ನಟ ಕಲಾಭವನ್ ಮಣಿ ಅಸಹಜ ಸಾವು ಎಂದು ದೂರು ದಾಖಲಿಸಿಕೊಂಡ ಪೊಲೀಸ್

ಕೊಚ್ಚಿ: ಇತ್ತೀಚೆಗಷ್ಟೆ ಮೃತಪಟ್ಟಿದ್ದ ನಟ ಕಲಾಭವನ್ ಮಣಿ ಸಾವಿನ ಪ್ರಕರಣ ಹೊಸ ತಿರುವು ಪಡೆದಿದ್ದು ನಟ ಮಣಿ ಅಸಹಜ ಸಾವನ್ನಪ್ಪಿದ್ದಾರೆ ಎಂದು ಪೊಲೀಸರು ಸಂಶಯ ವ್ಯಕ್ತಪಡಿಸಿದ್ದಾರೆ.

ಲಿವರ್​ ಸಮಸ್ಯೆ ಹಾಗೂ ರಕ್ತದ ವಾಂತಿಯಿಂದ ಶನಿವಾರ ರಾತ್ರಿ ಕಲಾಭವನ್ ಮಣಿ ಚಾಲಕ್ಕಾಡಿನಲ್ಲಿರುವ ತೋಟದ ಮನೆಯಲ್ಲಿ ಪ್ರಜ್ಣೆತಪ್ಪಿ ಬಿದ್ದಿದ್ದರು. ಮಣಿರನ್ನು ಮೊದಲಿಗೆ ಸಮೀಪದ ಆಸ್ಪತ್ರೆಗೆ ದಾಖಲಿಸಿದರಾದರೂ ನಂತರ ಕೊಚ್ಚಿಯ ಖಾಸಗಿ ಆಸ್ಪತ್ರೆ ದಾಖಲಿಸಿದ್ದು, ಚಿಕಿತ್ಸೆ ಫಲಿಸದೆ ನಿಧನರಾಗಿದ್ದರು.  

ಮರಣೋತ್ತರ ಪರೀಕ್ಷೆ ನಡೆಸಿದ ಸಂದರ್ಬದಲ್ಲಿ ಮಣಿಯವರ ದೇಹದಲ್ಲಿ ಮಿಥೇಲ್ ಆಲ್ಕೋಹಾಲ್ ಅಂಶ ಕಂಡುಬಂದಿದೆ ಎನ್ನಲಾಗಿದೆ. ಅಲ್ಲದೆ ಶನಿವಾರ ರಾತ್ರಿ  ತೋಟದ ಮನೆಯಲ್ಲಿ ಮಣಿಯವರ ಜೊತೆ ಇನ್ನೂ ಮೂವರು ಬಂದಿದ್ದರು ಎಂದು ಪೊಲೀಸ್ ಮೂಲಗಳು ತಿಳಿಸಿವೆ.