ಹವಾನಾ: ಫುಟ್ಬಾಲ್ ದಂತಕಥೆ ದಿವಂಗತ ಡಿಯೆಗೊ ಮರಡೋನಾ ಆವರ ಮೇಲೆ ಮಹಿಳೆಯೋರ್ವರು ಲೈಂಗಿಕ ದೌರ್ಜನ್ಯ ಮತ್ತು ಅತ್ಯಾಚಾರ ಆರೋಪ ಮಾಡಿದ್ದಾರೆ. 37 ವರ್ಷದ ಕ್ಯೂಬಾ ಪ್ರಜೆ ಮೇವಿಸ್ ಅಲ್ವರೆಜ್ ಎಂಬುವವರು ಆರೋಪ ಮಾಡಿರುವ ಮಹಿಳೆ.

ಇದನ್ನೂ ಓದಿ: ಅರ್ಜೆಂಟೀನಾದ ಖ್ಯಾತ ಫುಟ್ಬಾಲ್ ಆಟಗಾರ ಮರಾಡೋನ ನಿಧನ 

17ನೇ ವಯಸ್ಸಿನಲ್ಲಿದ್ದಾಗಲೇ ಮರಡೋನಾ ಜೊತೆ ತಾವು ಅಫೇರ್ ಹೊಂದಿದ್ದಾಗಿ ಅವರು ತಿಳಿಸಿದ್ದಾರೆ. ಜೊತೆ ಇದ್ದಾಗ ಅವರು ತಮ್ಮ ಮೇಲೆ ಹಿಂಸೆ ನಡೆಸಿದ್ದಲ್ಲದೆ ಲೈಂಗಿಕ ದೌರ್ಜನ್ಯ ಎಸಗಿದ್ದಾಗಿ ಅವರು ತಿಳಿಸಿದ್ದಾರೆ. ಅಲ್ಲದೆ ತಮ್ಮ ಇಚ್ಛೆಗೆ ವಿರುದ್ಧವಾಗಿ ಗೃಹಬಂಧನದಲ್ಲಿ ಇರಿಸುತ್ತಿದ್ದುದಾಗಿಯೂ ಅವರು ಆರೋಪ ಹೊರಿಸಿದ್ದಾರೆ. 

ಮೇವಿಸ್ ಅಲ್ವರೆಜ್ ಅವರು ಸಧ್ಯ ಅಮೆರಿಕದ ಮಯಾಮಿಯಲ್ಲಿ ನೆಲೆಸಿದ್ದಾರೆ. ಮರಡೋನಾ ಅವರು ತಮಗೆ ಡ್ರಗ್ ಸೇವಿಸುವಂತೆ ಒತ್ತಡ ಹೇರುತ್ತಿದ್ದುದಾಗಿಯೂ ಹೇಳಿದ್ದಾರೆ. 

ಇದನ್ನೂ ಓದಿ: ಫುಟ್ಬಾಲ್ ಆಟಗಾರ ಮರಡೋನಾ ನಿಧನ: ಎರಡು ದಿನ ಶೋಕಾಚರಣೆ ಘೋಷಿಸಿದ ಕೇರಳ ಸರ್ಕಾರ

ಮರಡೋನಾ ಮತ್ತು ತಾವು 4- 5 ವರ್ಷಗಳ ಕಾಲ ಜೊತೆಯಿದ್ದುದಾಗಿಯೂ ಹೇಳಿರುವ ಮೇವಿಸ್ ಈಗ ಇಬ್ಬರು ಮಕ್ಕಳ ತಾಯಿ. ಪತ್ರಿಕೆಗಳಲ್ಲಿ ಬಂದ ಆಕೆಯ ಸಂದರ್ಶನವನ್ನು ಆಧರಿಸಿ ''ಪೀಸ್'' ಎನ್ನುವ ಎನ್ ಜಿ ಒ ಒಂದು ಕ್ಯೂಬಾ ನ್ಯಾಯಾಲಯದಲ್ಲಿ ಪ್ರಕರಣ ದಾಖಲಿಸಿದೆ. 

ನಾನು ಅನುಭವಿಸಿದ ನೋವನ್ನು ಇತರರು ಅನುಭವಿಸದೇ ಇರಲಿ ಎನ್ನುವ ಸದುದ್ದೇಶಕ್ಕೆ ತಾವು ತಮ್ಮ ನೋವನ್ನು ಹೊರಹಾಕಿರುವುದಾಗಿ ಮೇವಿಸ್ ತಿಳಿಸಿದ್ದಾರೆ. ಅಲ್ಲದೆ ತಮ್ಮ ಹಾಗೆಯೇ ದೌರ್ಜನ್ಯ ಅನುಭವಿಸಿದ ಮಹಿಳೆಯರು ತಮ್ಮ ನೋವನ್ನು ಹೊರಹಾಕಲು ಸ್ಥೈರ್ಯ ತುಂಬುವ ಕೆಲಸ ಮಾಡುವುದು ಇದರ ಹಿಂದಿನ ಉದ್ದೇಶ ಎಂದು ಅವರು ತಿಳಿಸಿದ್ದಾರೆ.

ಇದನ್ನೂ ಓದಿ: ಫುಟ್ಬಾಲ್ ದಿಗ್ಗಜ ಮರಡೋನಾಗೆ ಗೌರವ ಸಲ್ಲಿಕೆ, ಮೆಸ್ಸಿಗೆ 600 ಯುರೋ ದಂಡ