ನವದೆಹಲಿ: ಬಾಲಿವುಡ್ ನಟ ಸಲ್ಮಾನ್‌ ಖಾನ್ ಅಭಿನಯದ ‘ಟ್ಯೂಬ್‌ಲೈಟ್‌' ಚಿತ್ರ ದಾಖಲೆ ನಿರ್ಮಾಣಕ್ಕೆ ಸಜ್ಜಾಗುತ್ತಿದ್ದು, ಬಾಹುಬಲಿ 2 ನಿರ್ಮಿಸಿದ್ದ ದಾಖಲೆಯೊಂದನ್ನು ಮುರಿಯುವ ಸಾಧ್ಯತೆ ಇದೆ ಎಂದು ಹೇಳಲಾಗುತ್ತಿದೆ.
ಮೂಲಗಳ ಪ್ರಕಾರ ಇದೇ ಜೂನ್ 25ರಂದು ತೆರೆಕಾಣುತ್ತಿರುವ ಟ್ಯೂಬ್ ಲೈಟ್ ಚಿತ್ರವನ್ನು ವಿಶ್ವಾದ್ಯಂತ ಬರೊಬ್ಬರಿ 10 ಸಾವಿರ ಸ್ಕ್ರೀನ್ ಗಳಲ್ಲಿ ತೆರೆಗೆ ತರಲು ಚಿತ್ರತಂಡ ಸಿದ್ಧತೆ ನಡೆಸಿದೆ. ಬಾಹುಬಲಿ 2 ಚಿತ್ರ 9 ಸಾವಿರ ಸ್ಕ್ರೀನ್ ಗಳಲ್ಲಿ ಏಕಕಾಲಕ್ಕೆ ತೆರೆಕಾಣುವ ಮೂಲಕ ದಾಖಲೆ ನಿರ್ಮಿಸಿತ್ತು. ಇದೀಗ ಟ್ಯೂಬ್ ಲೈಟ್ ಚಿತ್ರ ಈ ದಾಖಲೆಯನ್ನು ಮುರಿಯುವ ಸಾಧ್ಯತೆ ಇದೆ.
ಟ್ಯೂಬ್ ಲೈಟ್ ಚಿತ್ರವನ್ನು ಖ್ಯಾತ ನಿರ್ದೇಶಕ ಕಬೀರ್ ಖಾನ್ ನಿರ್ದೇಶನ ಮಾಡಿದ್ದು, 1962ರ ಭಾರತ-ಚೀನಾ ಯುದ್ಧದ ಕುರಿತಾದ ಕಥಾಹಂದರವನ್ನು ಚಿತ್ರಹೊಂದಿದೆ. ಲಕ್ಷ್ಮಣ್‌ ಸಿಂಗ್‌ ಬಿಷ್ತ್ ಮತ್ತು ಭಾರತ್‌ ಸಿಂಗ್‌ ಬಿಷ್ತ್ ಪಾತ್ರದಲ್ಲಿ ಸಲ್ಮಾನ್‌ ಮತ್ತು ಅವರ ಸೋದರ ಸೊಹೇಲ್‌ ಖಾನ್ ಅಭಿನಯಿಸಿದ್ದಾರೆ. ಚೀನಾದ ನಟಿ ಝು ಝು ಭಾರತದ ಚಿತ್ರದಲ್ಲಿ ಇದೇ ಮೊದಲ ಬಾರಿಗೆ ಅಭಿನಯಿಸಿದ್ದಾರೆ.
