ಚಲಿಸುತ್ತಿದ್ದ ರೈಲಿನ ಫುಟ್ ಬೋರ್ಡ್ ನಲ್ಲಿ ಕುಳಿತ ನಟ ಸೋನು ಸೂದ್, ವಿರೋಧದ ನಂತರ ಕ್ಷಮೆಯಾಚನೆ! ವಿಡಿಯೋ!

ಮುಂಬೈ: ಕಳೆದೆರಡು ವರ್ಷಗಳಲ್ಲಿ ಮಾಡಿದ್ದ ಸಮಾಜಮುಖಿ ಕೆಲಸಗಳಿಂದ ಫೇಮಸ್ ಆಗಿದ್ದ ನಟ ಸೋನು ಸೂದ್ ಇತ್ತೀಚೆಗೆ ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಸೋನು ಸೂದ್ ಇತ್ತೀಚೆಗೆ ಸಾಮಾಜಿಕ ಮಾಧ್ಯಮದಲ್ಲಿ ತಮ್ಮ ಹೊಸ ವೀಡಿಯೊವನ್ನು ಹಂಚಿಕೊಂಡಿದ್ದು ಇದು ಟೀಕೆಗೆ ಗುರಿಯಾಗಿತ್ತು.

ಸೋನು ಸೂದ್ ಹಂಚಿಕೊಂಡಿದ್ದ ವಿಡಿಯೋದಲ್ಲಿ ಅವರು ರೈಲಿನ ಫುಟ್ ಬೋರ್ಡ್ ನಲ್ಲಿ ಕುರಿತು ಪ್ರಯಾಣಿಸಿದ್ದರು. ಇದಕ್ಕೆ ಉತ್ತರ ರೈಲ್ವೇಸ್ ಆಕ್ಷೇಪ ವ್ಯಕ್ತಪಡಿಸಿತ್ತು. ಈ ಬಗ್ಗೆ ಟ್ವೀಟ್ ಮಾಡಿದ್ದ ರೈಲ್ವೇಸ್ 'ಡಿಯರ್ ಸೋನು ಸೂದ್, ನೀವು ದೇಶ ಮತ್ತು ಪ್ರಪಂಚದ ಲಕ್ಷಾಂತರ ಜನರಿಗೆ ಆದರ್ಶವಾಗಿದ್ದೀರಿ. ರೈಲು ಮೆಟ್ಟಿಲುಗಳಲ್ಲಿ ಪ್ರಯಾಣಿಸುವುದು ಅಪಾಯಕಾರಿ. ಈ ರೀತಿಯ ವೀಡಿಯೊ ನಿಮ್ಮ ಅಭಿಮಾನಿಗಳಿಗೆ ತಪ್ಪು ಸಂದೇಶವನ್ನು ಕಳುಹಿಸಬಹುದು. ದಯವಿಟ್ಟು ಇದನ್ನು ಮಾಡಬೇಡಿ! ಸುಗಮ ಮತ್ತು ಸುರಕ್ಷಿತ ಪ್ರಯಾಣವನ್ನು ಆನಂದಿಸಿ ಎಂದು ಟ್ವೀಟಿಸಿತ್ತು.

ಕ್ಷಮೆ ಕೇಳಿದ ನಟ
ಈ ಟ್ವೀಟ್ ಗೆ ರೀಟ್ವೀಟ್ ಮಾಡುವ ಮೂಲಕ ಸೋನು ಸೂದ್ ರೈಲ್ವೇಸ್ ಕ್ಷಮೆಯನ್ನೂ ಕೇಳಿದ್ದಾರೆ. ರೈಲಿನ ಬಾಗಿಲಲ್ಲಿ ಇನ್ನೂ ಜೀವನ ಸಾಗುತ್ತಿರುವ ಲಕ್ಷಾಂತರ ಬಡವರು ಹೇಗೆ ಭಾವಿಸುತ್ತಿದ್ದಾರೆಂದು ನೋಡಲು ನಾನು ಇಲ್ಲಿ ಕುಳಿತಿದ್ದೆ. ಈ ಸಂದೇಶಕ್ಕಾಗಿ ಮತ್ತು ದೇಶದ ರೈಲ್ವೆ ವ್ಯವಸ್ಥೆಯನ್ನು ಸುಧಾರಿಸಿದ್ದಕ್ಕಾಗಿ ಧನ್ಯವಾದಗಳು ಎಂದು ಬರೆದಿದ್ದಾರೆ. 

ಚಲಿಸುತ್ತಿದ್ದ ರೈಲಿನ ಫುಟ್ ಬೋರ್ಡ್ ನಲ್ಲಿ ಸಾಹಸ ಮಾಡಲು ಹೋಗಿ ಎಷ್ಟೊ ಯುವಕರು ತಮ್ಮ ಜೀವ ಕಳೆದುಕೊಂಡಿರುವ ಘಟನೆಗಳು ದೇಶಾದ್ಯಂತ ವರದಿಯಾಗಿವೆ.