ಪಾಕಿಸ್ತಾನದ ಆರಂಭಿಕ ಆಟಗಾರ ಶರ್ಜೀಲ್ ಖಾನ್ ಉತ್ತಮ ಪ್ರದರ್ಶನ ನೀಡಿದ್ದರೂ, ಅಹ್ಮದ್ ಶೆಹಜಾದ್ ಮೂರನೇ ಓವರ್‌ನಲ್ಲಿ ಕೇವಲ ಒಂದು ರನ್ ಬಾರಿಸಿ ಹಜೇಲ್‌ವುಡ್ ಎಸೆತದಲ್ಲಿ ಕೌಲ್ಟರ್ ನಿಲೆ ಕೈಗೆ ಕ್ಯಾಚಿತ್ತು ಪೆವಿಲಿಯನ್‌ಗೆ ಮರಳಬೇಕಾಗಿ ಬಂತು. ಅನಂತರ ಮೂರನೇ ಕ್ರಮಾಂಕದಲ್ಲಿ ಕ್ರೀಸ್‌ಗಿಳಿದ ಖಾಲಿದ್ ಲತೀಫ್, ಶರ್ಜೀಲ್ ಖಾನ್‌ಗೆ ಉತ್ತಮ ಸಾಥ್ ನೀಡಿದರು. 6 ನೇ ಓವರ್‌ನಲ್ಲಿ ಫಾಂಕ್ನರ್ ಎಸೆತಕ್ಕೆ ಶರ್ಜೀಲ್ (30) ವಿಕೆಟ್ ಕಳೆದುಕೊಂಡರು. ನಂತರ ಲತೀಫ್‌ಗೆ ಉಮರ್ ಅಕ್ಮಲ್ ಜತೆಯಾಗಿದ್ದು, ಇವರಿಬ್ಬರ ಜತೆಯಾಟ ಪಾಕಿಸ್ತಾನದ ಸ್ಕೋರ್ ಏರಿಕೆಯಾಗಲು ಸಹಾಯ ಮಾಡಿತು. ಏತನ್ಮಧ್ಯೆ, 11 ನೇ ಓವರ್‌ನಲ್ಲಿ ಜಂಪಾ ಅವರ ಖತರ್‌ನಾಕ್ ಬೌಲಿಂಗ್‌ಗೆ ಉಮರ್ ಅಕ್ಮಲ್ (32) ವಿಕೆಟ್ ಕಳೆದುಕೊಂಡರು.
