ಬಾಲಿವುಡ್ ನ ಬ್ಲಾಕ್ ಬಸ್ಟರ್ ಚಿತ್ರಗಳಾದ ಬೇಬಿ, ಏರ್ಲಿಫ್ಟ್, ರುಸ್ತುಂ ನಂತಹ ದೇಶಪ್ರೇಮ ಸಾರುವ ಚಿತ್ರಗಳಲ್ಲಿ ಅಭಿನಯಿಸಿದ್ದ ಬಾಲಿವುಡ್ ನಟ ಅಕ್ಷಯ್ ಕುಮಾರ್ ಮತ್ತೊಂದು ದೇಶಪ್ರೇಮ ಸಾರುವ ಚಿತ್ರದಲ್ಲಿ ನಟಿಸುತ್ತಿದ್ದಾರೆ.
1948ರಲ್ಲಿ ಒಲಿಂಪಿಕ್ ನಲ್ಲಿ ಭಾರತಕ್ಕೆ ಮೊದಲ ಸ್ವರ್ಣ ಪದಕ ದೊರೆಯಿತು. ಸ್ವಾತಂತ್ರ್ಯ ನಂತರ ಭಾರತ ಜಯಿಸಿದ ಮೊದಲ ಸ್ವರ್ಣ ಪದಕ. ಈ ಕ್ಷಣ ಭಾರತೀಯ ಇತಿಹಾಸದಲ್ಲಿ ಸುವರ್ಣಾಕ್ಷರದಲ್ಲಿ ಅಚ್ಚಾಗಿದೆ. ಇದನ್ನೇ ಕಥಾ ವಿಷಯವನ್ನಾಗಿ ರೂಪಿಸಿದ್ದು ಚಿತ್ರಕ್ಕೆ ಗೋಲ್ಡ್ ಎಂದು ಹೆಸರಿಡಲಾಗಿದೆ.
1948ರಲ್ಲಿ ಕಿಶನ್ ಲಾಲ್ ನಾಯಕತ್ವದಲ್ಲಿ ಭಾರತೀಯ ಹಾಕಿ ತಂಡ ಗ್ರೇಟ್ ಬ್ರಿಟನ್ ವಿರುದ್ಧದ ಫೈನಲ್ ಪಂದ್ಯದಲ್ಲಿ ಜಯಿಸಿ ಪ್ರಥಮ ಸ್ವರ್ಣ ಪದಕಕ್ಕೆ ಮುತ್ತಿಕ್ಕಿತ್ತು.
ಗೋಲ್ಡ್ ಚಿತ್ರವನ್ನು ಫರ್ಹಾನ್ ಅಖ್ತರ್ ಮತ್ತು ರಿತೇಶ್ ಸಿದ್ವಾನಿ ಸೇರಿ ಎಕ್ಸೆಲ್ ಎಂಟರ್ಟೆನ್ಮೆಂಟ್ ನಿರ್ಮಿಸಲಿದ್ದು ಚಿತ್ರವನ್ನು ತಲಾಶ್ ಚಿತ್ರ ಖ್ಯಾತಿಯ ರೀಮಾ ಕಾಗ್ಟಿ ನಿರ್ದೇಶಿಸಲಿದ್ದಾರೆ. ಚಿತ್ರ 2018ರ ಆಗಸ್ಟ್ 18ರಂದು ತೆರೆಗೆ ಬರಲಿದೆ.
