ಚಂದಾ ಕೊಚಾರ್ ಸಿಇಒ ಸ್ಥಾನದಲ್ಲಿ ಮುಂದುವರಿಕೆ ವಿಷಯದಲ್ಲಿ ಐಸಿಐಸಿಐ ಆಡಳಿತ ಮಂಡಳಿ ಇಬ್ಭಾಗ!

ಚಂದಾ ಕೊಚಾರ್ ಅವರನ್ನು ಸಿಇಒ ಸ್ಥಾನದಲ್ಲಿ ಮುಂದುವರೆಸುವುದಕ್ಕೆ ಸಂಬಂಧಿಸಿದಂತೆ ಐಸಿಐಸಿಐ ಆಡಳಿತ ಮಂಡಳಿಯಲ್ಲಿ ಬಿರುಕು ಮೂಡಿದ್ದು, ಸಿಇಒ ಸ್ಥಾನದಿಂದ ಕೆಳಗಿಳಿಸಬೇಕೇ ಬೇಡವೇ ಎಂಬ ಬಗ್ಗೆ ಆಡಳಿತ ಮಂಡಳಿಯಲ್ಲೇ ಗೊಂದಲ ಉಂಟಾಗಿದೆ. 

ವಿಡಿಯೊಕಾನ್ ಗ್ರೂಪ್ ಸಾಲ ಪ್ರಕರಣದಲ್ಲಿ ರಾಜೀವ್ ಕೊಚಾರ್ ಹಾಗೂ ಚಂದಾ ಕೊಚಾರ್ ಪತಿ ದೀಪಕ್ ಕೊಚಾರ್ ಅವರ ವಿರುದ್ಧ ಅಕ್ರಮದ ಆರೋಪ ಕೇಳಿಬಂದಿತ್ತು. ಪ್ರಕರಣಕ್ಕೆ ಸಂಬಂಧಿಸಿದಂತೆ ಚಂದಾ ಕೊಚಾರ್ ಅವರನ್ನೂ ವಿಚಾರಣೆಗೊಳಪಡಿಸಲಾಗಿತ್ತು. ಈ ಹಿನ್ನೆಲೆಯಲ್ಲಿ  ಐಸಿಐಸಿಐ ನ ಕೆಲವು  ನಿರ್ದೇಶಕರು ಕೊಚಾರ್ ಅವರನ್ನು ಸಿಇಒ ಸ್ಥಾನದಲ್ಲಿ ಮುಂದುವರೆಸುವುದಕ್ಕೆ ವಿರೋಧ ವ್ಯಕ್ತಪಡಿಸಿದ್ದಾರೆ ಎಂದು ಹಿಂದೂಸ್ಥಾನ್ ಟೈಮ್ಸ್ ವರದಿ ಪ್ರಕಟಿಸಿದೆ. 

ಸಿಇಒ ಆಗಿ ಚಂದಾ ಕೊಚಾರ್ ಅವರ ಅವಧಿ 2019 ರ ಮಾ.31 ಕ್ಕೆ ಮುಕ್ತಾಯಗೊಳ್ಳಲಿದ್ದು, ಇದಕ್ಕೂ ಮುನ್ನ ಅವರನ್ನು ಸಿಇಒ ಸ್ಥಾನದಿಂದ ಕೆಳಗಿಳಿಸಬೇಕೇ ಎಂಬುದರ ಬಗ್ಗೆ ಆಡಳಿತ ಮಂಡಳಿ ಈ ವಾರದಲ್ಲಿ ನಿರ್ಧಾರ ಕೈಗೊಳ್ಳುವ ಸಾಧ್ಯತೆ ಇದೆ.