Free Legal Help: ಕೋರ್ಟ್ ಮೆಟ್ಟಿಲೇರಬೇಕು ಎಂದರೆ ಸಾಕು, ಎಂಥವರಿಗೂ ಮೊದಲು ನೆನಪಾಗುವುದೇ ಲಕ್ಷಾಂತರ ರೂಪಾಯಿ ಶುಲ್ಕ ಮತ್ತು ಮುಗಿಯದ ಖರ್ಚು. ಅದರಲ್ಲೂ, ಈ ಹಣದ ಕೊರತೆಯಿಂದಲೇ ಎಷ್ಟೋ ಜನ ತಮಗೆ ಅನ್ಯಾಯವಾದರೂ ಮೌನವಾಗಿ ಸಹಿಸಿಕೊಳ್ಳುತ್ತಾರೆ. ಆದರೆ, ಭಾರತೀಯ ಸಂವಿಧಾನವು ಬಡವ-ಶ್ರೀಮಂತ ಎಂಬ ಭೇದವಿಲ್ಲದೆ ಎಲ್ಲರಿಗೂ ನ್ಯಾಯದ ಹಕ್ಕನ್ನು ನೀಡಿದೆ ಎಂಬುದು ನಿಮಗೆ ತಿಳಿದಿದೆಯೇ? ಹಾಗಾಗಿ, ನೀವು ಒಂದು ರೂಪಾಯಿ ಕೂಡ ಖರ್ಚು ಮಾಡದೆ ಸರ್ಕಾರವೇ ನಿಮಗೆ ಉಚಿತವಾಗಿ ವಕೀಲರನ್ನು ಕೊಟ್ಟು ವಾದ ಮಾಡಿಸುತ್ತದೆ. ಹಾಗಾದ್ರೆ, ಈ ಸೇವೆ ಪಡೆಯುವುದು ಹೇಗೆ ಎಂದು ತಿಳಿಯೋಣ...

ಉಚಿತ ಕಾನೂನು ನೆರವು ಎಂದರೇನು?

ಕೇಂದ್ರ ಸರ್ಕಾರದ ರಾಷ್ಟ್ರೀಯ ಕಾನೂನು ಸೇವೆಗಳ ಪ್ರಾಧಿಕಾರ NALSA ಮತ್ತು ರಾಜ್ಯ ಹಾಗೂ ಜಿಲ್ಲಾ ಕಾನೂನು ಸೇವೆಗಳ ಪ್ರಾಧಿಕಾರ DLSA ಈ ಸೇವೆಯನ್ನು ನೀಡುತ್ತದೆ. ಇದರ ಅಡಿಯಲ್ಲಿ ಬಡವರಿಗೆ, ದೌರ್ಬಲ್ಯ ವರ್ಗದವರಿಗೆ ಉಚಿತವಾಗಿ ವಕೀಲರು, ಕೋರ್ಟ್ ಫೀಸ್ ಮತ್ತು ಕಾನೂನು ಸಲಹೆ ನೀಡಲಾಗುತ್ತದೆ.

ಯಾರಿಗೆ ಈ ಸೇವೆ ಸಿಗುತ್ತದೆ?

ಈ ಸೇವೆ ಎಲ್ಲರಿಗೂ ಸಿಗುವುದಿಲ್ಲ, ಆದರೆ, ಈ ಕೆಳಗಿನವರಿಗೆ ಮಾತ್ರ ಸಿಗುತ್ತದೆ.

• ಮಹಿಳೆಯರು ಮತ್ತು ಮಕ್ಕಳು

• ಪರಿಶಿಷ್ಟ ಜಾತಿ ಮತ್ತು ಪರಿಶಿಷ್ಟ ಪಂಗಡದವರು

• ಕೈಗಾರಿಕಾ ಕಾರ್ಮಿಕರು

• ವಿಪತ್ತು, ಹಿಂಸಾಚಾರಕ್ಕೆ ಒಳಗಾದವರು

• ವಾರ್ಷಿಕ ಆದಾಯ 3 ಲಕ್ಷ ರೂಪಾಯಿಗಿಂತ ಕಡಿಮೆ ಇರುವವರು, ಕರ್ನಾಟಕದಲ್ಲಿ ಈ ಮಿತಿ 5 ಲಕ್ಷ ಇದೆ

• ಜೈಲಿನಲ್ಲಿರುವ ಕೈದಿಗಳು

• ವಿಕಲಚೇತನರು (ಅಂಧರು, ಕಿವುಡರು ಅಥವಾ ಇತರೆ ದೈಹಿಕ ದೌರ್ಬಲ್ಯ ಹೊಂದಿದವರು)

• ಮಾನಸಿಕ ಅಸ್ವಸ್ಥರು

ಈ ಸೇವೆ ಪಡೆಯುವುದು ಹೇಗೆ?

ಇದನ್ನು ಪಡೆಯುವುದು ತುಂಬಾ ಸುಲಭ. ಇದಕ್ಕಾಗಿ ನೀವು ಕೋರ್ಟ್ ಗೆ ಅಲೆದಾಡಬೇಕಿಲ್ಲ.

• ವಿಧಾನ 1: ನಿಮ್ಮ ಜಿಲ್ಲೆಯ ಜಿಲ್ಲಾ ನ್ಯಾಯಾಲಯಕ್ಕೆ ಹೋಗಿ ಅಲ್ಲಿರುವ ಜಿಲ್ಲಾ ಕಾನೂನು ಸೇವೆಗಳ ಪ್ರಾಧಿಕಾರ DLSA ಕಚೇರಿಗೆ ಭೇಟಿ ನೀಡಿ. ಅಲ್ಲಿ ಉಚಿತ ಕಾನೂನು ನೆರವು ಬೇಕು ಎಂದು ಅರ್ಜಿ ನೀಡಿ.

• ವಿಧಾನ 2: ಆನ್ ಲೈನ್ ನಲ್ಲಿ ಅರ್ಜಿ ಸಲ್ಲಿಸಬಹುದು. NALSA ಅಧಿಕೃತ ವೆಬ್ ಸೈಟ್ nalsa.gov.in ಗೆ ಹೋಗಿ Legal Aid Application ಮೇಲೆ ಕ್ಲಿಕ್ ಮಾಡಿ ನಿಮ್ಮ ವಿವರ ತುಂಬಿ.

• ವಿಧಾನ 3: 15100 ಈ ಟೋಲ್ ಫ್ರೀ ನಂಬರ್ ಗೆ ಕರೆ ಮಾಡಿ ಸಹಾಯ ಪಡೆಯಬಹುದು.

ಬೇಕಾಗುವ ದಾಖಲೆಗಳು:

ನಿಮ್ಮ ಆಧಾರ್ ಕಾರ್ಡ್, ಜಾತಿ ಮತ್ತು ಆದಾಯ ಪ್ರಮಾಣ ಪತ್ರ, ನಿಮ್ಮ ಕೇಸ್ ಗೆ ಸಂಬಂಧಿಸಿದ ದಾಖಲೆಗಳು ಇದ್ದರೆ ಸಾಕು. ಅರ್ಜಿ ಸಲ್ಲಿಸಿದ 7 ರಿಂದ 10 ದಿನಗಳಲ್ಲಿ ಪ್ರಾಧಿಕಾರ ನಿಮ್ಮ ಅರ್ಜಿಯನ್ನು ಪರಿಶೀಲಿಸಿ ನಿಮಗೆ ಒಬ್ಬ ಅನುಭವಿ ವಕೀಲರನ್ನು ನೇಮಕ ಮಾಡುತ್ತದೆ. ಆ ವಕೀಲರಿಗೆ ಫೀಸ್ ಅನ್ನು ಸರ್ಕಾರವೇ ನೀಡುತ್ತದೆ, ನೀವು ಒಂದು ರೂಪಾಯಿ ಕೊಡಬೇಕಿಲ್ಲ.

ಈ ಸೇವೆಯ ಅಡಿಯಲ್ಲಿ ಏನೇನು ಸೌಲಭ್ಯ ಸಿಗುತ್ತದೆ?

• ಕೋರ್ಟ್‌ನಲ್ಲಿ ನಿಮಗಾಗಿ ವಾದ ಮಾಡಲು ಉಚಿತ ಅರ್ಹ ವಕೀಲರ ನೇಮಕ.

• ಕೋರ್ಟ್ ಕೇಸ್‌ಗೆ ಸಂಬಂಧಿಸಿದ ಕೋರ್ಟ್ ಫೀಸ್, ಪ್ರೊಸೆಸ್ ಫೀಸ್ ಮುಂತಾದ ಯಾವುದೇ ವೆಚ್ಚಗಳನ್ನು ನೀಡುವುದು ಬೇಕಾಗಿಲ್ಲ (ಸರ್ಕಾರವೇ ಭರಿಸುತ್ತದೆ).

• ಅರ್ಜಿ ಸಿದ್ಧಪಡಿಸುವುದು, ದೂರು ಪತ್ರ ಬರೆಯುವುದು ಮತ್ತು ಮೇಲ್ಮನವಿ ಸಿದ್ಧಪಡಿಸುವ ಉಚಿತ ಸೇವೆ.

• ಉಚಿತ ಕಾನೂನು ಸಲಹೆ ಮತ್ತು ಮಾರ್ಗದರ್ಶನ.

• ತೀರ್ಪುಗಳು ಮತ್ತು ಕೋರ್ಟ್ ದಾಖಲೆಗಳ ಪ್ರಮಾಣೀಕೃತ ಪ್ರತಿಗಳನ್ನು ಉಚಿತವಾಗಿ ಒದಗಿಸುವುದು.