ಪುಣೆ: ಭಾರತದ ಖ್ಯಾತ ಕ್ರಿಕೆಟಿಗ, ಮಾಜಿ ನಾಯಕ ಮತ್ತು ಸ್ಪಿನ್ ಮಾಂತ್ರಿಕ ಅನಿಲ್ ಕುಂಬ್ಳೆ ಅವರ ದಾಖಲೆಯನ್ನು ಅಲ್ರೌಂಡರ್ ಆರ್.ಅಶ್ವಿನ್ ಶನಿವಾರ ಮುರಿದಿದ್ದಾರೆ. ಸ್ವದೇಶದಲ್ಲಿ ಆಡಿದ 10 ಟೆಸ್ಟ್ ಪಂದ್ಯಗಳಲ್ಲಿ ಅತಿ ಹೆಚ್ಚು ವಿಕೆಟ್ ಪಡೆದ ಸಾಧನೆ ಇದೀಗ ಅಶ್ವಿನ್ ಪಾಲಾಗಿದೆ. ಆ ಮೂಲಕ ಭಾರತದ ಸ್ಪಿನ್ ಅಸ್ತ್ರ ಅಶ್ವಿನ್ ನೂತನ ಮೈಲುಗಲ್ಲು ಸಾಧಿಸಿದ್ದಾರೆ.
ಪುಣೆಯಲ್ಲಿ ನಡೆಯುತ್ತಿರುವ ಆಸ್ಟ್ರೇಲಿಯಾ ವಿರುದ್ಧದ ಬಾರ್ಡರ್-ಗವಾಸ್ಕರ್ ಟ್ರೋಫಿ ಟೆಸ್ಟ್ ಸರಣಿಯ ಆರಂಭಿಕ ಪಂದ್ಯದ 3ನೇ ದಿನ ಅಶ್ವಿನ್ ಈ ಸಾಧನೆ ಮಾಡಿದ್ದು, ತವರಿನಲ್ಲಿ ತಮ್ಮ ಒಟ್ಟು ವಿಕೆಟ್ ಗಳ ಸಂಖ್ಯೆಯನ್ನು 68ಕ್ಕೆ ಏರಿಸಿಕೊಂಡಿದ್ದಾರೆ. ಈ ಹಿಂದೆ ಕುಂಬ್ಳೆ ತವರಿನಲ್ಲಿ 64 ವಿಕೆಟ್ ಗಳಿಸಿದ್ದು, ಈ ವರೆಗಿನ ಭಾರತೀಯ ಬೌಲರ್ ನ ಗರಿಷ್ಟ ವಿಕೆಟ್ ಗಳಿಕೆ ಸಾಧನೆಯಾಗಿತ್ತು. ಈ ಸಾಧನೆಯನ್ನು ಅಶ್ವಿನ್ ದಾಟಿದ್ದು, ತವರಿನಲ್ಲಿ ಅತೀ ಹೆಚ್ಚು ವಿಕೆಟ್ ಗಳಿಸಿದ ಕ್ರಿಕೆಟಿಗರ ಪಟ್ಟಿಯಲ್ಲಿ ಅಶ್ವಿನ್ ಎರಡನೇ ಸ್ಥಾನದಲ್ಲಿದ್ದಾರೆ. ದಕ್ಷಿಣ ಆಫ್ರಿಕಾದ ಡೇಲ್ ಸ್ಟೈಯ್ನ್ 78 ವಿಕೆಟ್ ಗಳಿಸಿ ಅಗ್ರ ಸ್ಥಾನದಲ್ಲಿದ್ದಾರೆ.
ಆಸಿಸ್ ಕ್ರಿಕೆಟ್ ದಂತಕಥೆ ಗ್ಲೇನ್ ಮೆಗ್ರಾತ್ ದಾಖಲೆಯೂ ಧೂಳಿಪಟ
ಇನ್ನು ಇದೇ ಪಂದ್ಯದಲ್ಲಿ ಅಶ್ವಿನ್ ಆಸ್ಟ್ರೇಲಿಯಾ ತಂಡ ಬೌಲಿಂಗ್ ದಂತಕಥೆ ಗ್ಲೇನ್ ಮೆಗ್ರಾತ್ ಅವರ ದಾಖಲೆಯನ್ನೂ ಕೂಡ ಮುರಿದಿದ್ದಾರೆ, ಮೆಗ್ರಾತ್ ತವರಿನಲ್ಲಿ 66 ವಿಕೆಟ್ ಗಳಿಸಿದ್ದು, ಅಶ್ವಿನ್ 68 ವಿಕೆಟ್ ಕಬಳಿಸುವ ಮೂಲಕ ಅವರ ದಾಖಲೆಯನ್ನೂ ಹಿಂದಿಕ್ಕಿದ್ದಾರೆ.
