ಜೈಪುರ: ತಮಿಳುನಾಡು ಮಾಜಿ ಮುಖ್ಯಮಂತ್ರಿ ಜಿ.ಜಯಲಲಿತಾ ಅವರು ಆರಂಭಿಸಿದ್ದ ಅಮ್ಮ ಕ್ಯಾಂಟೀನ್ ನಿಂದ ಪ್ರೇರಣೆ ಪಡೆದ ರಾಜಸ್ಥಾನ ಮುಖ್ಯಮಂತ್ರಿ ವಸುಂಧರಾ ರಾಜೆ ಅವರು ರಾಜ್ಯದ ಜನತೆಗೆ ಅತಿ ಕಡಿಮೆ ಬೆಲೆಗೆ ಆಹಾರ ನೀಡಲು ಅನ್ನಪೂರ್ಣ ರಸೋಯಿಗಳನ್ನು ಆರಂಭಿಸಿದ್ದಾರೆ.
ವಸುಂಧರಾ ರಾಜೆ ಅವರು ಬಡವರಿಗಾಗಿ ತಮ್ಮದೇ ಬ್ರಾಂಡ್ ನ ಮೊಬೈಲ್ ಕ್ಯಾಂಟೀನ್ ಆರಂಭಿಸಿದ್ದು, ಇಲ್ಲಿ ಐದು ರುಪಾಯಿಗೆ ತಿಂಡಿ ಹಾಗೂ 8 ರುಪಾಯಿಗೆ ಊಟ ದೊರೆಯಲಿದೆ.
ಇಬ್ಬರು ದಲಿತ ಮಹಿಳೆಯರಿಗೆ ತಿಂಡಿ ತಿನ್ನಿಸುವ ಮೂಲಕ ವಸುಂಧರಾ ರಾಜೆ ಅವರು ಅನ್ನಪೂರ್ಣ ರಸೋಯಿಗೆ ಗುರುವಾರ ಚಾಲನೆ ನೀಡಿದ್ದಾರೆ.
ಅನ್ನಪೂರ್ಣ ರಸೋಯಿ ಆಹಾರಕ್ಕೆ ರಾಜ್ಯ ಬಿಜೆಪಿ ಸರ್ಕಾರ ಭಾರಿ ಸಬ್ಸಿಡಿ ನೀಡುತ್ತಿದ್ದು, ಇದರಿಂದ ರಾಜ್ಯ ಸರ್ಕಾರ ಮುಂದಿನ ಹಣಕಾಸು ವರ್ಷದವರೆಗೆ ನಾಲ್ಕು ಕೋಟಿ ರುಪಾಯಿ ವರೆಗೆ ವೆಚ್ಚವಾಗಲಿದೆ.
ನಗರದಲ್ಲಿರುವ ಬಡವರಿಗೆ ಅತಿ ಕಡಿಮೆ ಬೆಲೆಗೆ ಆಹಾರ ನೀಡುವುದು ನಮ್ಮ ಉದ್ದೇಶವಾಗಿದ್ದು, ಸದ್ಯ 12 ಜಿಲ್ಲೆಗಳಲ್ಲಿ 80 ವಾಹನಗಳ ಮೂಲಕ ಆಹಾರ ಒದಗಿಸಲಾಗುವುದು ಎಂದು ವಸುಂಧರಾ ರಾಜೆ ತಿಳಿಸಿದ್ದಾರೆ.
