ಟೆಸ್ಟ್‌ನಂತೆ, ಏಕದಿನ ಸರಣಿಯಲ್ಲೂ ಲಂಕಾ ದಹನ?

ಕೊಲಂಬೊ: ಶ್ರೀಲಂಕಾ ವಿರುದ್ಧದ ಟೆಸ್ಟ್ ಸರಣಿಯನ್ನು ವೈಟ್ ವಾಷ್ ಮಾಡಿದ್ದ ಟೀಂ ಇಂಡಿಯಾ ಇದೀಗ ಲಂಕಾ ವಿರುದ್ಧದ ಐದನೇ ಏಕದಿನ ಪಂದ್ಯವನ್ನು ಗೆಲ್ಲುವ ಮೂಲಕ ಏಕದಿನ ಸರಣಿಯನ್ನು ಕ್ಲೀನ್ ಸ್ವೀಪ್ ಮಾಡುವ ತವಕದಲ್ಲಿದೆ. 

ಐದು ಪಂದ್ಯಗಳ ಏಕದಿನ ಪಂದ್ಯದಲ್ಲಿ ಟೀಂ ಇಂಡಿಯಾ ನಾಲ್ಕು ಪಂದ್ಯಗಳಲ್ಲಿ ಗೆಲ್ಲುವ ಮೂಲಕ ಸರಣಿ ಕೈವಶ ಮಾಡಿಕೊಂಡಿದೆ. ಇನ್ನು ಅಂತಿಮ ಪಂದ್ಯದಲ್ಲಿ ಗೆದ್ದು ಲಂಕಾ ತಂಡವನ್ನು ವೈಟ್ ವಾಷ್ ಮಾಡಲು ಟೀಂ ಇಂಡಿಯಾ ಯೋಜನೆ ರೂಪಿಸಿದೆ. ಇನ್ನು ಅಂತಿಮ ಪಂದ್ಯದಲ್ಲಾದರೂ ಗೆದ್ದು ಮರ್ಯಾದೆ ಉಳಿಸಿಕೊಳ್ಳುವ ಒತ್ತಡದಲ್ಲಿ ಲಂಕಾ ತಂಡ ಸಿದ್ಧತೆ ನಡೆಸಿದೆ. 

ಲಂಕಾ ವಿರುದ್ಧದ ಐದನೇ ಪಂದ್ಯವನ್ನು ಟೀಂ ಇಂಡಿಯಾ ಗೆದ್ದರೆ ಆಗ ಏಕದಿನ ಇತಿಹಾಸದಲ್ಲಿ ಭಾರತದ 11ನೇ ವೈಟ್ ವಾಷ್ ಸಾಧನೆ ಮಾಡಿದ ತಂಡ ಎನಿಸಿಕೊಳ್ಳುತ್ತದೆ. ಇನ್ನು ಈ ಪಂದ್ಯದಲ್ಲಿ ಲಂಕಾ ಸೋತರೆ ಸತತ 2 ಸರಣಿಗಳಲ್ಲಿ 5-0 ಸೋಲಿಗೆ ಗುರಿಯಾಗುತ್ತದೆ. 2014ರ ಭಾರತ ಪ್ರವಾಸದ ವೇಳೆ ಲಂಕಾ 5-0 ಅಂತರದಿಂದ ಆಘಾತಕ್ಕೊಳಗಾಗಿತ್ತು. 

ಟೀಂ ಇಂಡಿಯಾ ಈವರೆಗೆ 4 ಸಲ 5 ಪಂದ್ಯಗಳ ಸರಣಿಯನ್ನು ಕ್ಲೀನ್ ಸ್ವೀಪ್ ಮಾಡಿದೆ. ಇಂಗ್ಲೆಂಡ್ ತಂಡವನ್ನು 2 ಬಾರಿ, ಜಿಂಬಾಬ್ವೆ ಮತ್ತು ಲಂಕಾ ತಂಡಕ್ಕೆ ಒಂದೊಂದು ಸಲ 5-0 ಸೋಲಿನ ರುಚಿ ತೋರಿಸಿದೆ.