ಉಜ್ಜನಿ ಜಲೇಂದ್ರ, ಪಾಂಡವಪುರ
= ಕಿವಿಗಳಿಗೂ ರೆಪ್ಪೆ ಇದ್ದಿದ್ದರೆ?
-ಕಣ್ಣು ಹೊಡೆಯುವುದರ ಜತೆಗೆ ಕಿವಿಯನ್ನೂ ಹೊಡೆಯುತ್ತಿದ್ದರು!
ವಿಷ್ಣು ಶಂಕರ್, ಶಿವಮೊಗ್ಗ
= ಯಡ್ಡಿ ಮತ್ತು ಈಶ್ವರಿ ಒಂದೇ ನಾಣ್ಯದ ಎರಡು ಮುಖಗಳಂತೆ ಹೌದಾ?
-'ಸವಕಲು ನಾಣ್ಯ'ದ ಎರಡು ಮುಖಗಳು!
ಕೆ.ಎನ್. ನಾರಾಯಣರೆಡ್ಡಿ, ಕೆಜಿಎಫ್
= ಪ್ರೀತಿಸಿ ಮದುವೆಯಾದವಳು ಮನದನ್ನೆ, ಆದರೆ ವರದಕ್ಷಿಣೆ ಕೊಟ್ಟು ಮದುವೆಯಾದವಳು?
-'ಮನಿ'ದನ್ನೆ!
ಕೆ.ಎಂ. ಲಿಂಗರಾಜು, ನಂಜನಗೂಡು
= ದೇಶದ ರಾಜಧಾನಿ ಅತ್ಯಾಚಾರಿಗಳಿಂದ ಕುಪ್ರಸಿದ್ಧವಾದರೆ ರಾಜ್ಯದ ರಾಜಧಾನಿ ಬೆಂಗಳೂರು?
-ಭ್ರಷ್ಟಾಚಾರಿಗಳಿಂದ ಕುಪ್ರಸಿದ್ಧ!
ಫ್ಯಾಷನ್ ಡಿಸೈನರ್ ಮಧು, ಹಾಸನ
= ಯಡಿಯೂರಪ್ಪನವರಿಗೆ ಇದು ವಂಸತ ಕಾಲವೋ, ವಿನಾಶಕಾಲವೋ
-ಅವರೀಗ 'ರಾಹು'ಲ್ ಕಾಲವನ್ನು ನಂಬಿಕೊಂಡಿದ್ದಾರೆ!
ರವಿಕುಮಾರ್ ಜಿ.ಬಿ., ಬೆಂಗಳೂರು
= ಯಡಿಯೂರಪ್ಪ ನಮ್ಮ ನಾಯಕ ಎನ್ನುತ್ತಿದ್ದ ರೇಣುಕಾಚಾರ್ಯ ಈಗ ಏಕೆ ಮಾತು ಬದಲಾಯಿಸುತ್ತಿದ್ದಾರೆ?
-ಅವರಿಗೆ ನಾಯಕನಿಗಿಂತ ತಮ್ಮ 'ಕಾಯಕ' ಮುಖ್ಯ!
ವಿ. ಹೇಮಂತ್‌ಕುಮಾರ್, ಬೆಂಗಳೂರು
= ನರಿ ಕಂಡರೆ ಅದೃಷ್ಟ ಎನ್ನುವ ನಾವು ಮನೆಯಲ್ಲಿ ನರಿಯನ್ನೇಕೆ ಸಾಕುವುದಿಲ್ಲ?
-ಅವಾಗ ಅದು 'ಆರ್ಡಿನರಿ' ಆಗುತ್ತಲ್ಲ!
