U19 ವಿಶ್ವಕಪ್: ಜಿಂಬಾಬ್ವೆ ತಂಡವನ್ನು 204 ರನ್ ಗಳಿಂದ ಮಣಿಸಿದ ಭಾರತ; ಸೂಪರ್ ಸಿಕ್ಸ್‌ನಲ್ಲಿ ನಂಬರ್ 1 ಸ್ಥಾನ!

2026ರ ಅಂಡರ್-19 ವಿಶ್ವಕಪ್‌ನಲ್ಲಿ ಭಾರತ ತಂಡ ಜಿಂಬಾಬ್ವೆಯನ್ನು 204 ರನ್‌ಗಳಿಂದ ಸೋಲಿಸಿ ಸೂಪರ್ ಸಿಕ್ಸ್‌ನ ಗ್ರೂಪ್ 2ರಲ್ಲಿ ಮೊದಲ ಸ್ಥಾನಕ್ಕೇರಿದೆ. ಭಾರತ ತಂಡಕ್ಕೆ ಸೆಮಿಫೈನಲ್ ತಲುಪಲು ಕೇವಲ ಒಂದು ಪಾಯಿಂಟ್ ಅಗತ್ಯವಿದೆ. ಮುಂದಿನ ಪಂದ್ಯ ಡ್ರಾ ಅಥವಾ ಗೆಲ್ಲುವ ಮೂಲಕ ಈ ಹಂತವನ್ನು ತಲುಪಬಹುದು. ಮೊದಲು ಬ್ಯಾಟಿಂಗ್ ಮಾಡಿದ ಭಾರತ ತಂಡ 50 ಓವರ್‌ಗಳಲ್ಲಿ 8 ವಿಕೆಟ್‌ಗಳ ನಷ್ಟಕ್ಕೆ 352 ರನ್ ಗಳಿಸಿತು. 353 ರನ್‌ಗಳ ಗುರಿಯನ್ನು ಬೆನ್ನಟ್ಟಿದ ಜಿಂಬಾಬ್ವೆ 38ನೇ ಓವರ್‌ನಲ್ಲಿ 148 ರನ್‌ಗಳಿಗೆ ಆಲೌಟ್ ಆಯಿತು. ಇದು ಟೂರ್ನಿಯಲ್ಲಿ ಟೀಮ್ ಇಂಡಿಯಾದ ಸತತ ಮೂರನೇ ಗೆಲುವಾಗಿದೆ.

ಈ ಪಂದ್ಯದಲ್ಲಿ ಜಿಂಬಾಬ್ವೆ ಟಾಸ್ ಗೆದ್ದು ಮೊದಲು ಬೌಲಿಂಗ್ ಮಾಡಲು ನಿರ್ಧರಿಸಿತು. ವೈಭವ್ ಸೂರ್ಯವಂಶಿ, ಆರನ್ ಜಾರ್ಜ್ ಅವರೊಂದಿಗೆ ಇನ್ನಿಂಗ್ಸ್ ಆರಂಭಿಸಿ ಬೇಗನೆ ರನ್ ಗಳಿಸುವ ಮೂಲಕ ಭಾರತ ತಂಡ ಉತ್ತಮ ಆರಂಭವನ್ನು ಪಡೆಯಿತು. ಈ ಇಬ್ಬರೂ ನಾಲ್ಕು ಓವರ್‌ಗಳಲ್ಲಿ 44 ರನ್‌ ಪೇರಿಸಿದರು. ಆದರೆ ಐದನೇ ಓವರ್‌ನ ಮೊದಲ ಎಸೆತದಲ್ಲಿ ಆರನ್ ಜಾರ್ಜ್ ಔಟಾದರು. ನಂತರ ನಾಯಕ ಆಯುಷ್ ಮ್ಹಾತ್ರೆ 21 ರನ್‌ಗಳಿಗೆ ಮತ್ತು ವೇದಾಂತ್ ತ್ರಿವೇದಿ 15 ರನ್‌ಗಳಿಗೆ ಔಟಾದರು. ವೈಭವ್ ಸೂರ್ಯವಂಶಿ ಅವರಿಗೆ ವಿಹಾನ್ ಮಲ್ಹೋತ್ರಾ ಸಾಥ್ ನೀಡಿದರು. ಅರ್ಧಶತಕ ಗಳಿಸಿದ ಸ್ವಲ್ಪ ಸಮಯದ ನಂತರ ವೈಭವ್ ಔಟಾದರು.

ನಂತರ ವಿಹಾನ್ ಮಲ್ಹೋತ್ರಾ ಅವರೊಂದಿಗೆ ಅಭಿಗ್ಯಾನ್ ಕುಂಡು ಸೇರಿಕೊಂಡರು. ಇಬ್ಬರೂ ತಂಡವನ್ನು 240 ರನ್‌ಗಳ ಗಡಿ ದಾಟಿಸಿದರು. ಅಭಿಗ್ಯಾನ್ ಕುಂಡು 61 ರನ್‌ಗಳಿಗೆ ಔಟಾದರು. ಇನ್ನು ವಿಹಾನ್ ಮಲ್ಹೋತ್ರಾ ಅದ್ಭುತ ಶತಕ ಗಳಿಸಿ 109 ರನ್ ಗಳಿಸಿದರು. ಕೊನೆಯ ಓವರ್‌ಗಳಲ್ಲಿ, ಖೇಲನ್ ಪಟೇಲ್ 12 ಎಸೆತಗಳಲ್ಲಿ 30 ರನ್ ಗಳಿಸಿ ಟೀಮ್ ಇಂಡಿಯಾವನ್ನು 350 ರನ್‌ಗಳ ಗಡಿ ದಾಟಿಸಿದರು. 353 ರನ್‌ಗಳ ಗುರಿಯನ್ನು ಬೆನ್ನಟ್ಟಿದ ಜಿಂಬಾಬ್ವೆ ಕಳಪೆ ಆರಂಭವನ್ನು ನೀಡಿತು. ಕೇವಲ 24 ರನ್‌ಗಳಿಗೆ ಮೂರು ವಿಕೆಟ್‌ಗಳನ್ನು ಕಳೆದುಕೊಂಡಿತು. ಜಿಂಬಾಬ್ವೆಯ ಬ್ಯಾಟಿಂಗ್ ಭಾರತೀಯ ಬೌಲರ್‌ಗಳ ವಿರುದ್ಧ ಹೆಚ್ಚು ಹೊತ್ತು ನಿಲ್ಲಲು ಸಾಧ್ಯವಾಗಲಿಲ್ಲ. ಇಡೀ ತಂಡವು 38ನೇ ಓವರ್‌ನಲ್ಲಿ 148 ರನ್‌ಗಳಿಗೆ ಆಲೌಟ್ ಆಯಿತು.

ಭಾರತದ ಪರ ಉದ್ಧವ್ ಮೋಹನ್ ಮತ್ತು ನಾಯಕ ಆಯುಷ್ ಮ್ಹಾತ್ರೆ ತಲಾ ಮೂರು ವಿಕೆಟ್ ಪಡೆದರೆ, ಅಂಬ್ರಿಸ್ ಎರಡು ವಿಕೆಟ್ ಪಡೆದರು. ಅನಿಲ್ ಪಟೇಲ್ ಮತ್ತು ಖೇಲನ್ ಪಟೇಲ್ ತಲಾ ಒಂದು ವಿಕೆಟ್ ಪಡೆದರು. ಭಾರತ ತಂಡವು ಫೆಬ್ರವರಿ 1ರಂದು ನಡೆಯಲಿರುವ ಅಂತಿಮ ಸೂಪರ್ ಸಿಕ್ಸ್ ಗುಂಪು ಪಂದ್ಯದಲ್ಲಿ ಪಾಕಿಸ್ತಾನವನ್ನು ಎದುರಿಸಲಿದೆ.