ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದ ಕೇಂದ್ರದ NDA ಸರ್ಕಾರವು ಅವಧಿಗೂ ಮುಂಚಿತವಾಗಿ, ಹೆಚ್ಚುವರಿ ತೆರಿಗೆ ಹಂಚಿಕೆಯಲ್ಲಿ ರಾಜ್ಯಗಳಿಗೆ ಒಟ್ಟು 1,09,019 ಕೋಟಿ ರೂಪಾಯಿ ಹಣವನ್ನ ಬಿಡುಗಡೆ ಮಾಡಿದೆ. ಇದರಲ್ಲಿ ಉತ್ತರ ಪ್ರದೇಶ ರಾಜ್ಯವು ಅತ್ಯಧಿಕ ಅಂದರೆ 19,208 ಕೋಟಿ ರೂಪಾಯಿಗಳನ್ನು ಪಡೆದುಕೊಂಡಿದ್ದರೆ, ಸಿಕ್ಕಿಂ ₹365 ಕೋಟಿ ರೂಪಾಯಿಯೊಂದಿಗೆ ಅತಿ ಕಡಿಮೆ ಹಣ ಪಡೆದಿದೆ. ಹಾಗಾದ್ರೆ, ಕರ್ನಾಟಕ ಪಡೆದ ಹಣ ಎಷ್ಟು? ಇಲ್ಲಿದೆ ಆ ಕುರಿತ ವರದಿ:
ರಾಜ್ಯಗಳಿಗೆ ಡಬಲ್ ಧಮಾಕ!
ಹಣಕಾಸು ಆಯೋಗದ ಶಿಫಾರಸಿನ ಅನ್ವಯ, ಕೇಂದ್ರ ಸರ್ಕಾರವು ತಾನು ಸಂಗ್ರಹಿಸುವ ಒಟ್ಟು ತೆರಿಗೆಯ ಶೇ. 41 ರಷ್ಟು ಮೊತ್ತವನ್ನು ಒಂದು ಆರ್ಥಿಕ ವರ್ಷದಲ್ಲಿ 14 ಕಂತುಗಳ ಮೂಲಕ ರಾಜ್ಯಗಳಿಗೆ ವಿತರಿಸುತ್ತದೆ. ಇನ್ನು, ಈಗ ಬಿಡುಗಡೆಯಾಗಿರುವ 1.09 ಲಕ್ಷ ಕೋಟಿ ರೂಪಾಯಿ ಹಣವು, ಆಗಸ್ಟ್ 10 ರಂದು ಬಿಡುಗಡೆಯಾಗಬೇಕಿರುವ ಸಾಮಾನ್ಯ ಮಾಸಿಕ ಹಂಚಿಕೆಯ ಜೊತೆಗೆ, ರಾಜ್ಯಗಳ ಮೂಲಸೌಕರ್ಯ ಮತ್ತು ಅಭಿವೃದ್ಧಿ ವೆಚ್ಚಗಳನ್ನು ವೇಗಗೊಳಿಸಲು ಹೆಚ್ಚುವರಿ ಹಣವಾಗಿದೆ ಎಂದು ಹಣಕಾಸು ಇಲಾಖೆ ತಿಳಿಸಿದೆ.
ಕರ್ನಾಟಕಕ್ಕೆ ಎಷ್ಟು ಹಣ?
ಕೇಂದ್ರ ಸರ್ಕಾರವು ರಾಜ್ಯಗಳಿಗೆ ಬಿಡುಗಡೆ ಮಾಡಿರುವ ಒಟ್ಟು 1,09,019 ಕೋಟಿ ರೂಪಾಯಿ ಹೆಚ್ಚುವರಿ ತೆರಿಗೆ ಹಂಚಿಕೆಯಲ್ಲಿ ಕರ್ನಾಟಕಕ್ಕೆ 4,504 ಕೋಟಿ ರೂಪಾಯಿ ಲಭಿಸಿದ್ದರೆ, ದೇಶದ ಇತರ ಪ್ರಮುಖ ರಾಜ್ಯಗಳಿಗೆ ಹಂಚಿಕೆಯಾಗಿರುವ ಮೊತ್ತದ ವಿವರಗಳು ಈ ಕೆಳಗಿನಂತಿವೆ:
ಅತಿ ಹೆಚ್ಚು ತೆರಿಗೆ ಪಾಲು ಪಡೆದ ಪ್ರಮುಖ ರಾಜ್ಯಗಳು
ಉತ್ತರ ಪ್ರದೇಶ: ₹19,208 ಕೋಟಿ
ಬಿಹಾರ: ₹10,845 ಕೋಟಿ
ಮಧ್ಯಪ್ರದೇಶ: ₹8,010 ಕೋಟಿ
ಪಶ್ಚಿಮ ಬಂಗಾಳ: ₹7,866 ಕೋಟಿ
ಮಹಾರಾಷ್ಟ್ರ: ₹7,022 ಕೋಟಿ
ಇತರ ಪ್ರಮುಖ ರಾಜ್ಯಗಳ ಹಂಚಿಕೆ ವಿವರ
ರಾಜಸ್ಥಾನ: ₹6,460 ಕೋಟಿ
ಒಡಿಶಾ: ₹4,819 ಕೋಟಿ
ಆಂಧ್ರಪ್ರದೇಶ: ₹4,597 ಕೋಟಿ
ತಮಿಳುನಾಡು: ₹4,466 ಕೋಟಿ
ಗುಜರಾತ್: ₹4,094 ಕೋಟಿ
ಅಸ್ಸಾಂ: ₹3,552 ಕೋಟಿ
ಅರುಣಾಚಲ ಪ್ರದೇಶ: ₹1,476 ಕೋಟಿ
ಕಡಿಮೆ ಅನುದಾನ ಪಡೆದ ಸಣ್ಣ ರಾಜ್ಯಗಳು
ನಾಗಾಲ್ಯಾಂಡ್: ₹524 ಕೋಟಿ
ಗೋವಾ: ₹398 ಕೋಟಿ
ಸಿಕ್ಕಿಂ: ₹365 ಕೋಟಿ
