ವಾರಾಂತ್ಯ ಷೇರುಮಾರುಕಟ್ಟೆ ತಲ್ಲಣ: ಆರಂಭಿಕ ವಹಿವಾಟು 800 ಅಂಕ ಕುಸಿತ; IT ವಲಯದ ಷೇರುಗಳು ತೀವ್ರ ಇಳಿಕೆ

ಮುಂಬೈ: ಜಾಗತಿಕ ಮಾರುಕಟ್ಟೆಗಳ ದುರ್ಬಲ ಸೂಚನೆಗಳು ಹಾಗೂ ಕೃತಕ ಬುದ್ಧಿಮತ್ತೆ (AI) ಸಂಬಂಧಿತ ಅಸ್ಥಿರತೆಯ ಬಗ್ಗೆ ಮುಂದುವರಿದಿರುವ ಆತಂಕಗಳಿಂದ ಹೂಡಿಕೆದಾರರ ಮನೋಭಾವ ಕುಗ್ಗಿ, ಇಂದು ವಾರಾಂತ್ಯ ಆರಂಭಿಕ ವಹಿವಾಟಿನಲ್ಲಿ ಸೆನ್ಸೆಕ್ಸ್ ಮತ್ತು ನಿಫ್ಟಿ ಸೂಚ್ಯಂಕಗಳು ಶೇಕಡಾ 1ಕ್ಕಿಂತ ಹೆಚ್ಚು ಕುಸಿದವು. ಐಟಿ ಷೇರುಗಳಲ್ಲಿ ತೀವ್ರ ಮಾರಾಟ ಒತ್ತಡ ಕಂಡುಬಂದಿತು.

30 ಷೇರುಗಳ ಬಿಎಸ್‌ಇ ಸೆನ್ಸೆಕ್ಸ್ ಆರಂಭಿಕ ವಹಿವಾಟಿನಲ್ಲಿ 883.4 ಅಂಕಗಳು (1.05%) ಕುಸಿದು 82,791.52ಕ್ಕೆ ತಲುಪಿತು. 50 ಷೇರುಗಳ ಎನ್‌ಎಸ್‌ಇ ನಿಫ್ಟಿ 262.60 ಅಂಕಗಳು (1.02%) ಇಳಿದು 25,544.60ಕ್ಕೆ ಇಳಿಯಿತು.

ಹಿಂದಿನ ವಹಿವಾಟಿನಿಂದಲೇ ಆರಂಭವಾದ ಮಾರಾಟ ಒತ್ತಡ ತಂತ್ರಜ್ಞಾನ (IT) ಷೇರುಗಳಲ್ಲಿ ಮುಂದುವರಿಯಿತು.

ಇನ್ಫೋಸಿಸ್, ಟಾಟಾ ಕನ್ಸಲ್ಟನ್ಸಿ ಸರ್ವಿಸಸ್ (TCS), ಎಚ್‌ಸಿಎಲ್ ಟೆಕ್ನಾಲಜೀಸ್ ಮತ್ತು ಟೆಕ್ ಮಹೀಂದ್ರಾ ಮುಂತಾದ ಪ್ರಮುಖ ಕಂಪನಿಗಳ ಷೇರುಗಳು ಸೆನ್ಸೆಕ್ಸ್‌ನಲ್ಲಿ ಹೆಚ್ಚಿನ ನಷ್ಟ ಕಂಡವು.

ಇಟರ್ನಲ್, ಹಿಂದುಸ್ತಾನ್ ಯೂನಿಲಿವರ್, ಅದಾನಿ ಪೋರ್ಟ್ಸ್, ಟ್ರೆಂಟ್, ಟಾಟಾ ಸ್ಟೀಲ್, ರಿಲಯನ್ಸ್ ಇಂಡಸ್ಟ್ರೀಸ್, ಇಂಡಿಗೋ, ಲಾರ್ಸನ್ & ಟೂಬ್ರೋ, ಅಲ್ಟ್ರಾಟೆಕ್ ಸಿಮೆಂಟ್ ಮತ್ತು ಎನ್‌ಟಿಪಿಸಿ ಷೇರುಗಳೂ ಕುಸಿತದ ವಲಯದಲ್ಲಿ ವಹಿವಾಟಾಗುತ್ತಿದ್ದವು.

ಬಜಾಜ್ ಫೈನಾನ್ಸ್, ಎಚ್‌ಡಿಎಫ್‌ಸಿ ಬ್ಯಾಂಕ್ ಮತ್ತು ಭಾರತೀ ಏರ್‌ಟೆಲ್ ಮಾತ್ರ ಏರಿಕೆಯಲ್ಲಿ ಕಂಡುಬಂದವು.

ಬಿಎಸ್‌ಇ ಸ್ಮಾಲ್‌ಕ್ಯಾಪ್ ಸೆಲೆಕ್ಟ್ ಸೂಚ್ಯಂಕವು 1.93% ಇಳಿಕೆಯಾಗಿದ್ದು, ಮಿಡ್‌ಕ್ಯಾಪ್ ಸೆಲೆಕ್ಟ್ ಸೂಚ್ಯಂಕವು 1.40% ಕುಸಿತ ಕಂಡಿತು.

ಷೇರು ಮಾರುಕಟ್ಟೆ ಅಸ್ಥಿರ ಹಂತಕ್ಕೆ ಪ್ರವೇಶಿಸಿವೆ. ಇದು ಹೂಡಿಕೆದಾರರಲ್ಲಿ ಆತಂಕ ಉಂಟುಮಾಡಬಹುದು, ಆದರೆ ಕೆಲವು ಅವಕಾಶಗಳನ್ನೂ ನೀಡುತ್ತದೆ. ಅಮೆರಿಕಾ ಮಾರುಕಟ್ಟೆಗಳಲ್ಲಿ ಎಐ ಸಂಬಂಧಿತ ಷೇರುಗಳ ಮಾರಾಟ ನಿರೀಕ್ಷಿತವಾಗಿತ್ತು, ಆದರೆ ಅದರ ಸಮಯ ಮತ್ತು ಪ್ರಮಾಣ ಸ್ಪಷ್ಟವಾಗಿರಲಿಲ್ಲ ಎಂದು ಜಿಯೋಜಿತ್ ಇನ್ವೆಸ್ಟ್‌ಮೆಂಟ್ಸ್ ಲಿಮಿಟೆಡ್‌ನ ಮುಖ್ಯ ಹೂಡಿಕೆ ತಂತ್ರಜ್ಞ ವಿ.ಕೆ. ವಿಜಯಕುಮಾರ್ ಹೇಳುತ್ತಾರೆ.

ಭಾರತೀಯ ಮಾರುಕಟ್ಟೆಯ ದೃಷ್ಟಿಯಿಂದ ಎಐ ಷೇರುಗಳಲ್ಲಿ ನಡೆಯುತ್ತಿರುವ ಈ ಸರಿಪಡಿಸುವಿಕೆ ಉತ್ತಮ ಬೆಳವಣಿಗೆಯಾಗಿದೆ. ಕಳೆದ ವರ್ಷದ ಜಾಗತಿಕ ಏರಿಕೆ ಮುಖ್ಯವಾಗಿ ಎಐ ಆಧಾರಿತವಾಗಿತ್ತು. ಎಐ ಕ್ಷೇತ್ರದಲ್ಲಿ ಹಿಂದುಳಿದಿರುವ ಭಾರತಕ್ಕೆ ಅದರಲ್ಲಿ ಭಾಗವಹಿಸಲು ಸಾಧ್ಯವಾಗಿರಲಿಲ್ಲ. ಆದ್ದರಿಂದ ಎಐ ವ್ಯಾಪಾರದ ಹಿಂಪಡೆಯುವಿಕೆ ಮುಂದುವರಿದರೆ, ಅದು ಭಾರತದ ದೃಷ್ಟಿಯಿಂದ ಧನಾತ್ಮಕವಾಗಲಿದೆ ಎಂದು ವಿಜಯಕುಮಾರ್ ತಿಳಿಸಿದ್ದಾರೆ.

ಪ್ರಸ್ತುತ ಭಾರತೀಯ ಮಾರುಕಟ್ಟೆಯನ್ನು ಕದಡುವ ಪ್ರಮುಖ ಕಾರಣವೆಂದರೆ ಐಟಿ ಷೇರುಗಳಲ್ಲಿ ಕಂಡುಬರುತ್ತಿರುವ ಭಾರೀ ಮಾರಾಟ. ಇದು ಇಂಡಿಯಾ ಇಂಕ್‌ನ ಎರಡನೇ ಅತಿದೊಡ್ಡ ಲಾಭದ ವಲಯವಾಗಿದೆ.

ಆಂಥ್ರೋಪಿಕ್ ಶಾಕ್’ ಐಟಿ ಕ್ಷೇತ್ರದ ಮೇಲೆ ಬೀರುವ ನಿಜವಾದ ಪರಿಣಾಮವನ್ನು ಇನ್ನೂ ಅಂದಾಜಿಸಲು ಸಾಧ್ಯವಾಗಿಲ್ಲ.”

ಏಷಿಯಾದ ಮಾರುಕಟ್ಟೆಗಳಲ್ಲಿ ಹಾಂಗ್‌ಕಾಂಗ್‌ನ ಹ್ಯಾಂಗ್‌ಸೆಂಗ್, ಜಪಾನ್‌ನ ನಿಕ್ಕೇಯಿ 225 ಮತ್ತು ಶಾಂಘೈ ಎಸ್‌ಎಸ್‌ಇ ಕಾಂಪೋಸಿಟ್ ಸೂಚ್ಯಂಕಗಳು ಇಳಿಕೆಯಲ್ಲಿ ವಹಿವಾಟಾಗುತ್ತಿದ್ದರೆ, ದಕ್ಷಿಣ ಕೊರಿಯಾದ ಕೋಸ್ಪಿ ಏರಿಕೆ ಕಂಡುಬಂತು.

ಅಮೆರಿಕದ ಷೇರು ಮಾರುಕಟ್ಟೆಗಳು ಕಳೆದ ರಾತ್ರಿ ವಹಿವಾಟಿನಲ್ಲಿ ಕುಸಿತದೊಂದಿಗೆ ಮುಕ್ತಾಯಗೊಂಡವು. ಎಐ ತಂತ್ರಜ್ಞಾನವು ವ್ಯವಹಾರ ಮಾದರಿಗಳಿಗೆ ಪರಿಣಾಮ ಬೀರುವ ಸಾಧ್ಯತೆ ಕುರಿತು ಆತಂಕ ಹೆಚ್ಚಾದಂತೆ ಪ್ರಮುಖ ತಂತ್ರಜ್ಞಾನ ಕಂಪನಿಗಳ ಷೇರುಗಳು ತೀವ್ರವಾಗಿ ಕುಸಿದಿವೆ ಎಂದು ಹೇಳಿದರು.

ಇನ್ನೊಂದೆಡೆ, ವಿದೇಶಿ ಸಂಸ್ಥಾತ್ಮಕ ಹೂಡಿಕೆದಾರರು (FII) 108.42 ಕೋಟಿ ರೂಪಾಯಿ ಮೌಲ್ಯದ ಷೇರುಗಳನ್ನು ಖರೀದಿಸಿದ್ದು, ದೇಶೀಯ ಸಂಸ್ಥಾತ್ಮಕ ಹೂಡಿಕೆದಾರರು (DII) ಕೂಡ 276.85 ಕೋಟಿ ರೂಪಾಯಿ ಮೌಲ್ಯದ ಷೇರುಗಳನ್ನು ಖರೀದಿಸಿದ್ದಾರೆ ಎಂದು ವಿನಿಮಯದ ಅಂಕಿಅಂಶಗಳು ತಿಳಿಸಿವೆ.

ಜಾಗತಿಕ ತೈಲದ ಮಾನದಂಡವಾದ ಬ್ರೆಂಟ್ ಕ್ರೂಡ್ ಬೆಲೆ 0.16 ಶೇಕಡಾ ಇಳಿದು ಬ್ಯಾರೆಲ್‌ಗೆ 67.41 ಅಮೆರಿಕಾ ಡಾಲರ್ ಆಗಿದೆ.