ಸುಬ್ರಹ್ಮಣ್ಯ: 13 ವರ್ಷಗಳ ಹಿಂದೆ ಮುಂಬೈಗೆ ತೆರಳಿದ ಯುವಕ ಮರಳಿ ಬಾರದೆ ನಾಪತ್ತೆಯಾಗಿರುವ ಬಗ್ಗೆ ಸುಬ್ರಹ್ಮಣ್ಯ ಪೊಲೀಸ್ ಠಾಣೆಯಲ್ಲಿ ಮಂಗಳವಾರ ದೂರು ದಾಖಲಾಗಿದೆ. ಕಲ್ಮಡ್ಕ ಗ್ರಾಮದ ಮುಚ್ಚಿಲ ಮನೆ ನಿವಾಸಿ ದಿ. ಅಬ್ದುಲ್ ಖಾದರ್ ಎಂಬವರ ಮಗ ಇಸ್ಮಾಯಿಲ್ (36) ನಾಪತ್ತೆಯಾದವರು. ಅವರು 13 ವರ್ಷಗಳ ಹಿಂದೆ ಕೆಲಸದ ನಿಮಿತ್ತ ಮುಂಬೈಗೆ ಹೋಗುತ್ತೇನೆ ಎಂದು ಮನೆಯಲ್ಲಿ ಹೇಳಿ ಹೋಗಿದ್ದರು. ಮನೆ ಮಂದಿ ಇಸ್ಮಾಯಿಲ್ ಮುಂಬೈನಲ್ಲಿ ಇರಬಹುದೆಂದು ಭಾವಿಸಿದ್ದರು. ಆದರೆ ಸುದೀರ್ಘ ಸಮಯದವರೆಗೂ ಅವರು ಮನೆಗೆ ಬಾರದೆ, ಯಾವುದೇ ಸಂಪರ್ಕಕ್ಕೆ ಸಿಗದೆ ಇದ್ದುದರಿಂದ ಸಂಶಯಗೊಂಡ ಮನೆಯವರು ಸ್ನೇಹಿತರು, ಸಂಬಂಧಿಕರ ಮನೆಯಲ್ಲಿ ವಿಚಾರಿಸಿದ್ದಾರೆ. ಆದರೆ ಯಾವುದೇ ಸುಳಿವು ಸಿಗದ ಕಾರಣ ಮಂಗಳವಾರ ಸುಬ್ರಹ್ಮಣ್ಯ ಠಾಣೆಗೆ ದೂರು ನೀಡಿದ್ದಾರೆ. ಇಸ್ಮಾಯಿಲ್ 7ನೇ ತರಗತಿವರೆಗೆ ಓದಿದ್ದು, ಕನ್ನಡ, ಹಿಂದಿ, ಉರ್ದು, ತುಳು ಭಾಷೆ ಮಾತನಾಡುತ್ತಾನೆ. 5 ಅಡಿ ಎತ್ತರವಿದ್ದಾನೆ.
