ನುಚ್ಚು ನೂರಾಯ್ತು ಕಾಂಗರೂಗಳ 116 ವರ್ಷಗಳ ದಾಖಲೆ ಮುರಿಯುವ ಕನಸು

ಅಡಿಲೇಡ್: ಓವಲ್ ಮೈದಾನದಲ್ಲಿ ಭಾರತದ ಎದುರು ಟೆಸ್ಟ್ ಪಂದ್ಯ ಸೋಲುವ ಮೂಲಕ ಕಾಂಗರೂಗಳ 116 ವರ್ಷಗಳ ದಾಖಲೆ ಮುರಿಯುವ ಕನಸು ಕೂಡ ನುಚ್ಚು ನೂರಾಗಿದೆ.

ಹೌದು.. ಮೊದಲ ಟೆಸ್ಟ್ ಪಂದ್ಯ ನಡೆದ ಅಡಿಲೇಡ್ ಓವಲ್ ಪಿಚ್ ನಲ್ಲಿ ಆಸ್ಟ್ರೇಲಿಯಾ ತಂಡ ಕಳೆದ 11 ವರ್ಷಗಳಿಂದೀಚೆಗೆ 250ಕ್ಕೂ ಅಧಿಕ ರನ್ ಗಳ ಗುರಿಯನ್ನು ಮುಟ್ಟಿಲ್ಲ. ಭಾರತದ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯದಲ್ಲಿ ಆಸಿಸ್ ಬಳಗಕ್ಕೆ ಈ ಸುವರ್ಣಾವಕಾಶ ಲಭಿಸಿತ್ತಾದರೂ ಭಾರತೀಯ ಬೌಲರ್ ಗಳ ಸಾಂಘಿಕ ಹೋರಾಟದಿಂದಾಗಿ ಕಾಂಗರೂಗಳ ಕನಸು ನುಚ್ಚುನೂರಾಗಿದೆ.

ಅಡಿಲೇಡ್ ಅಂಗಳದಲ್ಲಿ ನಾಲ್ಕನೇ ಇನ್ನಿಂಗ್ಸ್ ನಲ್ಲಿ ಅತ್ಯಧಿಕ ಚೇಸಿಂಗ್ ದಾಖಲಾಗಿದ್ದು 1902ರಲ್ಲಿ. 300ಕ್ಕೂ ಅಧಿಕ ಟಾರ್ಗೆಟ್ ಚೇಸ್ ಅನ್ನು 6 ವಿಕೆಟ್ ಕಳೆದುಕೊಂಡು ಆಸ್ಟ್ರೇಲಿಯ ಚೇಸ್ ಮಾಡಿತ್ತು. 1982ರಲ್ಲಿ 239 ರನ್ ಅಡಿಲೇಡ್ ನಲ್ಲಿ ಯಶಸ್ವಿಯಾಗಿ ಚೇಸ್ ಆಗಿತ್ತು. ಇವೆರಡೂ ಪಂದ್ಯಗಳಲ್ಲಿ ಆಸ್ಟ್ರೇಲಿಯ ಗೆಲುವಿನ ನಗೆ ಬೀರಿತ್ತು. ಇವೆರಡೂ ಸಂದರ್ಭದಲ್ಲಿ ಇಂಗ್ಲೆಂಡ್ ಸೋಲನುಭವಿಸಿತ್ತು. 

ಆದರೀಗ ಮತ್ತದೇ ಇತಿಹಾಸ ಮರುಕಳಿಸಿದ್ದು ಭಾರತದ ವಿರುದ್ಧ ಮತ್ತೆ ಆಸ್ಚ್ರೇಲಿಯಾ 31 ರನ್ ಗಳ ಅಂತರದಲ್ಲಿ ಮಂಡಿಯೂರಿದೆ.