ಪ್ರವಾಸಕ್ಕೆ ಅತ್ಯುತ್ತಮ ಸಮಯ ಯಾವುದು? Shoulder season ಬಗ್ಗೆ ಎಷ್ಟು ಗೊತ್ತು..?
ಪ್ರವಾಸಕ್ಕೆ ಪ್ಲ್ಯಾನ್ ಮಾಡುವವರು ಸಾಮಾನ್ಯವಾಗಿ ಪೀಕ್ ಸೀಸನ್ ಅಥವಾ ಆಫ್ ಸೀಸನ್ನ್ನೇ ಆಯ್ಕೆ ಮಾಡುತ್ತಾರೆ. ಪೀಕ್ ಸೀಸನ್ನಲ್ಲಿ ಜನಸಂದಣಿ ಮತ್ತು ವೆಚ್ಚ ಹೆಚ್ಚಾಗುತ್ತದೆ, ಆಫ್ ಸೀಸನ್ನಲ್ಲಿ ಹವಾಮಾನ ಮತ್ತು ಸೌಲಭ್ಯಗಳು ಅನುಕೂಲಕರವಾಗಿರದೆ ಇರಬಹುದು. ಆದರೆ, ಈ ಎರಡರ ಮಧ್ಯೆ ಇರುವ ಶೋಲ್ಡರ್ ಸೀಸನ್ ಇತ್ತೀಚಿನ ದಿನಗಳಲ್ಲಿ ಪ್ರವಾಸಿಗರ ಅತ್ಯುತ್ತಮ ಆಯ್ಕೆಯಾಗಿ ಹೊರಹೊಮ್ಮುತ್ತಿದೆ.
ಶೋಲ್ಡರ್ ಸೀಸನ್ ಎಂದರೆ ಪೀಕ್ ಸೀಸನ್ ಮತ್ತು ಆಫ್ ಸೀಸನ್ ನಡುವಿನ ಅವಧಿ. ಸಾಮಾನ್ಯವಾಗಿ ಇದು ವರ್ಷಕ್ಕೆ ಎರಡು ಬಾರಿ ಬರುತ್ತದೆ. ಏಪ್ರಿಲ್ ರಿಂದ ಮೇ ಹಾಗೂ ಸೆಪ್ಟೆಂಬರ್ ರಿಂದ ಅಕ್ಟೋಬರ್ ತಿಂಗಳಲ್ಲಿ. ಆದರೆ, ಪ್ರತಿ ದೇಶ ಮತ್ತು ಪ್ರದೇಶದ ಹವಾಮಾನ ಹಾಗೂ ಪ್ರವಾಸಿ ಚಟುವಟಿಕೆಗಳ ಮೇಲೆ ಅವಲಂಬಿಸಿ ಈ ಅವಧಿ ಬದಲಾಗಬಹುದು.
ಈ ಸಮಯದಲ್ಲಿ ಪ್ರವಾಸದ ವೆಚ್ಚವು ಗಣನೀಯವಾಗಿ ಕಡಿಮೆಯಾಗಿರುತ್ತದೆ. ಹೋಟೆಲ್ ದರಗಳು, ವಿಮಾನ ಟಿಕೆಟ್ ಮತ್ತು ಪ್ರವಾಸ ಪ್ಯಾಕೇಜ್ಗಳು ಪೀಕ್ ಸೀಸನ್ಗಿಂತ ಕಡಿಮೆ ದರದಲ್ಲಿ ಲಭ್ಯವಾಗುತ್ತವೆ. ಇದರಿಂದ ಕಡಿಮೆ ಬಜೆಟ್ನಲ್ಲಿ ಹೆಚ್ಚಿನ ಸ್ಥಳಗಳಿಗೆ ಭೇಟಿ ನೀಡುವ ಅವಕಾಶ ಪ್ರವಾಸಿಗರಿಗೆ ದೊರೆಯುತ್ತದೆ.
ಇದಲ್ಲದೆ, ಶೋಲ್ಡರ್ ಸೀಸನ್ನಲ್ಲಿ ಜನಸಂದಣಿ ಕಡಿಮೆ ಇರುತ್ತದೆ. ಪೀಕ್ ಸೀಸನ್ನ ಗದ್ದಲ ಮತ್ತು ಒತ್ತಡ ಇಲ್ಲದೆ ಪ್ರವಾಸಿ ಸ್ಥಳಗಳನ್ನು ಆರಾಮವಾಗಿ ವೀಕ್ಷಿಸಬಹುದು.
ಪ್ರವಾಸಿ ಮಾರ್ಗದರ್ಶಕರು ಮತ್ತು ಟೂರ್ ಆಪರೇಟರ್ಗಳು ಉತ್ತಮ ಸೇವೆ ನೀಡಲು ಪ್ರಯತ್ನಿಸುವುದರಿಂದ ಪ್ರವಾಸಿಗರಿಗೆ ಗುಣಮಟ್ಟದ ಅನುಭವ ಸಿಗುತ್ತದೆ.
ಸೆಪ್ಟೆಂಬರ್–ಅಕ್ಟೋಬರ್ ಅವಧಿಯಲ್ಲಿ ಕೆಲ ದೇಶಗಳಲ್ಲಿ ಶರತ್ಕಾಲ (ಅತಿಯಾದ ಬಿಸಿಲು ಅಥವಾ ಅತಿಯಾದ ಚಳಿಯಿಲ್ಲದ ಮಧ್ಯಮ ಹವಾಮಾನ) ಆರಂಭವಾಗುತ್ತದೆ. ಈ ಸಮಯದಲ್ಲಿ ಮರಗಳ ಎಲೆಗಳು ಬಣ್ಣ ಬದಲಾಯಿಸುವ ದೃಶ್ಯ, ಉದ್ಯಾನವನಗಳ ಸೌಂದರ್ಯ ಮತ್ತು ಪ್ರಕೃತಿಯ ಮನಮೋಹಕ ದೃಶ್ಯಗಳು ಪ್ರವಾಸಿಗರನ್ನು ಆಕರ್ಷಿಸುತ್ತವೆ.
ಒಟ್ಟಿನಲ್ಲಿ, ಕಡಿಮೆ ವೆಚ್ಚ, ಕಡಿಮೆ ಜನಸಂದಣಿ, ಸುಂದರ ಹವಾಮಾನ ಮತ್ತು ಉತ್ತಮ ಸೇವೆಗಳ ಕಾರಣ ಶೋಲ್ಡರ್ ಸೀಸನ್ ಪ್ರವಾಸಕ್ಕೆ ಅತ್ಯುತ್ತಮ ಸಮಯ ಎಂದು ತಜ್ಞರು ಅಭಿಪ್ರಾಯಪಡುತ್ತಾರೆ. ಪ್ರವಾಸ ಪ್ರಿಯರು ಈ ಸಮಯವನ್ನು ತಮ್ಮ ಪ್ರವಾಸ ಯೋಜನೆಗಳಲ್ಲಿ ಖಂಡಿತವಾಗಿ ಪರಿಗಣಿಸಬಹುದು.