ಬೆಂಗಳೂರು: 100 ರಿಂದ 150 ವರ್ಷಗಳಷ್ಟು ಹಳೆಯದಾದ ದಾಖಲೆಗಳನ್ನು ಒಳಗೊಂಡಂತೆ 120 ಕೋಟಿಗೂ ಹೆಚ್ಚು ಸರ್ಕಾರಿ ದಾಖಲೆಗಳನ್ನು ಅಗ್ನಿ ನಿರೋಧಕ, ಹೆಚ್ಚಿನ ಭದ್ರತೆಯ ಕಾಂಪ್ಯಾಕ್ಟರ್ಗಳಲ್ಲಿ ಸುರಕ್ಷಿತಗೊಳಿಸಿದ ದೇಶದ ಮೊದಲ ರಾಜ್ಯ ಕರ್ನಾಟಕವಾಗಿದೆ.
ಈ ಕಾಂಪ್ಯಾಕ್ಟರ್ಗಳು ಕೀ ಲಾಕಿಂಗ್ ವ್ಯವಸ್ಥೆಯನ್ನು ಹೊಂದಿದ್ದು, ಅಧಿಕೃತ ಸಿಬ್ಬಂದಿಗೆ ಮಾತ್ರ ಪ್ರವೇಶವಿರುತ್ತದೆ. ಬಯೋಮೆಟ್ರಿಕ್ ವ್ಯವಸ್ಥೆ ಹೊಂದಿದ್ದು ನಿರ್ಬಂಧಿತ ಕೋಣೆಯಲ್ಲಿ ಇರಿಸಲಾಗಿದೆ. ಈ ಕ್ರಮವು ವರ್ಧಿತ ಸುರಕ್ಷತೆ ಮತ್ತು ಭದ್ರತಾ ಕ್ರಮಗಳ ಮೂಲಕ ಅಮೂಲ್ಯವಾದ ಆರ್ಕೈವಲ್ ದಾಖಲೆಗಳನ್ನು ಸಂರಕ್ಷಿಸುವ ಗುರಿಯನ್ನು ಹೊಂದಿದೆ.
ಇನ್ನು ಮುಂದೆ ಅಗತ್ಯವಿಲ್ಲದ ದಾಖಲೆಗಳನ್ನು ನಾಶ ಮಾಡಲು ಸರ್ಕಾರಿ ನಿಯಮಗಳು ಅನುಮತಿ ನೀಡುತ್ತವೆ. ಆದರೆ ಪ್ರಮುಖ ಮತ್ತು ಐತಿಹಾಸಿಕವಾಗಿರುವ ಮಹತ್ವದ ದಾಖಲೆಗಳನ್ನು ಶಾಶ್ವತವಾಗಿ ಸಂರಕ್ಷಿಸಲಾಗಿದೆ. ಈ ದಾಖಲೆಗಳನ್ನು ಸಂರಕ್ಷಿಸಲು, ಕಂದಾಯ ಇಲಾಖೆಯು ಹೆಚ್ಚಿನ ಸಾಮರ್ಥ್ಯದ ಕಾಂಪ್ಯಾಕ್ಟರ್ಗಳನ್ನು ಹೊಂದಿರುವ ಆಧುನಿಕ ದಾಖಲೆ ಕೊಠಡಿಗಳನ್ನು ಸ್ಥಾಪಿಸಿದೆ
ಅಗ್ನಿ ನಿರೋಧಕ ಕಾಂಪ್ಯಾಕ್ಟರ್ಗಳನ್ನು ದೀರ್ಘಕಾಲದವರೆಗೆ ಅಮೂಲ್ಯವಾದ ಸರ್ಕಾರಿ ದಾಖಲೆಗಳನ್ನು ಸುರಕ್ಷಿತವಾಗಿ ಸಂಗ್ರಹಿಸಲು ಮತ್ತು ಸಂರಕ್ಷಿಸಲು ವಿನ್ಯಾಸಗೊಳಿಸಲಾಗಿದೆ ಎಂದು ಹೆಚ್ಚುವರಿ ಮುಖ್ಯ ಕಾರ್ಯದರ್ಶಿ (ಕಂದಾಯ) ರಾಜೇಂದರ್ ಕುಮಾರ್ ಕಟಾರಿಯಾ ದಿ ನ್ಯೂ ಇಂಡಿಯನ್ ಎಕ್ಸ್ಪ್ರೆಸ್ಗೆ ತಿಳಿಸಿದರು.
ಕರ್ನಾಟಕ ಕಂದಾಯ ಇಲಾಖೆ ಸುಮಾರು 85 ಕೋಟಿ ಪುಟಗಳ ದಾಖಲೆಗಳನ್ನು ಡಿಜಿಟಲೀಕರಣಗೊಳಿಸಿದೆ, ಅಗ್ನಿ ನಿರೋಧಕ ಹೈ ಸೆಕ್ಯುರಿಟಿ ಕಾಂಪ್ಯಾಕ್ಟರ್ಗಳಲ್ಲಿ ಭೂಮಿಗೆ ಸಂಬಂಧಿಸಿದ 120 ಕೋಟಿಗೂ ಹೆಚ್ಚು ಸರ್ಕಾರಿ ದಾಖಲೆಗಳನ್ನು ಪಡೆದುಕೊಂಡ ರಾಜ್ಯಗಳಲ್ಲಿ ದೇಶದಲ್ಲಿಯೇ ಕರ್ನಾಟಕವು ಮೊದಲನೆಯದು ಎಂದು ಹೆಚ್ಚುವರಿ ಮುಖ್ಯ ಕಾರ್ಯದರ್ಶಿ ಹೇಳಿದರು.
ಕರ್ನಾಟಕ ಕಂದಾಯ ಇಲಾಖೆಯು ರಾಜ್ಯಾದ್ಯಂತ ಎಲ್ಲಾ ತಹಶೀಲ್ದಾರ್, ಸಹಾಯಕ ಆಯುಕ್ತರು ಮತ್ತು ಉಪ ಆಯುಕ್ತರ ಕಚೇರಿಗಳಲ್ಲಿ ಸುಮಾರು 85 ಕೋಟಿ ಪುಟಗಳ ಪ್ರಮುಖ ಕಂದಾಯ ದಾಖಲೆಗಳನ್ನು ಡಿಜಿಟಲೀಕರಣಗೊಳಿಸಿದೆ, ಇನ್ನೂ 35 ಕೋಟಿ ಪುಟಗಳನ್ನು ಡಿಜಿಟಲೀಕರಣಗೊಳಿಸಬೇಕಾಗಿದೆ. ಇಲಾಖೆಯು ದಾಖಲೆಗಳನ್ನು ಅವುಗಳ ವರ್ಗೀಕರಣ ಆಧಾರದ ಮೇಲೆ ಎ, ಬಿ, ಸಿ, ಡಿ ಮತ್ತು ಇ ವರ್ಗಗಳಾಗಿ ವರ್ಗೀಕರಿಸುತ್ತದೆ ಎಂದು ಕಟಾರಿಯಾ ಹೇಳಿದರು.
ಹಳೆಯ ದಾಖಲೆಗಳು ಮತ್ತು 150 ವರ್ಷಗಳಿಗಿಂತ ಹಳೆಯದಾದ ಕೆಲವು ದಾಖಲೆಗಳನ್ನು ಒಳಗೊಂಡಂತೆ ಎ ವರ್ಗದ ದಾಖಲೆಗಳನ್ನು ಶಾಶ್ವತವಾಗಿ ಸಂರಕ್ಷಿಸಲಾಗುತ್ತದೆ. ಬಿ ವರ್ಗದ ದಾಖಲೆಗಳನ್ನು 30 ವರ್ಷಗಳವರೆಗೆ ಉಳಿಸಿಕೊಳ್ಳಲಾಗುತ್ತದೆ ಮತ್ತು ನಂತರ ಪರಿಶೀಲಿಸಲಾಗುತ್ತದೆ, ಆದರೆ ಸಿ, ಡಿ ಮತ್ತು ಇ ವರ್ಗದ ದಾಖಲೆಗಳನ್ನು ಕ್ರಮವಾಗಿ 10 ವರ್ಷಗಳು, ಐದು ವರ್ಷಗಳು ಮತ್ತು ಒಂದು ವರ್ಷದವರೆಗೆ ಸಂರಕ್ಷಿಸಲಾಗುತ್ತದೆ.
ಸರ್ಕಾರಿ ಕಚೇರಿಗಳಲ್ಲಿ ಪರಿಣಾಮಕಾರಿ ದಾಖಲೆ ನಿರ್ವಹಣೆಯನ್ನು ಖಚಿತಪಡಿಸಿಕೊಳ್ಳಲು ಮತ್ತು ಶೇಖರಣಾ ಸ್ಥಳವನ್ನು ಉಳಿಸಲು, ಎಲ್ಲಾ ಕಂದಾಯ ಸಂಬಂಧಿತ ಕಚೇರಿಗಳು ಅವಧಿ ಮೀರಿದ ದಾಖಲೆಗಳನ್ನು ವಿಲೇವಾರಿ ಮಾಡಬೇಕು ಎಂದು ಕಟಾರಿಯಾ ಸುತ್ತೋಲೆಯಲ್ಲಿ ಹೇಳಿದ್ದಾರೆ.
ಭೂ ಸುರಕ್ಷಾ ಯೋಜನೆಯಡಿಯಲ್ಲಿ ಎ ಮತ್ತು ಬಿ ವರ್ಗದ ಭೂ ದಾಖಲೆಗಳನ್ನು ಸೂಚಿಕೆ ಮಾಡಿ, ಸ್ಕ್ಯಾನ್ ಮಾಡಿ ಮತ್ತು ಸಂರಕ್ಷಿಸಲಾಗಿದ್ದರೂ, ಈ ವ್ಯವಸ್ಥೆಯು ಈಗ ಅನಗತ್ಯ ಸಿ, ಡಿ ಮತ್ತು ಇ ವರ್ಗದ ದಾಖಲೆಗಳನ್ನು ನಿಗದಿತ ಕಾರ್ಯವಿಧಾನದ ಪ್ರಕಾರ ವಿಲೇವಾರಿ ಮಾಡಲು ಅನುಕೂಲವಾಗುತ್ತದೆ. ಮುಚ್ಚಿದ ಫೈಲ್ಗಳನ್ನು ಗುರುತಿಸಲು ಮತ್ತು ವರ್ಗೀಕರಿಸಲು ನಿರ್ದೇಶಿಸಲಾಗಿದೆ ಎಂದು ಕಟಾರಿಯಾ ವಿವರಿಸಿದ್ದಾರೆ.
ಪ್ರಮುಖ ದಾಖಲೆಗಳನ್ನು ಎ ಮತ್ತು ಬಿ ವರ್ಗ 'ಎ' ಮತ್ತು 'ಬಿ' ಅಡಿಯಲ್ಲಿ ಉಳಿಸಿಕೊಳ್ಳಲಾಗಿದೆ ಎಂದು ಖಚಿತಪಡಿಸಿಕೊಳ್ಳಲಾಗಿದೆ ಎಂದು ಹೇಳಿದರು. ವಿಲೇವಾರಿ ಮಾಡುವ ಮೊದಲು, ನ್ಯಾಯಾಲಯದ ಪ್ರಕರಣಗಳು, ಲೆಕ್ಕಪರಿಶೋಧನೆಗಳು, ಆರ್ಟಿಐ ವಿಷಯಗಳು, ಇಲಾಖಾ ಆದೇಶಗಳು ಮತ್ತು ಇತರ ಆಡಳಿತಾತ್ಮಕ ಅವಶ್ಯಕತೆಗಳಿಗೆ ಫೈಲ್ಗಳನ್ನು ಪರಿಶೀಲಿಸಬೇಕು.
ದಾಖಲೆಗಳನ್ನು ಸೂಚಿಕೆ ಮಾಡಿದ ನಂತರ, ಸಾಫ್ಟ್ವೇರ್-ರಚಿತ ಪಟ್ಟಿಯನ್ನು ಸಲಹಾ ಮಂಡಳಿಗಳ ಮುಂದೆ ಇಡಲಾಗುತ್ತದೆ ಎಂದು ಅದು ಹೇಳಿದೆ. ಪರಿಶೀಲನೆಯ ನಂತರ, ದಾಖಲೆಗಳನ್ನು ಡಿಜಿಟಲ್ ಸಹಿ ಮೂಲಕ ಅಪ್ಲೋಡ್ ಮಾಡಿ ಅನುಮೋದಿಸಲಾಗುತ್ತದೆ. ಗೊತ್ತುಪಡಿಸಿದ ಪ್ರಾಧಿಕಾರದ ಸಮ್ಮುಖದಲ್ಲಿ ಭೌತಿಕ ದಾಖಲೆಗಳನ್ನು ನಾಶಪಡಿಸಲಾಗುತ್ತದೆ, ನಾಶ ಪಡಿಸಿದ ವರದಿಯನ್ನು ಕಚೇರಿ ಮುಖ್ಯಸ್ಥರು ಸಿದ್ಧಪಡಿಸಿ, ಸಲ್ಲಿಸಿ ಮತ್ತು ಅನುಮತಿ ಪಡೆಯಬೇಕು.
ಚೂರುಚೂರು ಮಾಡಿದ ಕಾಗದದ ತ್ಯಾಜ್ಯವನ್ನು ನಿಯಮಗಳ ಪ್ರಕಾರ ಇ-ಹರಾಜು/ಟೆಂಡರ್ ಮೂಲಕ ವಿಲೇವಾರಿ ಮಾಡಿ ಮಾರಾಟದ ಮೊತ್ತವನ್ನು ಸರ್ಕಾರಕ್ಕೆ ಜಮಾ ಮಾಡಲಾಗುತ್ತದೆ. "ಈ ಕ್ರಮದಿಂದ ಜಾಗವನ್ನು ಉಳಿಸಲು ಮತ್ತು ಸರ್ಕಾರಿ ದಾಖಲೆಗಳನ್ನು ಹೆಚ್ಚು ಸಂಘಟಿತ ಮತ್ತು ಸುರಕ್ಷಿತ ರೀತಿಯಲ್ಲಿ ಸಂಗ್ರಹಿಸಲು ನಮಗೆ ಸಹಾಯ ಮಾಡುತ್ತದೆ" ಎಂದು ಕಟಾರಿಯಾ ಹೇಳಿದರು.
