ಸ್ಯಾನ್ ಫ್ರಾನ್ಸಿಸ್ಕೋ: ಯಾಹೂ ಸಂಸ್ಥೆಯ ಇತಿಹಾಸದಲ್ಲಿಯೇ ಬೃಹತ್ ಭದ್ರತಾ ಉಲ್ಲಂಘನೆ ಪ್ರಕರಣ ಬೆಳಕಿಗೆ ಬಂದಿದ್ದು, ಸಂಸ್ಥೆಯ ಸುಮಾರು 500 ಮಿಲಿಯನ್ ಖಾತೆದಾರರ ಮಾಹಿತಿಯನ್ನು  ಕದಿಯಲಾಗಿದೆ ಎಂದು ಯಾಹೂ ಸಂಸ್ಥೆ ಹೇಳಿಕೊಂಡಿದೆ.

ಪ್ರಾಯೋಜಿತ ಹ್ಯಾಕರ್ ಗಳ ತಂಡವೊಂದು ಈ ಬೃಹತ್ ಹ್ಯಾಕಿಂಗ್ ನಲ್ಲಿ ತೊಡಗಿರುವ ಕುರಿತು ಯಾಹೂ ಸಂಸ್ಥೆ ಶಂಕೆ ವ್ಯಕ್ತಪಡಿಸಿದ್ದು, ಸಂಸ್ಥೆಯ ಮೂಲಗಳ ಪ್ರಕಾರ 2014ರಿಂದೀಚೆಗೆ ಪಾಸ್  ವಕ್ಡ್ ಬದಲಾಯಿಸದ ಖಾತೆದಾರರ ಖಾತೆಗಳನ್ನು ಹ್ಯಾಕ್ ಮಾಡಲಾಗಿದೆ ಎಂದು ತಿಳಿದುಬಂದಿದೆ. ಖಾತೆದಾರರ ಹೆಸರು, ಮೊಬೈಲ್ ಸಂಖ್ಯೆ, ಈ ಮೇಲ್ ವಿಳಾಸ, ಜನ್ಮ ದಿನಾಂಕ, ಭದ್ರತಾ  ಪ್ರಶ್ನೆ, ಹಾಗೂ ಪಾಸ್ ವರ್ಡ್ ಗಳು ಹ್ಯಾಕ್ ಆಗಿರುವ ಕುರಿತು ಸಂಸ್ಥೆ ಶಂಕೆ ವ್ಯಕ್ತಪಡಿಸಿದೆ.

ಹೀಗಾಗಿ ಕೂಡಲೇ 2014ರಿಂದೀಚೆಗೆ ಪಾಸ್ ವರ್ಡ್ ಬಲಾವಣೆ ಮಾಡದ ಖಾತೆದಾರರು ಈ ಕೂಡಲೇ ತಮ್ಮ ಖಾತೆಗಳ ಪಾಸ್ ವರ್ಡ್ ಬದಲಿಸಬೇಕು ಎಂದು ಮನವಿ ಮಾಡಿಕೊಂಡಿದೆ.

ಈಗಾಗಲೇ ಯಾಹೂ ಖಾತೆದಾರರು ಜಿಮೇಲ್ ನತ್ತ ವಲಸೆ ಬರುತ್ತಿದ್ದು, ಪ್ರಸ್ತುತ ಭದ್ರತಾ ಉಲ್ಲಂಘನೆ ಪ್ರಕರಣ ಯಾಹೂ ಸಂಸ್ಥೆಗೆ ಪ್ರಮುಖ ಹೊಡೆತವಾಗಿ ಪರಿಣಮಿಸುವುದರಲ್ಲಿ ಎರಡು  ಮಾತಿಲ್ಲ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.