ಅಡಿಲೇಡ್ ಟೆಸ್ಟ್ ಗೆಲುವು 2003 ರ ನೆನಪುಗಳನ್ನು ಮರುಕಳಿಸಿತು: ಸಚಿನ್ ತೆಂಡೂಲ್ಕರ್

ನವದೆಹಲಿ: ಅಡಿಲೇಡ್ ನಲ್ಲಿ ನಡೆದ ಭಾರತ-ಆಸ್ಟ್ರೇಲಿಯಾ ನಡುವಿನ ಮೊದಲ ಟೆಸ್ಟ್ ಪಂದ್ಯದಲ್ಲಿ ಭಾರತ ಐತಿಹಾಸಿಕ ಗೆಲುವು ದಾಖಲಿಸಿದ್ದು, ಭಾರತದ ಗೆಲುವು ಮಾಜಿ ಕ್ರಿಕೆಟಿಗ ಸಚಿನ್ ತೆಂಡೂಲ್ಕರ್ ಅವರಿಗೆ 2003 ರ ಟೆಸ್ಟ್ ನ ನೆನಪುಗಳನ್ನು ಮರುಕಳಿಸಿದೆ. 

ಡಿ.10 ರಂದು ಆಸ್ಟ್ರೇಲಿಯಾ ವಿರುದ್ಧ 31 ರನ್ ಗಳ ಗೆಲುವು ದಾಖಲಿಸುವ ಮೂಲಕ ಭಾರತ ತಂಡ ಆಸ್ಟ್ರೇಲಿಯಾ ವಿರುದ್ಧದ ಟೆಸ್ಟ್ ಸರಣಿಯಲ್ಲಿ 1-0 ಮುನ್ನಡೆ ಕಾಯ್ದುಕೊಂಡಿದೆ. ಆಸ್ಟ್ರೇಲಿಯಾ ನೆಲದಲ್ಲಿ ಭಾರತ ಗೆದ್ದಿರುವ 6 ನೇ ಟೆಸ್ಟ್ ಪಂದ್ಯ ಇದಾಗಿದ್ದು, 2003 ರಲ್ಲಿ ಇದೇ ರೀತಿಯಲ್ಲಿ ಭಾರತ ರಾಹುಲ್ ದ್ರಾವಿಡ್ ಹಾಗೂ ಅಜಿತ್ ಅಗರ್ಕರ್ ನೆರವಿನಿಂದ ಐತಿಹಾಸಿಕ ಗೆಲುವು ದಾಖಲಿಸಿತ್ತು. 

ಭಾರತದ ಇಂದಿನ ಗೆಲುವಿನ ಬಗ್ಗೆ ಮಾಜಿ ಕ್ರಿಕೆಟಿಗ ಸಚಿನ್ ತೆಂಡೂಲ್ಕರ್ ಟ್ವೀಟ್ ಮಾಡಿದ್ದು, ಸರಣಿಯ ಆರಂಭ ಅದ್ಭುತವಾಗಿತ್ತು, ಚೇತೇಶ್ವರ ಪೂರಾಜ ಅತ್ಯುತ್ತಮವಾಗಿ ಬ್ಯಾಟಿಂಗ್ ಮಾಡಿದರು, 2 ನೇ ಇನ್ನಿಂಗ್ಸ್ ನಲ್ಲಿ ಅಜಿಂಕ್ಯ ರೆಹಾನೆ ಉತ್ತಮ ಬ್ಯಾಟಿಂಗ್ ಹಾಗೂ 4 ಬೌಲರ್ ಗಳು ಉತ್ತಮ ಆಟ ಪ್ರದರ್ಶಿಸಿದರು, ಇಂದಿನ ಗೆಲುವು 2003ರಲ್ಲಿ ಭಾರತದ ಗೆಲುವನ್ನು ನೆನಪಿಸಿತು ಎಂದು ಹೇಳಿದ್ದಾರೆ.