ತಿರುವನಂತಪುರ: ಭಾರತದ ಕೇರಳ ರಾಜ್ಯದಲ್ಲಿ ಚೀನಾ ಮೂಲದ ಕೊರೊನಾ ವೈರಸ್ ಸೋಂಕು ಪತ್ತೆಯಾದ ಎರಡು ದಿನಗಳ ನಂತರ ಮತ್ತೆ ಅದೇ ರಾಜ್ಯದಲ್ಲಿ ಎರಡನೇ ಸೋಂಕು ಪ್ರಕರಣ ಪತ್ತೆಯಾಗಿದೆ.
ಕೇಂದ್ರ ಆರೋಗ್ಯ ಸಚಿವಾಲಯದ ಹೇಳಿಕೆ ಪ್ರಕಾರ, ಪತ್ತೆಯಾದ ಎರಡನೇ ವ್ಯಕ್ತಿ ಚೀನಾಕ್ಕೆ ಪ್ರಯಾಣಿಸಿದ ವರದಿಯಿದೆ. ಯಾವ ರೋಗಿಗೆ ಯಾವ ಆಸ್ಪತ್ರೆಯಲ್ಲಿ ಎಂದು ಇನ್ನಷ್ಟೆ ಆರೋಗ್ಯ ಇಲಾಖೆ ಬಹಿರಂಗಪಡಿಸಬೇಕಿದೆ. ಸದ್ಯ ರೋಗಿಯನ್ನು ಆಸ್ಪತ್ರೆಯ ತೀವ್ರ ನಿಗಾ ಘಟಕದಲ್ಲಿ ಇರಿಸಲಾಗಿದ್ದು ಆರೋಗ್ಯ ಸ್ಥಿತಿ ಸ್ಥಿರವಾಗಿದೆ ಎಂದು ತಿಳಿದುಬಂದಿದೆ.
ಕೇರಳ ಆರೋಗ್ಯ ಸಚಿವೆ ಕೆ ಕೆ ಶೈಲಜಾ ಕೊಲ್ಲಂ ಜಿಲ್ಲೆಯ ನೀಂದಕರ ತಾಲ್ಲೂಕು ಆಸ್ಪತ್ರೆಯಲ್ಲಿ ಮಾಧ್ಯಮ ಪ್ರತಿನಿಧಿಗಳಿಗೆ ಹೆಚ್ಚಿನ ವಿವರ ನೀಡಲಿದ್ದಾರೆ ಎಂದು ಹೇಳಲಾಗುತ್ತಿದೆ.
ಈ ಹಿಂದೆ ಕೊರೊನಾ ವೈರಸ್ ಸೋಂಕು ಪ್ರಕರಣ ಕೇರಳದ ತ್ರಿಶೂರ್ ನಲ್ಲಿ ವರದಿಯಾಗಿತ್ತು.
ಕೇರಳ ರಾಜ್ಯದಲ್ಲಿ ಸದ್ಯ ಕೊರೊನಾ ಪೀಡಿತ ದೇಶಗಳಿಂದ ಬಂದ 1,793 ಮಂದಿಯನ್ನು ಕಣ್ಗಾವಲಿನಲ್ಲಿ ಇರಿಸಿದ್ದು ಅವರಲ್ಲಿ 1,723 ಮಂದಿಯನ್ನು ಪ್ರತ್ಯೇಕ ಕೊಠಡಿಗಳಲ್ಲಿ ಮತ್ತು 70 ಮಂದಿಯನ್ನು ಆಯ್ದ ಪ್ರತ್ಯೇಕ ವ್ಯವಸ್ಥಾ ಕೇಂದ್ರಗಳಲ್ಲಿ ಇರಿಸಲಾಗಿದೆ.
