ಬೆಂಗಳೂರು: ದೇಶದ ಅನ್ನದಾತ ರೈತರನ್ನು ಎಲ್ಲ ರಾಜಕೀಯ ಪಕ್ಷಗಳು ವೋಟ್ ಬ್ಯಾಂಕ್ ರಾಜಕಾರಣದ ಗುಲಾಮರನ್ನಾಗಿ ಮಾಡಿಕೊಂಡಿವೆ. ರೈತರು ಇದರಿಂದ ಹೊರಬರಬೇಕಾದರೆ ರಾಜಕೀಯ ಮಾಡುವುದು ಅನಿವಾರ್ಯ ಆಮ್ ಆದ್ಮಿ ಪಕ್ಷದ ಉಚ್ಚಾಟಿತ ಮುಖಂಡ ಹಾಗೂ ಸ್ವರಾಜ್ ಸಂಘಟನೆ ಅಧ್ಯಕ್ಷ ಯೋಗೇಂದ್ರ ಯಾದವ್ ಅಭಿಪ್ರಾಯಪಟ್ಟರು.
ಭೂಸ್ವಾಧೀನ ಕಾಯಿದೆ ವಿರೋಧಿಸಿ, ರೈತ ಸಂಘ ಹಾಗೂ ಎಡಪಕ್ಷಗಳ ನೇತೃತ್ವದಲ್ಲಿ ನಾನಾ ಸಂಘಟನೆಗಳು ಮಂಗಳವಾರ ನಗರದಲ್ಲಿ ಆಯೋಜಿಸಿದ್ದ `ನಮ್ಮ ಭೂಮಿ, ನಮ್ಮ ಹಕ್ಕು'
ಸಮಾವೇಶದಲ್ಲಿ ಮುಖ್ಯ ಅತಿಥಿಯಾಗಿ ಭಾಗವಹಿಸಿ ಮಾತನಾಡಿದರು. ಪ್ರಸ್ತುತ ದೇಶದಲ್ಲಿ ಕೃಷಿ ಬಿಕ್ಕಟ್ಟು ಹಿಂದೆಂದಿಗಿಂತ ಹೆಚ್ಚಾಗುತ್ತಿದೆ. ಆದರೆ, ಅದಕ್ಕೆ ತಕ್ಕನಾಗಿ ದುಡಿಯುವ ವರ್ಗದಿಂದ ಪ್ರತಿರೋಧ ವ್ಯಕ್ತವಾಗುತ್ತಿಲ್ಲ ಎಂದು ವಿಷಾದಿಸಿದರು.
ನಾಡಿನ ರೈತ ಸಂಘನೆಯ ಮುಖಂಡ ದಿ. ನಂಜುಂಡ ಸ್ವಾಮಿ ಅವರ ಹೋರಾಟವನ್ನು ಸ್ಮರಿಸಿದ ಅವರು, ಇಲ್ಲಿನ ಎಲ್ಲ ರೈತ ಸಂಘಟನೆಗಳು ಹೊಸ ರಾಜಕೀಯ ನೀತಿ ರೂಪಿಸಿಕೊಳ್ಳಬೇಕಿದೆ. ಸರಿಯಾದ ದಾರಿಯಲ್ಲಿ ರೈತರನ್ನು ರಾಜಕೀಯಕ್ಕೆ ಒಗ್ಗೂಡಿಸಬೇಕಿದೆ ಎಂದರು. ಶಾಸಕ ಪುಟ್ಟಣಯ್ಯ ಮಾತನಾಡಿ, `ಬೆಳೆದ ಬೆಳೆಗೆ ಬೆಲೆ ಸಿಗದೆ, ಬೆಳೆ ಬೆಳೆಯುವುದಕ್ಕಾಗಿ ಸಾಲ ರೈತರು ಆತ್ಮಹತ್ಯೆಗೆ ಶರಣಾಗುತ್ತಿದ್ದರೆ, ಆ ಬಗ್ಗೆ ಕಣ್ಣೀರು ಹಾಕುವವರು ಕಾಣುತ್ತಿಲ್ಲ. ಇವು ಆತ್ಮಹತ್ಯೆ ಅಲ್ಲ ಸರ್ಕಾರಗಳೇ ನಡೆಸುವ ಕಗ್ಗೊಲೆಗಳಾಗಿವೆ' ಎಂದು ಕಿಡಿಕಾರಿದರು. ಮಾಜಿ ಶಾಸಕ ಶ್ರೀರಾಮರೆಡ್ಡಿ ಮಾತನಾಡಿದರು.
