ಬೆಂಗಳೂರು: ಡಾ. ರಾಜ್ ಕುಮಾರ್ ಸ್ಮಾರಕ ಉದ್ಘಾಟನೆ ಹಿನ್ನೆಲೆಯಲ್ಲಿ ಅರಮನೆ ಮೈದಾನದಲ್ಲಿ ಶನಿವಾರ ನಡೆದ ರಸಸಂಜೆ ಕಾರ್ಯಕ್ರಮದ ಸಂದರ್ಭದಲ್ಲಿ ಹಾಸ್ಯ ನಟ, ಸಂಗೀತ ನಿರ್ದೇಶಕ ಸಾಧು ಕೋಕಿಲಾರ ಮೊಬೈಲ್ ಫೋನ್ ನನ್ನು ದುಷ್ಕರ್ಮಿಗಳು ಕದ್ದಿದ್ದಾರೆ.
ತಮ್ಮ ಕಾರಿನಿಂದ ಇಳಿದ ಸಾಧು ಕೋಕಿಲಾ ಅವರು ವೇದಿಕೆ ಬಳಿ ಹೋಗಿದ್ದರು. ಆದರೆ, ಕೆಲ ನಿಮಿಷಗಳಲ್ಲೇ ಮರೆತುಹೋಗಿದ್ದ ಮೊಬೈಲ್ ಫೋನ್ ತೆಗೆದುಕೊಂಡು ಹೋಗಲು ವಾಪಸ್ ಬಂದರು. ಅಷ್ಟೊತ್ತಿಗಾಗಲೇ ಮೊಬೈಲ್ ಕಳವಾಗಿತ್ತು. ಕಾರಿನ ಗಾಜನ್ನು ಸರಿಯಾಗಿ ಮುಚ್ಚದ ಕಾರಣ ಕಳ್ಳರಿಗೆ ಕೆಲಸ ಸುಲಭವಾಗಿತ್ತು ಎಂದು ಪೊಲೀಸ್ ಅಧಿಕಾರಿಯೊಬ್ಬರು ಮಾಹಿತಿ ನೀಡಿದ್ದಾರೆ.
