ಹಾಕಿ: ಸ್ಪೇನ್ಗೆ- ಭಾರತ ತಿರುಗೇಟು

ಸ್ಯಾಂಟ್ ಕ್ಯೂಗಟ್ ಡೆಲ್ ವಾಲೆಸ್: ಯೂರೋಪ್ ಪ್ರವಾಸದಲ್ಲಿರುವ ಭಾರತ ಹಾಕಿ ತಂಡ ಸ್ಪೇನ್ ವಿರುದ್ಧ ಸೋಲನುಭವಿಸಿತ್ತಾದರೂ ಎರಡನೇ ಪಂದ್ಯದಲ್ಲಿ ಅರ್ಹ ಗೆಲುವು ಸಂಪಾದಿಸಿ ತಿರುಗೇಟು ನೀಡುವಲ್ಲಿ ಸಫಲವಾಗಿದೆ. 

ಇದರಿಂದಾಗಿ ಮೂರು ಪಂದ್ಯ ಸರಣಿ 1-1ರಿಂದ ಸಮಬಲ ಸಾಧಿಸಿದಂತಾಗಿದೆ. ಬುಧವಾರ ನಡೆದ ಪಂದ್ಯದಲ್ಲಿ ಸರ್ದಾರ್ ಸಿಂಗ ನೇತೃತ್ವದ ಭಾರತ ತಂಡ 2-0 ಗೋಲುಗಳ ಅಂತರದಲ್ಲಿ ಜಯ ಸಾಧಿಸಿತು. ಪಂದ್ಯದ ಆರಂಭಿಕ ನಿಮಿಷದಿಂದಲೂ ಉಭಯ ತಂಡಗಳು ತಮ್ಮ ಕೌಶಲಗಳನ್ನು ಪ್ರದರ್ಶಿಸುತ್ತಾ ಆಕ್ರಮಣಕಾರಿ ಆಟಕ್ಕೆ ಮುಂದಾದವು. 

ಭಾರತದ ಆಟಗಾರರಾದ ಎಸ್.ವಿ ಸುನೀಲ್ ಹಾಗೂ ಆಕಾಶ್ದೀದಪ್ ಸಿಂಗ್ ಚೆಂಡನ್ನು ಅತ್ಯದ್ಭುತ ರೀತಿಯಲ್ಲಿ ಪಾಸ್ ಮಾಡುತ್ತಾ ಗೋಲಿನತ್ತ ಕೊಂಡೊಯ್ದರೂ, ಸ್ಪೇನ್ ಗೋಲಿ ಅತ್ಯುತ್ತಮ ರೀತಿಯಲ್ಲಿ ಅದನ್ನು ತಡೆಯುವಲ್ಲಿ ಯಶಸ್ವಿಯಾದರು. ಪರಿಣಾಮ ಮೊದಲ ಕ್ವಾರ್ಟರ್ ನಲ್ಲಿ ಉಭಯ ತಂಡಗಳು ಗೋಲಿನ ಖಾತೆ ತೆರೆಯಲು ಸಾಧ್ಯವಾಗಲಿಲ್ಲ.