ಚಾಂಪಿಯನ್ಸ್ ಟ್ರೋಫಿ ಇತಿಹಾಸದಲ್ಲೇ ಮೊದಲು: ಬೃಹತ್ ಶತಕದೊಂದಿಗೆ ಗಂಗೂಲಿ ದಾಖಲೆ ಮುರಿದ ಬೆನ್ ಡಕೆಟ್!

ಲಾಹೋರ್: 2025ರ ಐಸಿಸಿ ಚಾಂಪಿಯನ್ಸ್ ಟ್ರೋಫಿಯ ನಾಲ್ಕನೇ ಪಂದ್ಯದಲ್ಲಿ ಇಂಗ್ಲೆಂಡ್ ಆರಂಭಿಕ ಆಟಗಾರ ಬೆನ್ ಡಕೆಟ್ ತಮ್ಮ ಸ್ಫೋಟಕ ಬ್ಯಾಟಿಂಗ್ ಮೂಲಕ ಇತಿಹಾಸ ಸೃಷ್ಟಿಸಿದರು. ಇಂಗ್ಲೆಂಡ್ ಪರ ಬೆನ್ ಡಕೆಟ್ 165 ರನ್‌ಗಳ ದಾಖಲೆಯ ಇನ್ನಿಂಗ್ಸ್ ಆಡಿದರು. ಇದರೊಂದಿಗೆ, ಅವರು ಐಸಿಸಿ ಚಾಂಪಿಯನ್ಸ್ ಟ್ರೋಫಿಯ ಇತಿಹಾಸದಲ್ಲಿ ಅತಿದೊಡ್ಡ ಇನ್ನಿಂಗ್ಸ್ ಆಡಿದ ಬ್ಯಾಟ್ಸ್‌ಮನ್ ಎನಿಸಿಕೊಂಡಿದ್ದಾರೆ. ಈ ಪಂದ್ಯಾವಳಿಯಲ್ಲಿ ಬೆನ್ ಡಕೆಟ್ 21 ವರ್ಷಗಳ ಹಳೆಯ ದಾಖಲೆಯನ್ನು ಮುರಿದ ಸಾಧನೆ ಮಾಡಿದ್ದಾರೆ. ಬೆನ್ ಡಕೆಟ್ ತಮ್ಮ ಇನ್ನಿಂಗ್ಸ್‌ನಲ್ಲಿ 143 ಎಸೆತಗಳನ್ನು ಎದುರಿಸಿದ್ದು 17 ಬೌಂಡರಿ ಮತ್ತು 3 ಸಿಕ್ಸರ್‌ಗಳನ್ನು ಬಾರಿಸಿದ್ದಾರೆ.

ಬೆನ್ ಡಕೆಟ್ ಗಿಂತ ಮೊದಲು, ಚಾಂಪಿಯನ್ಸ್ ಟ್ರೋಫಿಯಲ್ಲಿ ಅತಿ ಹೆಚ್ಚು ರನ್ ದಾಖಲೆ ನ್ಯೂಜಿಲೆಂಡ್‌ನ ನಾಥನ್ ಆಸ್ಟಲ್ ಅವರದ್ದಾಗಿತ್ತು. 2004ರಲ್ಲಿ ಅಮೆರಿಕ ವಿರುದ್ಧ ನಾಥನ್ ಆಸ್ಟಲ್ ಅಜೇಯ 145 ರನ್ ಗಳಿಸಿದ್ದರು. ಈ ಸಂದರ್ಭದಲ್ಲಿ, ಜಿಂಬಾಬ್ವೆಯ ಮಾಜಿ ಶ್ರೇಷ್ಠ ಬ್ಯಾಟ್ಸ್‌ಮನ್ ಆಂಡಿ ಫ್ಲವರ್ ಕೂಡ ನಾಥನ್ ಆಸ್ಟಲ್ ಅವರೊಂದಿಗೆ ಜಂಟಿಯಾಗಿ ಎರಡನೇ ಸ್ಥಾನ ಪಡೆದಿದ್ದಾರೆ. 2004 ರಲ್ಲಿ ಆಂಡಿ ಫ್ಲವರ್ ಭಾರತದ ವಿರುದ್ಧ 145 ರನ್‌ಗಳ ಇನ್ನಿಂಗ್ಸ್ ಆಡಿದರು. ಈ ಪಟ್ಟಿಯಲ್ಲಿ ಟೀಮ್ ಇಂಡಿಯಾ ಮಾಜಿ ನಾಯಕ ಸೌರವ್ ಗಂಗೂಲಿ ಮೂರನೇ ಸ್ಥಾನದಲ್ಲಿದ್ದಾರೆ. 2000ನೇ ಇಸವಿಯಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ ಗಂಗೂಲಿ ಅಜೇಯ 141 ರನ್ ಗಳಿಸಿದ್ದರು.

ಚಾಂಪಿಯನ್ಸ್ ಟ್ರೋಫಿಯಲ್ಲಿ ಅತ್ಯಧಿಕ ರನ್ ದಾಖಲೆ

* ಬೆನ್ ಡಕೆಟ್ - 165 ರನ್‌ಗಳು

* ನಾಥನ್ ಆಸ್ಟ್ಲೆ - 145 ರನ್‌ಗಳು

* ಆಂಡಿ ಫ್ಲವರ್ - 145 ರನ್‌ಗಳು

* ಸೌರವ್ ಗಂಗೂಲಿ - 141 ರನ್ಗಳು

ಬೆನ್ ಡಕೆಟ್ ಅವರ ಈ ಅದ್ಭುತ ಶತಕದ ನೆರವಿನಿಂದ ಇಂಗ್ಲೆಂಡ್ 351 ರನ್‌ಗಳ ಬೃಹತ್ ಮೊತ್ತವನ್ನು ಗಳಿಸಿತು. ಇದು ಚಾಂಪಿಯನ್ಸ್ ಟ್ರೋಫಿ ಇತಿಹಾಸದಲ್ಲಿ ಯಾವುದೇ ತಂಡವು ಗಳಿಸಿದ ಅತ್ಯಧಿಕ ಸ್ಕೋರ್ ಆಗಿದೆ. ಪಂದ್ಯದಲ್ಲಿ ಡಕೆಟ್ ಕೇವಲ 96 ಎಸೆತಗಳಲ್ಲಿ ಶತಕ ಪೂರೈಸಿದರು. ಬೆನ್ ಡಕೆಟ್ ಜೊತೆಗೆ, ಜೋ ರೂಟ್ ಕೂಡ ಇಂಗ್ಲೆಂಡ್ ಪರ ಅರ್ಧಶತಕ ಗಳಿಸಿದರು. ರೂಟ್ ತಮ್ಮ ತಂಡಕ್ಕಾಗಿ 78 ಎಸೆತಗಳಲ್ಲಿ 68 ರನ್ ಗಳಿಸಿದ ನಂತರ ಔಟಾದರು. ಈ ಇಬ್ಬರು ಬ್ಯಾಟ್ಸ್‌ಮನ್‌ಗಳನ್ನು ಹೊರತುಪಡಿಸಿ, ಬೇರೆ ಯಾರ ಇನ್ನಿಂಗ್ಸ್ ಕೂಡ ಆಕರ್ಷಕವಾಗಿರಲಿಲ್ಲ.

ಬೌಲಿಂಗ್ ಬಗ್ಗೆ ಮಾತನಾಡಿದರೆ, ಆಸ್ಟ್ರೇಲಿಯಾದ ಆಟಗಾರರು ತುಂಬಾ ಸಾಮಾನ್ಯರಾಗಿದ್ದರು. ತಂಡದ ಪರ ಬೆನ್ ದ್ವಾರಶುಯಿಸ್ ಗರಿಷ್ಠ ಮೂರು ವಿಕೆಟ್ ಪಡೆದರು. ಇದಲ್ಲದೆ, ಮಾರ್ನಸ್ ಲ್ಯಾಬುಶೇನ್ ಮತ್ತು ಆಡಮ್ ಜಂಪಾ ತಲಾ ಎರಡು ವಿಕೆಟ್ ಪಡೆದರೆ, ಅರೆಕಾಲಿಕ ಬೌಲರ್ ಗ್ಲೆನ್ ಮ್ಯಾಕ್ಸ್‌ವೆಲ್ ಕೂಡ ಒಂದು ವಿಕೆಟ್ ಪಡೆದರು.