ತಿರುವನಂತಪುರಂ: ಕೇರಳ ವಿಧಾನಸಭಾ ಚುನಾವಣೆಯ ಆರಂಭಿಕ ಮತ ಎಣಿಕೆಯಲ್ಲಿ ಕಾಂಗ್ರೆಸ್ ನೇತೃತ್ವದ ಯುಡಿಎಫ್ ಮುನ್ನಡೆ ಸಾಧಿಸುತ್ತಿದ್ದು, ರಾಜ್ಯದ ರಾಜಕೀಯ ಚಿತ್ರಣದಲ್ಲಿ ಸಂಭವನೀಯ ಬದಲಾವಣೆಯ ಸೂಚನೆ ನೀಡಿದೆ.

ಏಪ್ರಿಲ್ 9 ರಂದು ನಡೆದ ಕೇರಳ ವಿಧಾನಸಭಾ ಚುನಾವಣೆಯಲ್ಲಿ ಮತ ಚಲಾಯಿಸಿದ ಆರಂಭಿಕ ಎರಡು ಗಂಟೆಗಳ ಮತ ಎಣಿಕೆಯಲ್ಲಿ ಕಾಂಗ್ರೆಸ್ ನೇತೃತ್ವದ ಯುಡಿಎಫ್ ಭಾರಿ ಮುನ್ನಡೆ ಸಾಧಿಸಿದೆ ಎಂದು ಸುದ್ದಿ ವರದಿಗಳು ತೋರಿಸಿವೆ, ಇದು ರಾಜ್ಯದಲ್ಲಿ ಪಕ್ಷ ಅಧಿಕಾರಕ್ಕೆ ಬರಬಹುದು ಎಂದು ಸೂಚಿಸುತ್ತದೆ.

ಪ್ರಮುಖ ಕ್ಷೇತ್ರಗಳಲ್ಲಿ ಯುಡಿಎಫ್‌ನ ಪ್ರಬಲ ಸಾಧನೆ

ಸುದ್ದಿ ವರದಿಗಳ ಪ್ರಕಾರ, ಯುಡಿಎಫ್ 90 ಕ್ಕೂ ಹೆಚ್ಚು ಸ್ಥಾನಗಳಲ್ಲಿ ಮುನ್ನಡೆ ಗಳಿಸ್ಪಿದ್ದರೆ, ಸಿಪಿಐ-ಎಂ ನೇತೃತ್ವದ ಎಲ್‌ಡಿಎಫ್ 50 ಕ್ಕೂ ಕಡಿಮೆ ಸ್ಥಾನಗಳಲ್ಲಿ ಮುನ್ನಡೆಯಲ್ಲಿದೆ ಮತ್ತು ಬಿಜೆಪಿ ನೇತೃತ್ವದ ಎನ್‌ಡಿಎ ಸುಮಾರು 5 ಸ್ಥಾನಗಳಲ್ಲಿ ಮುನ್ನಡೆ ಸಾಧಿಸಿದೆ.

ಚುನಾವಣಾ ಆಯೋಗದ ಅಂಕಿ-ಅಂಶಗಳ ಪ್ರಕಾರ, ಕಾಂಗ್ರೆಸ್ 50 ಸ್ಥಾನಗಳಲ್ಲಿ, ಸಿಪಿಐ(ಎಂ) 31 ಸ್ಥಾನಗಳಲ್ಲಿ, ಐಯುಎಂಎಲ್ 17, ಸಿಪಿಐ 13 ಸ್ಥಾನಗಳಲ್ಲಿ ಮುನ್ನಡೆಯಲ್ಲಿದ್ದು, ಕೇರಳ ಕಾಂಗ್ರೆಸ್ (ಎಂ) 4 ಸ್ಥಾನಗಳಲ್ಲಿ ಮತ್ತು ಬಿಜೆಪಿ, ಕೇರಳ ಕಾಂಗ್ರೆಸ್ (ಕೆಇಸಿ) ಮತ್ತು ಕ್ರಾಂತಿಕಾರಿ ಸಮಾಜವಾದಿ ಪಕ್ಷ (ಆರ್‌ಎಸ್‌ಪಿ) ತಲಾ 3 ಸ್ಥಾನಗಳಲ್ಲಿ ಮುನ್ನಡೆಯಲ್ಲಿವೆ.

ಬಹುಮತ ಪಡೆಯುವ ವಿಶ್ವಾಸ: ಕಾಂಗ್ರೆಸ್

ಯುಡಿಎಫ್ ಭಾರಿ ಬಹುಮತ ಪಡೆಯಲಿದೆ ಎಂಬ ಹೇಳಿಕೆಯನ್ನು ಬೆಂಬಲಿಸುವಂತೆ ಈ ಪ್ರವೃತ್ತಿಗಳು ಕಂಡುಬರುತ್ತಿವೆ.

ಕೇರಳ ಪ್ರದೇಶ ಕಾಂಗ್ರೆಸ್ ಸಮಿತಿ ಮುಖ್ಯಸ್ಥ ಸನ್ನಿ ಜೋಸೆಫ್ ಮಾತನಾಡಿ, ಇದು ರಾಜ್ಯದಲ್ಲಿ ಯುಡಿಎಫ್ ಪರ ಪ್ರವೃತ್ತಿಯನ್ನು ಸೂಚಿಸುತ್ತದೆ ಮತ್ತು ಯುಡಿಎಫ್ 100 ಸ್ಥಾನಗಳನ್ನು ತಲುಪುತ್ತದೆ ಎಂದು ವಿಶ್ವಾಸ ವ್ಯಕ್ತಪಡಿಸಿದರು.

12 ಸಚಿವರಿಗೆ ಹಿನ್ನಡೆ

ಏಪ್ರಿಲ್ 9 ರಂದು ನಡೆದ ವಿಧಾನಸಭಾ ಚುನಾವಣೆಯಲ್ಲಿ ರಾಜ್ಯಾದ್ಯಂತ ಮತದಾನದ ಮತಗಳ ಎಣಿಕೆ ನಡೆಯುತ್ತಿರುವಾಗ ಸಿಪಿಐ-ಎಂ ನೇತೃತ್ವದ ಎಲ್‌ಡಿಎಫ್ ಸಂಪುಟದಲ್ಲಿ ಕನಿಷ್ಠ 12 ಸಚಿವರು ಹಿನ್ನೆಡೆ ಎದುರಿಸಿದ್ದಾರೆ. ಮುಖ್ಯಮಂತ್ರಿ ಪಿಣರಾಯಿ ವಿಜಯನ್ ತಮ್ಮ ಭದ್ರಕೋಟೆ ಎಂದು ಪರಿಗಣಿಸಲಾದ ಧರ್ಮಡಂ ಮತ್ತು ಅವರ ಗ್ರಾಮ ಪಿಣರಾಯಿ ಇರುವ ಕ್ಷೇತ್ರದಲ್ಲೂ ಹಿನ್ನಡೆ ಎದುರಿಸಿದ್ದಾರೆ.

ವರದಿಗಳ ಪ್ರಕಾರ, ಸಚಿವರಾದ ವೀಣಾ ಜಾರ್ಜ್, ಎಂ ಬಿ ರಾಜೇಶ್, ಒ ಆರ್ ಕೇಲು, ಆರ್ ಬಿಂದು, ಜೆ ಚಿಂಚುರಾಣಿ, ಪಿ ರಾಜೀವ್, ಕೆ ಬಿ ಗಣೇಶ್ ಕುಮಾರ್, ವಿ ಎನ್ ವಾಸವನ್, ವಿ ಶಿವನ್ ಕುಟ್ಟಿ, ವಿ ಅಬ್ದುರಹಿಮಾನ್, ಎ ಕೆ ಸಸೀಂದ್ರನ್ ಮತ್ತು ರೋಶಿ ಅಗಸ್ಟೀನ್ ತಮ್ಮ ಕ್ಷೇತ್ರಗಳಲ್ಲಿ ಹಿನ್ನಡೆಯಲ್ಲಿದ್ದಾರೆ.