ನವದೆಹಲಿ: ಗುಲಾಮಗಿರಿ ನಿರ್ನಾಮವಾಗಿದೆ ಎಂದು ನೀವು ತಿಳಿದುಕೊಂಡಿದ್ದರೆ, ಅದು ತಪ್ಪು. ಇದು ಭಾರತದಲ್ಲಷ್ಟೇ ಅಲ್ಲ ವಿಶ್ವದಲ್ಲೇ ಚಾಲ್ತಿಯಲ್ಲಿದ್ದು, ಆಧುನಿಕತೆಯನ್ನು ನಾಚಿಸುವಂತೆ ಮಾಡಿದೆ. ಅಂದ ಹಾಗೆ, ಈ ಗುಲಾಮಗಿರಿಗೆ ವಿಶ್ವಾದ್ಯಂತ ತುತ್ತಾಗಿರುವ ಮಂದಿ ಎಷ್ಟು ಗೊತ್ತೇ? 3.5 ಕೋಟಿ!
ಇಲ್ಲಿ ಇನ್ನೊಂದು ಆಘಾತಕಾರಿ ಅಂಶವೆಂದರೆ, ಇದರಲ್ಲಿ ಭಾರತಕ್ಕೆ ಮೊದಲ ಸ್ಥಾನ. ಅಂದರೆ ಭಾರತದಲ್ಲಿ 1.40 ಕೋಟಿ ಗುಲಾಮರಿದ್ದಾರೆ. ಎರಡನೇ ಸ್ಥಾನವನ್ನು ಚೀನಾ ಪಡೆದುಕೊಂಡಿದ್ದು, 32 ಲಕ್ಷ ಜನ ಜೀತಕ್ಕಿದ್ದಾರೆ. ಕ್ರಮವಾಗಿ 3,4 ಮತ್ತು 5ನೇ ಸ್ಥಾನವನ್ನು ಪಾಕಿಸ್ತಾನ (20ಲಕ್ಷ), ಉಜ್‌ಬೇಕಿಸ್ತಾನ (10.2 ಲಕ್ಷ), ರಷ್ಯಾ (10 ಲಕ್ಷ) ಹೊಂದಿದೆ. ಇಂಥದ್ದೊಂದು ವರದಿಯನ್ನು ಆಸ್ಟ್ರೇಲಿಯಾ ಮೂಲದ ಎನ್‌ಜಿಒ ಪ್ರಕಟಿಸಿದೆ. ಇದಕ್ಕಾಗಿ ವಿಶ್ವದ 167 ದೇಶಗಳ ಅಧ್ಯಯ ನಡೆಸಲಾಗಿದೆ. ಪ್ರಮುಖ ದೇಶಗಳಲ್ಲೇ ಶೇ.61 ಕ್ಕೂ ಹೆಚ್ಚು ಮಂದಿ ಗುಲಾಮಗಿರಿಗೆ ತುತ್ತಾಗಿದ್ದಾರೆ ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ.
ಇದಲ್ಲದೇ ನೈಜಿರಿಯಾ, ಡೆಮಾಕ್ರಟಿಕ್ ರಿಪಬ್ಲಿಕ್ ಆಫ್ ಕಾಂಗೋ, ಇಂಡೋನೇಷ್ಯಾ, ಬಾಂಗ್ಲಾದೇಶ ಮತ್ತು ಥಾಯ್ಲಾಂಡ್‌ನಲ್ಲೂ ಈ ಪದ್ಧತಿ ಹೆಚ್ಚಾಗಿ ಚಾಲ್ತಿಯಲ್ಲಿದೆ. ಇದನ್ನು ಆಧುನಿಕ 'ಗುಲಾಮಗಿರಿ' ಎಂದು ಕರೆಯಲಾಗಿದೆ.
ಇವರಲ್ಲಿ ಕೂಲಿ ಕಾರ್ಮಿಕರು, ಬಲವಂತದಿಂದ ಮದುವೆಯಾಗಿರುವವರು, ಸಾಲ ತೀರಿಸದೇ ಜೀತದಾಳಾಗಿರುವುದು, ವೇಶ್ಯಾವಾಟಿಕೆಯಲ್ಲಿ ಕಿರುಕುಳ ಅನುಭವಿಸುವವರೇ ಹೆಚ್ಚಿದ್ದಾರೆ. ಕಳೆದ ವರ್ಷಕ್ಕೆ ಹೋಲಿಕೆ ಮಾಡಿದರೆ, ಶೇ. 23 ಹೆಚ್ಚಳವಾಗಿದೆ ಎನ್ನಲಾಗಿದೆ.
Advertisement