ಐಸಿಸಿ ಟೆಸ್ಟ್ ಶ್ರೇಣಿ: ಜಡೇಜಾ ಟಾಪ್, 2ನೇ ಸ್ಥಾನಕ್ಕೇರಿದ ಅಶ್ವಿನ್

ಆ.1 ರಂದು ಐಸಿಸಿ ಟೆಸ್ಟ್ ಶ್ರೇಣಿ ಬಿಡುಗಡೆಗೊಂಡಿದ್ದು, ಬೌಲಿಂಗ್ ವಿಭಾಗದಲ್ಲಿ ಟಾಪ್ ನಲ್ಲಿದ್ದ ಜಡೇಜಾ ತಮ್ಮ ಸ್ಥಾನವನ್ನು ಕಾಯ್ದುಕೊಂಡಿದ್ದರೆ, ಅಶ್ವಿನ್ 2 ನೇ ಸ್ಥಾನಕ್ಕೇರಿದ್ದಾರೆ.

ಬ್ಯಾಟಿಂಗ್ ವಿಭಾಗದಲ್ಲಿ ವಿರಾಟ್ ಕೋಹ್ಲಿ 5 ನೇ ಸ್ಥಾನದಲ್ಲಿದ್ದು ತಮ್ಮ ಸ್ಥಾನವನ್ನು ಉಳಿಸಿಕೊಂಡಿದ್ದರೆ, 4 ನೇ ಸ್ಥಾನದಲ್ಲಿರುವ ಚೇತಶ್ವರ ಪೂಜಾರ ಭಾರತದ ಟಾಪ್ ಶ್ರೇಣಿಯಲ್ಲಿರುವ ಬ್ಯಾಟ್ಸ್ ಮನ್ ಎನಿಸಿದ್ದಾರೆ. ಇನ್ನು ಪ್ರಾರಂಭಿಕ ಆಟಗಾರ ಶಿಖರ್ ಧವನ್ 39 ನೇ ಸ್ಥಾನದಲ್ಲಿದ್ದಾರೆ. 

ಬ್ಯಾಟಿಂಗ್ ವಿಭಾಗದಲ್ಲಿ ಆಸ್ಟ್ರೇಲಿಯಾ ತಂಡದ ನಾಯಕ ಸ್ಟೀವ್ ಸ್ಮಿತ್ ಅಗ್ರಸ್ಥಾನದಲ್ಲಿದ್ದರೆ, ಇಂಗ್ಲೆಂಡ್ ನ ಜೋ ರೂಟ್ ಹಾಗೂ ನ್ಯೂ ಜಿಲ್ಯಾಂಡ್ ನ ಕೇನ್ ವಿಲಿಯಮ್ಸನ್ ಅನುಕ್ರಮವಾಗಿ ನಂತರದ ಸ್ಥಾನದಲ್ಲಿದ್ದಾರೆ. ಬೌಲಿಂಗ್ ವಿಭಾಗದಲ್ಲಿ ರವಿಚಂದ್ರನ್ ಅಶ್ವಿನ್ ಶ್ರೀಲಂಕಾ ತಂಡದ ಸ್ಪಿನ್ ಬೌಲರ್ ರಂಗನಾ ಹೆರಾತ್ ಅವರನ್ನು ಹಿಂದಿಕ್ಕಿದ್ದು, ರಂಗನಾ ಹೆರಾತ್ 3 ನೇ ಸ್ಥಾನಕ್ಕೆ ಕುಸಿದಿದ್ದಾರೆ.