ಪಾತ್ರೆಗಳನ್ನು ಕಲಾಯಿ ಮಾಡುವಾಗ ನವಸಾಗರವನ್ನು ಉಪಯೋಗಿಸುತ್ತಾರೆ. ಇದಕ್ಕೆ ಕಾರಣ ಹೆಚ್ಚಿನವರಿಗೆ ಗೊತ್ತೇ ಇಲ್ಲ.
ನವಸಾಗರದ ರಾಸಾಯನಿಕ ಹೆಸರು ಅಮೋನಿಯಂ ಕ್ಲೋರೈಡ್. ಕಲಾಯಿ ಮಾಡುವುದೆಂದರೆ ಪಾತ್ರೆಯ ಒಳಮೈಯನ್ನು ತವರದಿಂದ ಲೇಪಿಸುವುದು. ಪಾತ್ರೆಗೆ ತವರವು ಭದ್ರವಾಗಿ ಲೇಪನವಾಗ ಬೇಕಾದರೆ; ಪಾತ್ರೆಯ ಒಳ ಮೈ ಶುಭ್ರವಾಗಿರಬೇಕು ಮತ್ತು ಕಿಲುಬುರಹಿತವಾಗಿರಬೇಕು. ಪಾತ್ರೆಗೆ ನವಸಾಗರವನ್ನು ಹಚ್ಚಿ ಕಾಯಿಸಿದಾಗ ಅದು ವಿಭಜನೆ ಹೊಂದಿ ಅಮೋನಿಯ ಮತ್ತು ಹೈಡ್ರೋಜನ್ ಕ್ಲೋರೈಡ್ ಉತ್ಪನ್ನವಾಗುತ್ತವೆ. ಗಾಳಿಗಿಂತ ಹಗುರವಾದ ಅಮೋನಿಯ ಹೊರಹೋಗುವುದು. ಆಮ್ಲೀಯವಾದ ಹೈಡ್ರೋಜನ್ ಕ್ಲೋರೈಡ್ ಪಾತ್ರೆಯನ್ನು ಸ್ವಚ್ಛ ಮಾಡಿ ಪಾತ್ರೆಯ ಕಿಲುಬನ್ನು ಹೊರಹಾಕುತ್ತದೆ. ಇದೂ ಅಲ್ಲದೆ, ಕರಗಿದ ತವರವು ಪಾತ್ರೆಯ ಒಳಭಾಗದಲ್ಲಿ ಸಮನಾಗಿ ಹರಡಿಕೊಳ್ಳಲು ಸಹಾಯ ಮಾಡುತ್ತದೆ. ಈ ಕಾರಣದಿಂದಾಗಿ ಕಲಾಯಿ ಮಾಡುವಾಗ ನವಸಾಗರವನ್ನು ಉಪಯೋಗಿಸುತ್ತಾರೆ.
-ಎಚ್. ಕೃಷ್ಣಮೂರ್ತಿ
Advertisement