಿ ರಾಬರಿ ಪ್ರಕರಣ: ರಾಜಸ್ಥಾನದವರೆಗೂ ದರೋಡೆಕೋರರ ಅಟ್ಟಾಡಿಸಿ ಬಂಧಿಸಿದ ಬೆಂಗಳೂರು ಪೊಲೀಸರು

ಗುರುವಾರ ರಾತ್ರಿ 10 ಗಂಟೆಗೆ ಆರಂಭವಾದ ಶೋಧ ಶುಕ್ರವಾರ ಬೆಳಗಿನ ಜಾವದವರೆಗೂ ನಡೆಯಿತು. ವೈಟ್‌ಫೀಲ್ಡ್‌ನ ಗಾಯತ್ರಿ ಟೆಕ್ ಪಾರ್ಕ್‌ನ ಮೊದಲ ಮಹಡಿಯಲ್ಲಿರುವ ನಕಲಿ ಕಂಪನಿ ಎಥಿಕಲ್ ಇನ್ಫೋ ಕೋ ಪ್ರೈವೇಟ್ ಲಿಮಿಟೆಡ್ ಮತ್ತು ಮಹದೇವಪುರದ ಸಿಲ್ವರ್ ಟವರ್ಸ್‌ನಲ್ಲಿರುವ ಮತ್ತೊಂದು ಶಾಖೆ ಮೇಲೆ ದಾಳಿ ನಡೆಸಲಾಗಿದೆ. ಕಂಪನಿಯು ವ್ಯವಸ್ಥಿತವಾಗಿ ನಕಲಿ ಸೈಬರ್ ಕಾಲ್ ಸೆಂಟರ್ ನಡೆಸುತ್ತಿತ್ತು. ವಶಪಡಿಸಿಕೊಂಡ 2 ಕೋಟಿ ಮೌಲ್ಯದ ವಸ್ತುಗಳಲ್ಲಿ 127 ಡೆಸ್ಕ್‌ಟಾಪ್‌ಗಳು, ನಾಲ್ಕು ಲ್ಯಾಪ್‌ಟಾಪ್‌ಗಳು, 150 ಹೆಡ್‌ಫೋನ್‌ಗಳು, 10 ಆಂತರಿಕ ಹಾರ್ಡ್ ಡಿಸ್ಕ್‌ಗಳು, ಮೂರು ಅತ್ಯಾಧುನಿಕ ಕಾರುಗಳು, ಎರಡು ಶಾಲಾ ವ್ಯಾನ್‌ಗಳು, ಒಂದು ಟೆಂಪೋ ಟ್ರಾವೆಲರ್ ಮತ್ತು 18 ಲಕ್ಷ ರೂ ನಗದು ಸೇರಿವೆ. ಇತರೆ ಸಾರಿಗೆ ವಾಹನಗಳನ್ನು ಬಳಸಿದರೆ ವಂಚಕ ಕಂಪನಿ ಸಿಕ್ಕಿಬೀಳುತ್ತದೆ ಎಂಬ ಭಯದಿಂದ ಆರೋಪಿಗಳು ಶಾಲಾ ವಾಹನಗಳನ್ನು ಬಳಸಿ ನೌಕರರನ್ನು ಸಾಗಿಸುತ್ತಿದ್ದರು. ಅಮೆರಿಕ ಪ್ರಜೆಗಳನ್ನು ಗುರಿಯಾಗಿಸಲು ಉದ್ಯೋಗಿಗಳು ರಾತ್ರಿಯಲ್ಲಿ ಕೆಲಸ ಮಾಡುತ್ತಿದ್ದರು ಎನ್ನಲಾಗಿದೆ.

ಕಿಂಗ್ ಪಿನ್ ಆದೇಶದ ಮೇರೆಗೆ ಕೆಲಸ
11 ಆರೋಪಿಗಳು ಕ್ಯಾಲಿಫೋರ್ನಿಯಾದ ಅಮೆರಿಕ ಪ್ರಜೆಯಾಗಿರುವ ಕಿಂಗ್‌ಪಿನ್‌ನ ಆಜ್ಞೆಯ ಮೇರೆಗೆ ಕಾರ್ಯನಿರ್ವಹಿಸುತ್ತಿದ್ದರು. ವಂಚಕ ಸಂತ್ರಸ್ತರಿಂದ ಲಕ್ಷಾಂತರ ರೂಪಾಯಿ ವಸೂಲಿ ಮಾಡಿದ್ದಾರೆ ಎನ್ನಲಾಗಿದೆ. ಪ್ರಮುಖ ಆರೋಪಿ ವಿದೇಶಿ ಪ್ರಜೆಯಾಗಿರುವುದರಿಂದ ಪ್ರಕರಣವನ್ನು ಕೇಂದ್ರ ತನಿಖಾ ಸಂಸ್ಥೆಗಳಿಗೆ ವರ್ಗಾಯಿಸುವ ಆಯ್ಕೆಯನ್ನು ಪೊಲೀಸರು ಈಗ ಪರಿಶೀಲಿಸುತ್ತಿದ್ದಾರೆ. ಕಿಂಗ್‌ಪಿನ್, ಅಮೆರಿಕ ಪ್ರಜೆಗಳ ಡೇಟಾವನ್ನು ಸಂಗ್ರಹಿಸಿದ ನಂತರ, ಅದನ್ನು ತನ್ನ ಬೆಂಗಳೂರಿನ ಅಧಿಕಾರಿಗಳೊಂದಿಗೆ ಹಂಚಿಕೊಳ್ಳುತ್ತಿದ್ದರು. ಆಗ ಬೆಂಗಳೂರಿನಲ್ಲಿದ್ದ 11 ಆರೋಪಿಗಳ ತಂಡವು ಉದ್ಯೋಗಿಗಳನ್ನು ಅಮೆರಿಕ ಪ್ರಜೆಗಳೆಂದು ಕರೆಯುವಂತೆ ಮಾಡುತ್ತಿತ್ತು. ನೌಕರರಿಗೆ ಸಂಬಳವನ್ನು ನಗದು ರೂಪದಲ್ಲಿ ನೀಡಲಾಗುತ್ತಿತ್ತು. ಪರಾರಿಯಾಗಿರುವ ಕಿಂಗ್‌ಪಿನ್ ತನ್ನ ಅಧೀನ ಅಧಿಕಾರಿಗಳಿಗೆ ಹವಾಲಾ ಮೂಲಕ ಪಾವತಿ ಮಾಡುತ್ತಿದ್ದ.

ಉದ್ಯೋಗಿಗಳಿಗೆ ಅಮೆರಿಕ ಪ್ರಜೆಗಳು ಮತ್ತು ಕಿಂಗ್ ಪಿನ್ ಅಭಿವೃದ್ಧಿಪಡಿಸಿದ ಸಿದ್ಧ ಸ್ಕ್ರಿಪ್ಟ್‌ಗಳನ್ನು ನೀಡಲಾಗುತ್ತಿತ್ತು. ನೌಕರರನ್ನು ಮೂರು ಹಂತಗಳಾಗಿ ವಿಂಗಡಿಸಿ, ಮೊದಲ ಹಂತವು ಸಂತ್ರಸ್ತರ ಮೂಲ ಮಾಹಿತಿಯನ್ನು ಸಂಗ್ರಹಿಸುವ, ಎರಡನೇ ಹಂತವು ಖಾತೆಯ ವಿವರಗಳು ಮತ್ತು ಇತರ ಸೂಕ್ಷ್ಮ ಮಾಹಿತಿಯನ್ನು ಪಡೆದುಕೊಳ್ಳಲು ಮತ್ತು ಮೂರನೇ ಹಂತ ಮುಚ್ಚುವ ತಂಡ ಎಂದು ಕರೆಯಲಾಗುತ್ತದೆ. 

ಉದ್ಯೋಗಿಗಳ ಭವಿಷ್ಯ
61 ಉದ್ಯೋಗಿಗಳನ್ನು ಪ್ರಕರಣದಲ್ಲಿ ಸಾಕ್ಷಿಗಳನ್ನಾಗಿ ಮಾಡಲಾಗುವುದು ಮತ್ತು ಅವರ ವಿರುದ್ಧ ಯಾವುದೇ ಪ್ರಕರಣಗಳನ್ನು ದಾಖಲಿಸಲಾಗುವುದಿಲ್ಲ. ಅವರಲ್ಲಿ ಹೆಚ್ಚಿನವರು ಈ ದಂಧೆಯ ಬಗ್ಗೆ ತಿಳಿದಿರಲಿಲ್ಲ ಮತ್ತು ಅವರು ಅಮೆರಿಕ ಗ್ರಾಹಕರಿಗಾಗಿ ಕೆಲಸ ಮಾಡುತ್ತಿದ್ದಾರೆ ಎಂಬ ಅನಿಸಿಕೆ ಹೊಂದಿದ್ದರು ಎಂದು ಡಿಸಿಪಿ ಹೇಳಿದ್ದಾರೆ.