ಈ ಮೆಗಾ ಶಾಪಿಂಗ್ ಮಾಲ್‌ನಲ್ಲಿ ಶಾಪಿಂಗ್ ಮಾಡುವಾಗ
ಬರುತ್ತವೆ ಅತಿ ಮೈಕ್ರೋ ವಿಚಾರಗಳು...
ಉದಾಹರಣೆಗೆ, ನಾನು ಮೊದಲ ರ್ಯಾಕ್‌ನಲ್ಲಿರುವ
ವ್ಹಿಸ್ಪರ್ ನ್ಯಾಪ್‌ಕಿನ್ ಪ್ಯಾಡ್
ಯುವತಿಯೊಬ್ಬಳ ಅತಿ ಸಮೀಪವಿದ್ದು
ಹೀರಿಕೊಳ್ಳುತ್ತಿದ್ದೇನೆ ಅದರಲ್ಲಿರುವ ರಸವನ್ನು.
ನೆಕ್ಸ್ಟ್ ರ್ಯಾಕ್‌ನಲ್ಲಿಡಲಾದ ಹಗ್ಗೀಜ್ ಪ್ಯಾಕ್ ಆಗಿ
ಶೇಖರಿಸಿಟ್ಟುಕೊಳ್ಳುತ್ತಿದ್ದೇನೆ ಮಗುವೊಂದರ ಮಲ-ಮೂತ್ರವನ್ನು
ನಾಲ್ಕೈದು ಗಂಟೆಗಳ ಅದರ ಸಹವಾಸದಲ್ಲಿ
ಚಿಂತಿಸುತ್ತಿದ್ದೇನೆ ಅದರ ಬಗ್ಗೆ ಇಡೀ ಏಕಾಗ್ರತೆಯೊಂದಿಗೆ
ಉದಾಹರಣೆಗೆ ನಾನೊಂದು ಶ್ರೇಷ್ಠ ದರ್ಜೆಯ ಕೆಮೆ ಸಾಬೂನು
ಅಥವಾ ಯಾರ್ಡಲೆ, ಲಕ್ಸ್ ಇಂಟರ್‌ನ್ಯಾಶನಲ್ ಇತ್ಯಾದಿ-ಇತ್ಯಾದಿ
ಮತ್ತೆ ಓರ್ವ ದಢೂತಿ ಮಹಿಳೆಯ ತೊಡೆಗಳಲ್ಲಿ,
ಚಡಪಡಿಸುತ್ತಿದ್ದೇನೆ ನುಗ್ಗಿ.
ಅಥವಾ ನಾನೊಂದು ಮುಳ್ಳು- ಚಮಚ?
ನಲವತ್ತನ್ನು ದಾಟಿದ ಒಬ್ಬ ಮರಾಠ ಮನುಷ್ಯ ಈ ಚಮಚದಿಂದ
ತಿನ್ನುತ್ತಿದ್ದಾನೆ ಮ್ಯಾಗಿ ನೂಡಲ್ಸ್
ಮತ್ತೆ ನಾನು ಟಿ.ವಿ.
ಇಡೀ ಪರಿವಾರ ಕೂತಿದೆ ನನ್ನೆದುರು
ನೋಡುತ್ತಾ, ಊಟ ಮಾಡುತ್ತಾ, ನನ್ನ ಚಾನಲ್‌ಗಳನ್ನು ಬದಲಿಸುತ್ತಾ
ಅಥವಾ ಆಫ್ ಮಾಡಿ ಹೊರಟು ಹೋಗಿದ್ದಾರೆ ಎಲ್ಲರೂ ನನ್ನನ್ನು
ಏಕಾಂಗಿಯಾಗಿ ಬಿಟ್ಟು ಆ ಕೋಣೆಯಲ್ಲಿ ನನ್ನನ್ನು
ಮತ್ತೆ ನಾನು ಬಾಟಾ ರುಪಾಯಿಗಳ ಪಾದಪೀಠ,
ಅಪ್‌ಹೋಲ್ಸ್‌ಸ್ಟರಿಯ ಖರೀದಿಗೆ ಫ್ರೀಯಲ್ಲಿ ಸಿಕ್ಕ ಬೆಸ್ಟ್
ಆದರೂ ಬಾತ್ ರೂಮಿನಿಂದ ಬಂದ ನನ್ನ ಮಾಲೀಕ
ಒರೆಸುತ್ತಾನೆ ನನ್ನ ಮೇಲೇ ತನ್ನ ಒದ್ದೆ ಕಾಲುಗಳನ್ನು.
ಅಥವಾ ಪೊರಕೆಯೇ ನಾನು?
- ಇದರಿಂದ ಈ ಜನ ತಮ್ಮ ನೆಲವನ್ನು
ಮೇಲು- ಮೇಲೇ ಸ್ವಚ್ಛಗೊಳಿಸುತ್ತಾರೆ
ತೆಗೆಯುತ್ತಾರೆ ಬಲೆಗಳನ್ನು
ನನ್ನನ್ನು ಉಪಯೋಗಿಸುವ ಒಡತಿ ಉಪಯೋಗಿಸುತ್ತಾ ನನ್ನನ್ನು
ವ್ಯಾಕ್ಯೂಮ್ ಕ್ಲೀನರ್ ಕನಸು ಕಾಣುತ್ತಾಳೆ
ತಪ್ಪಿಯೂ ನನ್ನ ಸ್ಪರ್ಶ ಸ್ಪರ್ಶಿಸಿದರೆ ಇವಳ ಗಂಡನ ಶರೀರವನ್ನು
ಉಗಿಯುತ್ತಾಳೆ ಥೂ-ಥೂ ಎಂದು
ಅಥವಾ ನಾನು ನಾಲ್ಕನೇ ರ್ಯಾಕ್‌ನಲ್ಲಿರುವ ಕಿಟ್ ಕ್ಯಾಟ್
ಯಾರಿಗೂ ತಿಳಿಯದಂತೆ ಮಜವಾಗಿ ತಿನ್ನುತ್ತಿದ್ದಾರೆ ಜನ ನನ್ನನ್ನು
ಕುರಂ-ಕುರುಂ ಎಂದು.
ಅಥವಾ ನಾನು ವಿಟಾ-ಮಾರಿ ಬಿಸ್ಕತ್ ಪ್ಯಾಕ್?
ನನ್ನನ್ನು ತೆಗೆದುಕೊಂಡು ಹೋಗುವ ಕರುಣಾಳು ವ್ಯಕ್ತಿಗಾಗಿ
ಕಾಯುತ್ತಿದ್ದೇನೆ ದಾರಿ. ಅಥವಾ ನಾನು ಕಂದಿದ ಹಳದಿ ಬಣ್ಣದ
ಜೆಟ್ ಬ್ಲಾಕ್‌ನಲ್ಲಿ 20ರ್ ಆಫ್‌ನ ಹತಾಶ ಲೇಬಲ್
- ಈ ದಿನಗಳಲ್ಲಿ ಖುಷಿಗೊಳ್ಳುವುದೇ ಇಲ್ಲ ಇದನ್ನು ಓದಿ ನೀವು.

-ಕನ್ನಡಕ್ಕೆ: ಡಿ. ಎನ್. ಶ್ರೀನಾಥ್