ರಾಯಚೂರು ರಸ್ತೆಗಳಲ್ಲಿ ರಾರಾಜಿಸುತ್ತಿವೆ ರೌಡಿಗಳೊಂದಿಗೆ ಬಿಜೆಪಿ ಶಾಸಕನಿರುವ ಹೋರ್ಡಿಂಗ್ ಗಳು
ಕೊಲೆ ಯತ್ನ ಹಾಗೂ ಪೊಲೀಸರಿಗೆ ಬೆದರಿಕೆ ಸೇರಿದಂತೆ ಹಲವು ಪ್ರಕರಣಗಳಲ್ಲಿ ಭಾಗಿಯಾಗಿರುವ ರೌಡಿಗಳೊಂದಿಗೆ ಬಿಜೆಪಿ ಶಾಸಕರೊಬ್ಬರು ಇರುವ ಜಾಹೀರಾತು ಫಲಕಗಳು ರಾಯಚೂರಿನ ಪ್ರಧಾನ ರಸ್ತೆಗಳಲ್ಲಿ ರಾರಾಜಿಸುತ್ತಿದ್ದು, ಈ ಕುರಿತು ಭಾರೀ ಟೀಕೆಗಳು ವ್ಯಕ್ತವಾಗತೊಡಗಿವೆ...
ರಾಯಚೂರು: ಕೊಲೆ ಯತ್ನ ಹಾಗೂ ಪೊಲೀಸರಿಗೆ ಬೆದರಿಕೆ ಸೇರಿದಂತೆ ಹಲವು ಪ್ರಕರಣಗಳಲ್ಲಿ ಭಾಗಿಯಾಗಿರುವ ರೌಡಿಗಳೊಂದಿಗೆ ಬಿಜೆಪಿ ಶಾಸಕರೊಬ್ಬರು ಇರುವ ಜಾಹೀರಾತು ಫಲಕಗಳು ರಾಯಚೂರಿನ ಪ್ರಧಾನ ರಸ್ತೆಗಳಲ್ಲಿ ರಾರಾಜಿಸುತ್ತಿದ್ದು, ಈ ಕುರಿತು ಭಾರೀ ಟೀಕೆಗಳು ವ್ಯಕ್ತವಾಗತೊಡಗಿವೆ.
ಸನ್ನಿ ರೊನಾಲ್ಡ್ ಹಾಗೂ ಸ್ಟೀವನ್ ಬಿನ್ನಿ ಇಬ್ಬರೂ ರೌಡಿಗಳಾಗಿದ್ದು, ಸಾಕಷ್ಟು ಅಪರಾಧ ಪ್ರಕರಣಗಳಲ್ಲಿ ಭಾಗಿದ್ದಾರೆ. ಇಬ್ಬರೂ ರೌಡಿಗಳು ಪ್ರಸ್ತುತ ಜಾಮೀನಿನ ಮೇರೆಗೆ ಹೊರಗಿದ್ದಾರೆ.
ತಿಂಗಳ ಹಿಂದಷ್ಟೇ ಸನ್ನಿ ಹಾಗೂ ಬಿನ್ನಿ ಇಬ್ಬರನ್ನೂ ಪೊಲೀಸರು ಕೊಲೆ ಯತ್ನ, ಪೊಲೀಸ್ ಕರ್ತವ್ಯಕ್ಕೆ ಅಡ್ಡಿ, ಪೊಲೀಸರಿಗೆ ಬೆದರಿಕೆ ಹಾಗೂ ಗ್ಯಾಂಗ್ ವಾರ್ ಪ್ರಕರಣಗಳಿಗೆ ಸಂಬಂಧಿಸಿದಂತೆ ಬಂಧನಕ್ಕೊಳಪಡಿಸಿದ್ದರು. ಇಬ್ಬರ ವಿರುದ್ಧ ಹಿಸ್ಟರಿ ಶೀಟ್ ಕೂಡ ಇದೆ.
ಕ್ರಿಸ್ಮಸ್ ಹಬ್ಬ ಹಿನ್ನಲೆಯಲ್ಲಿ ರಾಯಚೂರು ಬಿಜೆಪಿ ಶಾಸಕ ಶಿವರಾಜ್ ಪಾಟೀಲ್ ಅವರು ಈ ಇಬ್ಬರು ರೌಡಿಗಳೊಂದಿಗಿರುವ ಜಾಹೀರಾತು ಫಲಕಗಳು ಇದೀಗ ರಾಯಚೂರು ಪ್ರಮುಖ ರಸ್ತೆಗಳಲ್ಲಿ ರಾರಾಜಿಸುತ್ತಿರುವುದು, ಹಲವು ವಿರೋಧಗಳಿಗೆ ಕಾರಣವಾಗಿದೆ.
ಈ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ಶಿವರಾಜ್ ಪಾಟೀಲ್ ಅವರು, ನಾನು ಬೆಳಗಾವಿ ಅಧಿವೇಶನದಲ್ಲಿ ಪಾಲ್ಗೊಂಡಿದ್ದೇನೆ. ಈ ಬಗ್ಗೆ ನನ್ನ ಗಮನಕ್ಕೆ ಬಂದಿಲ್ಲ. ಇಬ್ಬರೊಂದಿಗೆ ಆತ್ಮೀಯವಾಗಿರುವುದು ನಿಜ. ಇಬ್ಬರೂ ಬಿಜೆಪಿ ಕಾರ್ಪೊರೇಟರ್ ಮಕ್ಕಳಾಗಿದ್ದಾರೆ. ಹೀಗಾಗಿ ಇಬ್ಬರೂ ನನ್ನೊಂದಿಗೆ ಆತ್ಮಿಯರಾಗಿದ್ದಾರೆಂದು ತಿಳಿಸಿದ್ದಾರೆ.
