ಆಸಿಸ್ ವಿರುದ್ಧ ಸರಣಿ ಮಾತ್ರವಲ್ಲ ಇತರೆ ಸರಣಿಗಳಲ್ಲಿಯೂ ಭಾರತದ ರಿವ್ಯೂ ಆಯ್ಕೆ ಅಮೋಘವಾಗಿತ್ತು. ಅದಕ್ಕೆ ಕಾರಣ ಮಾಜಿ ನಾಯಕ ಎಂಎಸ್ ಧೋನಿ..ಧೋನಿ ರಿವ್ಯೂ ಪಡೆದ ಪ್ರತೀಭಾರಿಯ ಫಲಿತಾಂಶವೂ ಭಾರತದ ಪರವಾಗಿತ್ತು. ಅಷ್ಟು ಕರಾರುವಕ್ಕಾಗಿ ಔಟ್ ಅಥವಾ ನಾಟ್ ಔಟ್ ಅನ್ನು ಧೋನಿ ಗುರುತಿಸುತ್ತಿದ್ದರು. ಇದೇ ಕಾರಣಕ್ಕೆ ಡಿಆರ್ ಎಸ್ ಅನ್ನು ಡಿಸಿಷನ್ ರಿವ್ಯೂ ಸಿಸ್ಟಮ್ ಬದಲಿಗೆ ಧೋನಿ ರಿವ್ಯೂ ಸಿಸ್ಟಮ್ ಎಂದು ಕರೆಯುತ್ತಿದ್ದರು.
ಆದರೆ ಇಂದಿನ ಪಂದ್ಯದಲ್ಲಿ ಮಾತ್ರ ಧೋನಿ ಕೊಂಚ ಗೊಂದಲಕ್ಕೆ ಒಳಗಾದಂತೆ ಕಂಡುಬಂದರು. ರಿವ್ಯೂ ಪಡೆಯುವ ಗೊಂದಲದಿಂದಾಗಿ ಜೀವದಾನ ಪಡೆದ ಆಸಿಸ್ ತಂಡದ ಹೆನ್ರಿಕ್ಸ್ ಭರ್ಜರಿ ಆಟವಾಡಿದರು. ಕೇವಲ 46 ಎಸೆತಗಳಲ್ಲಿ 4 ಸಿಕ್ಸರ್ ಮತ್ತು 4 ಬೌಂಡರಿಗಳ ಸಹಾಯದಿಂದ 62 ರನ್ ಸಿಡಿಸಿದರು.
ಇದೇ ಹೆನ್ರಿಕ್ಸ್ ಇನ್ನಿಂಗ್ಸ್ ನ ಐದನೇ ಓವರ್ ನಲ್ಲೇ ಔಟ್ ಆಗಿದ್ದರು..ಹೌದು.. ಭುವನೇಶ್ವರ್ ಕುಮಾರ್ ಎಸೆದ ಐದನೇ ಓವರ್ ನ ಐದನೇ ಎಸೆತದಲ್ಲಿ ಹೆನ್ರಿಕ್ಸ್ ಬ್ಯಾಟ್ ಅಂಚು ಸವರಿದ್ದ ಚೆಂಡು ಧೋನಿ ಕೈ ಸೇರಿತ್ತು. ವಿರಾಟ್ ಕೊಹ್ಲಿ ಮತ್ತು ಬೌಲರ್ ಭುವಿ ಆತ್ಮವಿಶ್ವಾಸದಿಂದಲೇ ಔಟ್ ಗೆ ಅಪೀಲ್ ಮಾಡಿದರು. ಆದರೆ ವಿಕೆಟ್ ಹಿಂದೆ ನಿಂತಿದ್ದ ಧೋನಿ ಮಾತ್ರ ಔಟ್ ಮತ್ತು ನಾಟ್ ಔಟ್ ಗೊಂದಲದಲ್ಲಿದ್ದರು. ಅಂತಿಮವಾಗಿ ನಾಟ್ ಔಟ್ ಆಗಿರಬಹುದು ಎಂದು ತೀರ್ಮಾನಿಸಿ ಡಿಆರ್ ಎಸ್ ಬೇಡ ಎಂದು ನಿರ್ಧರಿಸಿದರು. ಕೊಹ್ಲಿ ಕೂಡ ಧೋನಿ ಮಾತಿಗೆ ತಲೆಯಾಡಿಸಿದರು.
ಆದರೆ ಬಳಿರ ರೀಪ್ಲೇ ವೇಳೆ ಚೆಂಡು ಬ್ಯಾಟ್ ನ ಅಂಚನ್ನು ಸವರಿದ್ದು ಸ್ಪಷ್ಟವಾಗಿತ್ತು. ಸ್ನಿಕೋ ಮೀಟರ್ ನಲ್ಲೂ ಕೂಡ ಇದು ಸ್ಪಷ್ಟವಾಗಿತ್ತು. ಆದರೆ ಧೋನಿ ಮತ್ತು ಕೊಹ್ಲಿ ನಡುವಿನ ಗೊಂದಲದಿಂದಾಗಿ ಹೆನ್ರಿಕ್ಸ್ ಔಟ್ ನಾಟ್ ಔಟ್ ಆಯಿತು..
ಬಹುಶಃ ಅದೇ ಓವರ್ ನಲ್ಲಿ ಹೆನ್ರಿಕ್ಸ್ ಔಟ್ ಆಗಿದ್ದರೆ, ಪಂದ್ಯ ಫಲಿತಾಂಶ ಬೇರೆಯಾಗಿರುತ್ತಿತ್ತೇನೋ...!
