1983ರ ವಿಶ್ವಕಪ್ ಆಟಗಾರನ ದಾಖಲೆ ಧೂಳಿಪಟ; ಮೈದಾನಕ್ಕಿಳಿಯುತ್ತಿದ್ದಂತೆ 37 ವರ್ಷದ ಹಳೆಯ ದಾಖಲೆ ಮುರಿದ ರೋಹಿತ್!

ಭಾರತ ಮತ್ತು ಅಫ್ಘಾನಿಸ್ತಾನ ನಡುವಿನ ಮೂರು ಪಂದ್ಯಗಳ ಏಕದಿನ ಸರಣಿಯ ಮೊದಲ ಪಂದ್ಯ ಇಂದು ಧರ್ಮಶಾಲಾದ ಹಿಮಾಚಲ ಪ್ರದೇಶ ಕ್ರಿಕೆಟ್ ಅಸೋಸಿಯೇಷನ್ ​​ಕ್ರೀಡಾಂಗಣದಲ್ಲಿ ನಡೆಯುತ್ತಿದೆ. ವಿರಾಟ್ ಕೊಹ್ಲಿ ಗಾಯದ ಕಾರಣದಿಂದಾಗಿ ಸರಣಿಯಿಂದ ಹೊರಗುಳಿದಿರುವುದರಿಂದ ಎಲ್ಲರ ಕಣ್ಣುಗಳು ರೋಹಿತ್ ಶರ್ಮಾ ಮೇಲಿತ್ತು. ಐಪಿಎಲ್ 2026 ರ ಸಮಯದಲ್ಲಿ ಮಂಡಿರಜ್ಜು ಗಾಯದಿಂದ ಬಳಲುತ್ತಿದ್ದ ರೋಹಿತ್ ಶರ್ಮಾ ಗಾಯದಿಂದ ಮರಳುತ್ತಿದ್ದಾರೆ. ಈಗ, ಬಿಸಿಸಿಐ ಪರೀಕ್ಷೆಯಲ್ಲಿ ಉತ್ತೀರ್ಣರಾದ ಅವರು ಅಫ್ಘಾನಿಸ್ತಾನ ವಿರುದ್ಧ ಆಡುತ್ತಿದ್ದಾರೆ. ಧರ್ಮಶಾಲಾದಲ್ಲಿ ಮೈದಾನಕ್ಕಿಳಿಯುತ್ತಿದ್ದಂತೆ ರೋಹಿತ್ ಶರ್ಮಾ 37 ವರ್ಷಗಳ ಹಳೆಯ ದಾಖಲೆಯನ್ನು ಮುರಿದು ಭಾರತಕ್ಕಾಗಿ ಏಕದಿನ ಪಂದ್ಯಗಳಲ್ಲಿ ಆಡಿದ ಅತ್ಯಂತ ಹಿರಿಯ ಆಟಗಾರ ಎನಿಸಿಕೊಂಡಿದ್ದಾರೆ.

ಹೌದು, ಈ ದಾಖಲೆಯನ್ನು ಈ ಹಿಂದೆ 1983ರ ವಿಶ್ವಕಪ್ ವಿಜೇತ ತಂಡದ ಆಟಗಾರ ಮೊಹಿಂದರ್ ಅಮರ್‌ನಾಥ್ ಹೊಂದಿದ್ದರು. ಮೊಹಿಂದರ್ ಅಮರ್‌ನಾಥ್ 1989ರಲ್ಲಿ ತಮ್ಮ ಕೊನೆಯ ಏಕದಿನ ಪಂದ್ಯವನ್ನು ಆಡಿದರು. ಅವರಿಗೆ ಆಗ 39 ವರ್ಷ ಮತ್ತು 36 ದಿನಗಳಾಗಿತ್ತು. ಇಂದು ರೋಹಿತ್ ಶರ್ಮಾ ಮೈದಾನಕ್ಕೆ ಇಳಿಯುವಾಗ ಅವರಿಗೆ 39 ವರ್ಷ 44 ದಿನ ವಯಸ್ಸಾಗಿದ್ದು, ಭಾರತ ಪರ ಏಕದಿನ ಪಂದ್ಯ ಆಡಿದ ಅತ್ಯಂತ ಹಿರಿಯ ಆಟಗಾರ ಎಂಬ ದಾಖಲೆ ನಿರ್ಮಿಸಿದ್ದಾರೆ.

ಭಾರತ ಪರ ಅತಿ ಹೆಚ್ಚು ಕ್ರಿಕೆಟ್ ಆಡಿದ ಕ್ರಿಕೆಟ್ ದೇವರು ಎಂದು ಕರೆಯಲ್ಪಡುವ ಸಚಿನ್ ತೆಂಡೂಲ್ಕರ್ ತಮ್ಮ ಕೊನೆಯ ಏಕದಿನ ಪಂದ್ಯವನ್ನು 38 ವರ್ಷ 329 ದಿನಗಳಲ್ಲಿ ಆಡಿದ್ದಾರೆ. ಸಚಿನ್ ಅವರ ಕೊನೆಯ ಪಂದ್ಯ ಮಾರ್ಚ್ 18, 2012ರಂದು ಮಿರ್ಪುರದಲ್ಲಿ ಪಾಕಿಸ್ತಾನ ವಿರುದ್ಧವಾಗಿತ್ತು. ಏಕದಿನ ಪಂದ್ಯ ಆಡಿದ ಅತ್ಯಂತ ಹಿರಿಯ ಕ್ರಿಕೆಟಿಗನ ಬಗ್ಗೆ ಹೇಳುವುದಾದರೆ, ಒಟ್ಟಾರೆ ದಾಖಲೆ ನೆದರ್ಲೆಂಡ್ಸ್‌ನ ಅಗ್ರ ಕ್ರಮಾಂಕದ ಬ್ಯಾಟ್ಸ್‌ಮನ್ ನೋಲನ್ ಕ್ಲಾರ್ಕ್ ಅವರ ಹೆಸರಿನಲ್ಲಿದೆ. ಮಾರ್ಚ್ 5, 1996ರಂದು ರಾವಲ್ಪಿಂಡಿಯಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ ಡಚ್ ತಂಡವನ್ನು ಪ್ರತಿನಿಧಿಸಿದಾಗ ಕ್ಲಾರ್ಕ್ ಅವರಿಗೆ 47 ವರ್ಷ 257 ದಿನ ವಯಸ್ಸಾಗಿತ್ತು.

ಏಕದಿನ ಪಂದ್ಯ ಆಡಿದ ಅತ್ಯಂತ ಹಿರಿಯ ಆಟಗಾರರ ಪಟ್ಟಿಯಲ್ಲಿ ಕ್ಲಾರ್ಕ್ ನಂತರ ಜಿಂಬಾಬ್ವೆಯ ಜಾನ್ ಟ್ರೈಕೋಸ್ ಮತ್ತು ಇಂಗ್ಲೆಂಡ್‌ನ ನಾರ್ಮನ್ ಗಿಫೋರ್ಡ್ ಇದ್ದಾರೆ. ಟ್ರೈಕೋಸ್ ತಮ್ಮ ಕೊನೆಯ ಏಕದಿನ ಪಂದ್ಯವನ್ನು 45 ವರ್ಷ ಮತ್ತು 312 ದಿನಗಳಲ್ಲಿ ಆಡಿದರೆ, ಗಿಫೋರ್ಡ್ ತಮ್ಮ ಕೊನೆಯ ಏಕದಿನ ಪಂದ್ಯವನ್ನು 44 ವರ್ಷ ಮತ್ತು 361 ದಿನಗಳಲ್ಲಿ ಆಡಿದರು. ಹಿಟ್‌ಮ್ಯಾನ್ ರೋಹಿತ್ ಶರ್ಮಾ ಅಫ್ಘಾನಿಸ್ತಾನ ವಿರುದ್ಧ 6 ರನ್ ಗಳಿಸುವ ಮೂಲಕ ಅಂತರರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಆರಂಭಿಕರಾಗಿ 16,000 ರನ್‌ ಗಳಿಸಿ ಬ್ಯಾಟರ್ ಎನಿಸಿಕೊಂಡಿದ್ದಾರೆ. ಈ ಪಂದ್ಯದಲ್ಲಿ ರೋಹಿತ್ ಶರ್ಮಾ 16 ರನ್ ಗಳಿಸಿ ಔಟಾದರು.