ಪಂಜಾಬ್ ಕಿಂಗ್ಸ್ (PBKS) ತಂಡ ಐಪಿಎಲ್ ಪ್ಲೇಆಫ್ ರೇಸ್ನಿಂದ ಹೊರಬಿದ್ದ ನಂತರ ಭಾರತ ತಂಡದ ವೇಗಿ ಅರ್ಶ್ದೀಪ್ ಸಿಂಗ್ ತಮ್ಮ ಹೆಚ್ಚಿನ ಇನ್ಸ್ಟಾಗ್ರಾಂ ಪೋಸ್ಟ್ಗಳನ್ನು ತೆರವುಗೊಳಿಸಿದ್ದಾರೆ. ಐಪಿಎಲ್ 2026ರಲ್ಲಿ ಅರ್ಶ್ದೀಪ್ ಸಿಂಗ್ ಅವರಿಂದ ಅಷ್ಟೇನು ಉತ್ತಮ ಪ್ರದರ್ಶನ ಮೂಡಿಬಂದಿಲ್ಲ. 14 ಪಂದ್ಯಗಳಲ್ಲಿ ಕೇವಲ 14 ವಿಕೆಟ್ಗಳನ್ನು ಕಬಳಿಸಿದರು ಮತ್ತು ಪ್ರತಿ ಓವರ್ಗೆ 10 ರನ್ ಬಿಟ್ಟುಕೊಟ್ಟರು. ಲೀಗ್ ಹಂತದ ನಂತರ ಪಿಬಿಕೆಎಸ್ ಪಂದ್ಯಾವಳಿಯಿಂದಲೇ ಹೊರಬಿತ್ತು. ಆದಾಗ್ಯೂ, 27 ವರ್ಷದ ಅರ್ಶ್ದೀಪ್ ಸಾಮಾಜಿಕ ಮಾಧ್ಯಮದಲ್ಲಿ ಅಭಿಮಾನಿಗಳ ಗಮನ ಸೆಳೆದಿದ್ದಾರೆ. ಸ್ಟಾರ್ ಬ್ಯಾಟ್ಸ್ಮನ್ ವಿರಾಟ್ ಕೊಹ್ಲಿಯೊಂದಿಗಿನ ತಮ್ಮ ವೈರಲ್ ರೀಲ್ ಅನ್ನು ಸಹ ತೆಗೆದುಹಾಕಿದ್ದಾರೆ. ಅದು 15 ಮಿಲಿಯನ್ಗಿಂತಲೂ ಹೆಚ್ಚು ವೀಕ್ಷಣೆ ಗಳಿಸಿತ್ತು ಎಂದು ವರದಿಯಾಗಿದೆ.
ಕಳೆದ ವರ್ಷ ಡಿಸೆಂಬರ್ನಲ್ಲಿ ಪೋಸ್ಟ್ ಮಾಡಲಾದ ರೀಲ್ನಲ್ಲಿ, ಅರ್ಶ್ದೀಪ್ ಕೊಹ್ಲಿಯೊಂದಿಗೆ ತಮಾಷೆ ಮಾಡುತ್ತಾ, ಗುರಿ ದೊಡ್ಡದಾಗಿದ್ದರೆ, ಮಾಜಿ ನಾಯಕ ಸತತ ಮೂರನೇ ಶತಕ ಗಳಿಸಬಹುದಿತ್ತು ಎಂದಿದ್ದಾರೆ.
'ಪಾಜಿ, ರನ್ ಕಮ್ ರೆಹಗಯೇ, ಸೆಂಚುರಿ ಆಜ್ ಪಕ್ಕಿ ಥಿ ವೈಸೆ (ಸಹೋದರ, ಗುರಿ ಸಾಕಷ್ಟು ದೊಡ್ಡದಾಗಿರಲಿಲ್ಲ, ಇಲ್ಲದಿದ್ದರೆ ಶತಕ ಖಚಿತವಾಗಿತ್ತು)' ಎಂದು ಅರ್ಶದೀಪ್ ಹೇಳಿದ್ದರು.
'ಟಾಸ್ ಜೀತ್ ಗಯೇ, ನಹಿ ತೋ ತೇರಿ ಭಿ ಪಕ್ಕಿ ಥಿ ದೆವ್ ಮೇ (ನಾವು ಟಾಸ್ ಗೆದ್ದಿದ್ದಕ್ಕೆ ಕೃತಜ್ಞರಾಗಿರಿ, ಇಲ್ಲದಿದ್ದರೆ ನೀವು ಇಬ್ಬನಿಯಲ್ಲಿ ಶತಕ ಬಾರಿಸುತ್ತಿದ್ದಿರಿ!)' ಎಂದು ಕೊಹ್ಲಿ ತಮಾಷೆಯಾಗಿ ಪ್ರತಿಕ್ರಿಯಿಸಿದ್ದರು.
ಅರ್ಶದೀಪ್ ಅವರ ಇತ್ತೀಚಿನ ಇನ್ಸ್ಟಾಗ್ರಾಂ ಚಟುವಟಿಕೆಯ ಹಿಂದಿನ ನಿಖರವಾದ ಕಾರಣ ಸ್ಪಷ್ಟವಾಗಿಲ್ಲವಾದರೂ, ಅವರ ಖಾತೆಯಲ್ಲಿ ಸದ್ಯ ಕೇವಲ 44 ಪೋಸ್ಟ್ಗಳಿವೆ. ಕೆಲವು ದಿನಗಳ ಹಿಂದೆ ಸಾಕಷ್ಟು ಪೋಸ್ಟ್ಗಳು ಇದ್ದವು.
ಕುತೂಹಲಕಾರಿಯಾಗಿ, ಪಿಬಿಕೆಎಸ್ ಆಟಗಾರರನ್ನು ಒಳಗೊಂಡ ವಿಡಿಯೋಗಳನ್ನು ಈಗ ಫ್ರಾಂಚೈಸಿಯ ಅಧಿಕೃತ ಸಾಮಾಜಿಕ ಮಾಧ್ಯಮ ಖಾತೆಗಳ ಮೂಲಕ ಪ್ರತ್ಯೇಕವಾಗಿ ರಚಿಸಬೇಕು ಮತ್ತು ಪೋಸ್ಟ್ ಮಾಡಬೇಕು ಎಂಬ ಇತ್ತೀಚಿನ ವರದಿಗಳ ಮಧ್ಯೆ ಇದು ಬಂದಿದೆ.
'ಸಿಇಒ ತರಬೇತಿಯ ನಂತರ ಆಟಗಾರರೊಂದಿಗೆ ಮಾತನಾಡುತ್ತಾರೆ ಮತ್ತು ಬಿಸಿಸಿಐ ಹೊರಡಿಸಿದ ಮಾರ್ಗಸೂಚಿಗಳನ್ನು ಓದುತ್ತಾರೆ. ಅಂತಹ ಯಾವುದೇ ಆಟಗಾರ ಗಮನದಲ್ಲಿಲ್ಲ. ನಿಯಮಗಳನ್ನು ಗೌರವಿಸಬೇಕು ಮತ್ತು ಕಟ್ಟುನಿಟ್ಟಾಗಿ ಪಾಲಿಸಬೇಕು' ಎಂದು ತಂಡದ ಮೂಲವೊಂದು ಸುದ್ದಿಸಂಸ್ಥೆ ಪಿಟಿಐಗೆ ತಿಳಿಸಿದೆ.
Advertisement
