ನವದೆಹಲಿ: ಸಾಲ ಬಾಕಿದಾರರು ತಲೆಮರೆಸಿಕೊಳ್ಳುವುದನ್ನು ತಪ್ಪಿಸಲು ಸರ್ಕಾರ ಸರಣಿ ನಿಯಮಗಳನ್ನು ಜಾರಿಗೆ ತಂದಿದ್ದು, ದೇಶಭ್ರಷ್ಟ ಆರ್ಥಿಕ ವಂಚನೆ ಕಾನೂನನ್ನು ಕಾರ್ಯಗತಗೊಳಿಸಲು ರಾಷ್ಟ್ರಪತಿಗಳು ಕಳೆದ ವಾರ ವಿಧೇಯಕವೊಂದನ್ನು ಪ್ರಚುರಪಡಿಸಿದರು.
ದೇಶಭ್ರಷ್ಟ ಆರ್ಥಿಕ ವಂಚನೆ ವಿಧೇಯಕ-2018 ಎಂದು ಇದಕ್ಕೆ ಹೆಸರಿಡಲಾಗಿದ್ದು, ಭಾರತೀಯ ಕಾನೂನಿನಲ್ಲಿ ನ್ಯಾಯಾಲಯದಿಂದ ಹೊರಗೆ ಕಾನೂನಿನ ಪ್ರಕ್ರಿಯೆಯಿಂದ ತಪ್ಪಿಸದಂತೆ ಆರ್ಥಿಕ ಅಪರಾಧಿಯನ್ನು ತಡೆಗಟ್ಟುತ್ತದೆ.
ಬ್ಯಾಂಕುಗಳಿಂದ ಸಾಲ ತೆಗೆದುಕೊಂಡು ಹಿಂತಿರುಗಿಸದೆ ವಂಚಿಸುವವರಿಂದ ಸಾಲ ಮರುಪಾವತಿ ಮಾಡಿಸಿಕೊಳ್ಳುವುದು ಮತ್ತು ಅವರ ಆಸ್ತಿಗಳನ್ನು ಮುಟ್ಟುಗೋಲು ಹಾಕಿಕೊಳ್ಳಲು ಈ ಕಾನೂನು ನೆರವಾಗಲಿದೆ.
ನೀರವ್ ಮೋದಿ ಪಂಜಾಬ್ ನ್ಯಾಷನಲ್ ಬ್ಯಾಂಕಿಗೆ ಕೋಟ್ಯಂತರ ರೂಪಾಯಿ ನಷ್ಟಮಾಡಿ ದೇಶಬಿಟ್ಟು ಹೋದ ಪ್ರಕರಣದ ನಂತರ ಹಣಕಾಸು ಸಚಿವಾಲಯ ಇಂತಹ ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿದೆ.
ಆರ್ಥಿಕ ಅಪರಾಧ ಕಾನೂನಿನಡಿಯಲ್ಲಿ ಸಹಾಯಕ ನಿರ್ದೇಶಕರು ಮತ್ತು ಜಾರಿ ನಿರ್ದೇಶನಾಲಯ ಅಧಿಕಾರಿಗಳು ತಮ್ಮ ಅಧಿಕಾರ ಬಳಸಿ ಆರ್ಥಿಕ ಭ್ರಷ್ಟಾಚಾರರ ದಾಖಲೆಗಳು/ಆಸ್ತಿಗಳನ್ನು ಮುಟ್ಟುಗೋಲು ಹಾಕಿಕೊಳ್ಳಬಹುದು. ಜಾರಿ ನಿರ್ದೇಶನಾಲಯದ ಸ್ಥಳೀಯ ಕಚೇರಿಯ ವಿಶೇಷ ನಿರ್ದೇಶಕರು ಆಸ್ತಿಯನ್ನು ಮುಟ್ಟುಗೋಲು ಹಾಕಿಕೊಳ್ಳುವ ಆಡಳಿತಾಧಿಕಾರಿಯಾಗಿ ಕಾರ್ಯನಿರ್ವಹಿಸಲಿದ್ದಾರೆ ಎಂದು ಹಣಕಾಸು ಸಚಿವಾಲಯದ ಮತ್ತೊಂದು ಅಧಿಸೂಚನೆ ತಿಳಿಸಿದೆ.
