ಕಲಬುರಗಿ: ಅಪಹರಣ ಪ್ರಕರಣವನ್ನು ಬೇಧಿಸಲು ರಸ್ತೆ ಅಪಘಾತ ಪ್ರಕರಣ ಪೊಲೀಸರಿಗೆ ಸಹಾಯ ಮಾಡಿದೆ. ಜೇವರ್ಗಿ ತಾಲೂಕಿನ ಬೆಳ್ಳೂರು ಗ್ರಾಮದಲ್ಲಿ ಚವರ್ಲೆಟ್ ತವೇರಾ ವಾಹನ ಅಪಘಾತಕ್ಕೀಡಾಗಿತ್ತು. ಅಪಘಾತ ನಡೆದ ವೇಳೆ ವಾಹನದಲ್ಲಿದ್ದ ಲಾಂಗು, ಮಚ್ಚು ಸೇರಿದಂತೆ ಹಲವು ಮಾರಕಾಸ್ತ್ರಗಳು ರಸ್ತೆಗೆ ಬಿದ್ದಿದ್ದವು, ಇದನ್ನು ಗಮನಿಸಿದ ಸ್ಥಳೀಯರು ವಾಹನದಲ್ಲಿದ್ದವರನ್ನು ಹಿಡಿದು ಪೊಲೀಸರಿಗೆ ಒಪ್ಪಿಸಿದರು.
ನಂತರ ಪೊಲೀಸರು ಆಗಮಿಸಿ ವಿಚಾರಣೆ ನಡೆಸಿದಾಗ ಅಪಹರಣ ಪ್ರಕರಣ ಬೆಳಕಿಗೆ ಬಂದಿದೆ. ತವೇರಾ ವಾಹನದಲ್ಲಿ ಚಲಿಸುತ್ತಿದ್ದ ತಂಡ ಕಲಬುರಗಿ ತಾಲೂಕಿನ ಹಸನಾಪುರ ಗ್ರಾಮದ ಸಿದ್ದಲಿಂಗಪ್ಪ ಎಂಬಾತನನ್ನು ಕಿಡ್ನಾಪ್ ಮಾಡಿತ್ತು. ಹಸನಾಪುದಿಂದ ಆತನನ್ನು ವಿಜಯಾಪುರ ಜಿಲ್ಲೆಯ ಸಿಂಧಗಿ ತಾಲೂಕಿಗೆ ಕರೆದೊಯ್ಯುವಾಗ ಈ ಅಪಘಾತ ಸಂಭವಿಸಿತ್ತು.
ಸಿಂಧಗಿ ತಾಲೂಕಿನ ಓತಿಹಾಳ್ ಗ್ರಾಮದ ಬಲರಾಮ ಎಂಬಾತನಿಗೂ ಹಾಗೂ ಅಪಹರಣಗೊಂಡಿದ್ದ ಹಸನಾಪುರ ಗ್ರಾಮದ ಸಿದ್ಧಲಿಂಗಪ್ಪ ಎಂಬಾತನಿಗೂ ಹಣಕಾಸಿನ ವಿಷಯದಲ್ಲಿ ವ್ಯಾಜ್ಯ ಏರ್ಪಟ್ಟಿತ್ತು , ಹೀಗಾಗಿ ಆತನನ್ನು ಕಿಡ್ನಾಪ್ ಮಾಡಿದ್ದಾಗಿ ಆರೋಪಿಗಳು ಹೇಳಿದ್ದಾರೆ.
ಆದರೆ, ಮತ್ತೊಂದು ಹೇಳಿಕೆಯ ಪ್ರಕಾರ, ಸಿದ್ದಲಿಂಗಪ್ಪ ಸಹೋದರಿ ಮತ್ತು ಬಲರಾಮ ಪರಸ್ಪರ ಪ್ರೀತಿಸುತ್ತಿದ್ದರು, ಇದಕ್ಕೆ ಸಿದ್ದಲಿಂಗಪ್ಪ ವಿರೋಧ ವ್ಯಕ್ತ ಪಡಿಸಿದ ಕಾರಣ ಆತನನ್ನು ಅಪಹರಿಸಲಾಗಿತ್ತು ಎಂದು ಸಹ ಹೇಳಲಾಗಿದೆ.ರಸ್ತೆ ಅಪಘಾತದಲ್ಲಿ ಗಾಯಗೊಂಡಿದ್ದ ಸಿದ್ದಲಿಂಗಪ್ಪಗೆ ಸ್ಥಳೀಯ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಕೊಡಿಸಲಾಗಿದೆ.
