ಲಡಾಖ್: ಅತ್ಯಂತ ದುರ್ಗಮ ಹಿಮಪರ್ವತದಲ್ಲಿ ಭಾರತೀಯ ಸೇನೆ ಮತ್ತೊಂದು ಸಾಹಸ ಮೆರೆದಿದ್ದು, 18,600 ಅಡಿ ಎತ್ತರದ ಹಿಮಪರ್ವತದಲ್ಲಿ ರಕ್ಷಣಾ ಕಾರ್ಯಾಚರಣೆ ನಡೆಸಿದೆ.
ಹೌದು.. ಲಡಾಖ್ ನ ನುನ್ ಕುನ್ ಪ್ರದೇಶದ ಸಮೀಪ ಸಮುದ್ರ ಮಟ್ಟದಿಂದ 18,600 ಅಡಿ ಎತ್ತರದಲ್ಲಿ ಭಾರತೀಯ ಸೇನೆಯ ಏವಿಯೇಷನ್ ವಿಭಾಗದ ಪೈಲಟ್ಗಳು ಅತ್ಯಂತ ಸಾಹಸಮಯ ಗಾಯಾಳು ಸ್ಥಳಾಂತರ ಕಾರ್ಯಾಚರಣೆ ನಡೆಸಿ, ಕಡಿದಾದ ಬೆಟ್ಟದ ಇಳಿಜಾರಿನಲ್ಲಿ ಸಿಲುಕಿದ್ದ ಗಾಯಾಳುವನ್ನು ಸುರಕ್ಷಿತವಾಗಿ ಸ್ಥಳಾಂತರಿಸಿದ್ದಾರೆ.
ಬಲವಾದ ಗಾಳಿ ಬೀಸುತ್ತಿದ್ದ ಈ ಪ್ರದೇಶದಲ್ಲಿ ಹೆಲಿಕಾಪ್ಟರ್ ಇಳಿಸಲು ಸೂಕ್ತ ಸ್ಥಳವೇ ಇರಲಿಲ್ಲ. ಅತ್ಯಂತ ಕಡಿದಾದ ಮತ್ತು ದುರ್ಗಮ ಭೂಪ್ರದೇಶದಲ್ಲಿ ಕಾರ್ಯಾಚರಣೆ ನಡೆಸಬೇಕಾಗಿದ್ದರಿಂದ ಪೈಲಟ್ಗಳಿಗೆ ಇದು ದೊಡ್ಡ ಸವಾಲಾಗಿತ್ತು.
ಪ್ರತಿಕೂಲ ಹವಾಮಾನ ಹಾಗೂ ಅತಿ ಎತ್ತರದ ಪರಿಸ್ಥಿತಿಯ ನಡುವೆಯೂ ಪೈಲಟ್ಗಳು ಅತ್ಯಂತ ನಿಖರತೆಯಿಂದ ಹೆಲಿಕಾಪ್ಟರ್ ಅನ್ನು ನಿಯಂತ್ರಿಸಿ ಗಾಯಾಳುವಿನ ಬಳಿಗೆ ತಲುಪಿದರು.
ಕಾರ್ಯಾಚರಣೆಗೆ ಹೆಲಿಕಾಪ್ಟರ್ನ ತೂಕವನ್ನು ಕಡಿಮೆ ಮಾಡಲು ಅಗತ್ಯವಿಲ್ಲದ ಉಪಕರಣಗಳನ್ನು ತೆಗೆದುಹಾಕಲಾಗಿತ್ತು. ಸೀಮಿತ ಪ್ರಮಾಣದ ಇಂಧನದೊಂದಿಗೆ ಹೆಲಿಕಾಪ್ಟರ್ ಕಾರ್ಯಾಚರಣೆ ನಡೆಸಿತು. ಬಳಿಕ ಪೈಲಟ್ಗಳು ಅತ್ಯಂತ ಅಪಾಯಕಾರಿ ‘ಒನ್-ಸ್ಕಿಡ್ ಲ್ಯಾಂಡಿಂಗ್’ ತಂತ್ರವನ್ನು ಯಶಸ್ವಿಯಾಗಿ ಬಳಸಿದರು.
ಹೆಲಿಕಾಪ್ಟರ್ನ ಒಂದು ಸ್ಕಿಡ್ ಮಾತ್ರ ಕಡಿದಾದ ಇಳಿಜಾರನ್ನು ಸ್ಪರ್ಶಿಸುವಂತೆ ಮಾಡಿ ಗಾಯಾಳುವನ್ನು ಏರ್ಲಿಫ್ಟ್ ಮಾಡಲಾಯಿತು.
ದಿನದ ಕೊನೆಯ ಲಭ್ಯವಿದ್ದ ಲ್ಯಾಂಡಿಂಗ್ ಅವಕಾಶದಲ್ಲೇ ಈ ಕಾರ್ಯಾಚರಣೆ ನಡೆಸಲಾಗಿತ್ತು. ಹೀಗಾಗಿ ಸಮಯಪ್ರಜ್ಞೆ, ನಿಖರತೆ ಮತ್ತು ಪೈಲಟ್ಗಳ ಕೌಶಲ್ಯ ಈ ರಕ್ಷಣಾ ಕಾರ್ಯಾಚರಣೆಯಲ್ಲಿ ನಿರ್ಣಾಯಕವಾಗಿತ್ತು. ತೀವ್ರ ಗಾಳಿ ಮತ್ತು ಅತ್ಯಂತ ಕಠಿಣ ಭೂಪ್ರದೇಶದ ನಡುವೆಯೂ ಪೈಲಟ್ಗಳು ಕಾರ್ಯಾಚರಣೆಯನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿದರು.
ಅತ್ಯಂತ ಪ್ರತಿಕೂಲವಾದ ಎತ್ತರ ಪ್ರದೇಶಗಳಲ್ಲೂ ಸಂಕೀರ್ಣ ರಕ್ಷಣಾ ಕಾರ್ಯಾಚರಣೆಗಳನ್ನು ಕೈಗೊಳ್ಳುವ ಭಾರತೀಯ ಸೇನಾ ಏವಿಯೇಷನ್ ಸಿಬ್ಬಂದಿಯ ಸಾಮರ್ಥ್ಯವನ್ನು ಈ ಕಾರ್ಯಾಚರಣೆ ಮತ್ತೊಮ್ಮೆ ಎತ್ತಿ ತೋರಿಸಿದೆ.
ಜೀವ ಉಳಿಸುವ ಉದ್ದೇಶದಿಂದ ತಮ್ಮದೇ ಸುರಕ್ಷತೆಯನ್ನು ಪಣಕ್ಕಿಟ್ಟು ನಡೆಸಿದ ಈ ಸಾಹಸಮಯ ಕಾರ್ಯಾಚರಣೆ ಭಾರತೀಯ ಸೇನಾ ಏವಿಯೇಷನ್ ಪೈಲಟ್ಗಳ ಕೌಶಲ್ಯ, ಧೈರ್ಯ, ಕರ್ತವ್ಯನಿಷ್ಠೆ ಮತ್ತು ಮಾನವೀಯ ಕಾಳಜಿಗೆ ಸಾಕ್ಷಿಯಾಗಿದೆ.
ಭಾರತೀಯ ಸೇನಾ ಏವಿಯೇಷನ್ ವಿಭಾಗದ ಪೈಲಟ್ಗಳ ವೃತ್ತಿಪರ ಕೌಶಲ್ಯ, ಅಚಲ ಧೈರ್ಯ, ಕರ್ತವ್ಯನಿಷ್ಠೆ ಮತ್ತು ಮಾನವೀಯ ಕಾಳಜಿಗೆ ಈ ರಕ್ಷಣಾ ಕಾರ್ಯಾಚರಣೆ ಮತ್ತೊಂದು ಉದಾಹರಣೆಯಾಗಿದೆ.
